Misala malamu epesaka Nzambe lokumu

BATO oyo balingaka Nzambe basalaka nyonso mpo na komonisa pole ya elimo oyo eutaka na Biblia, Liloba na ye. Mpo na yango, batosaka maloba ya Yesu ete: “Tiká ete moi na bino engɛnga liboso ya bato ete bámona misala na bino malamu mpe bákumisa Tata na bino oyo azali na Likoló.” (Matai 5:16) Maloba ya malamu mpe bizaleli ya malamu ekoki kopesa Nzambe lokumu.

Batatoli ya Yehova balukaka kosepelisa Nzambe; yango wana, balukaka kosala makambo ndenge Biblia elobi mpe basalaka molende mpo na kosalisa bato mosusu na elimo. Basalaka bongo ata na mikili oyo Leta andimi naino mosala na bango te. Na mboka-mokonzi moko ya mikili yango, Batatoli basalaka mayangani ya etúká mpe bato soki 6 000 kino 9 000 bayanganaka. Mpo na kosala mayangani yango, bafutelaka ndako moko ya monene. Ndenge basalaki na bambula oyo elekaki, liboso ya liyangani na bango na 1999, Batatoli ebele basalaki mosala makasi mpo na kotya bopɛto na esika yango, kotya bamikro na bakiti.

Bato oyo bazali Batatoli te bazalaki komona ntango bazalaki kosala mosala yango. Bakonzi ya esika yango bazalaki komona ndenge bazalaki kosala misala. Bamonaki mpe ete atako bato oyo bayanganaki bakómaki 15 666, makambo nyonso elekaki malamu mpe Batatoli bazalaki na mobulu te. Bakonzi yango bakamwaki mpe na komona ete Batatoli batikaki esika yango pɛto.

Mpo na komonisa ete basepelaki mpenza, bakonzi yango batyaki Batatoli bato ya liboso na bato oyo bakoki kofutela esika yango na mbula oyo ekolanda. Kasi basukaki wana te. Mpo na komonisa botɔndi na bango, na mokolo ya 15 Yuli 1999, bapesaki komite ya liyangani, libaya moko oyo basalaki yango malamu mpe bakomaki ete “lisangá ya Batatoli ya Yehova,” lokola mbano ya mosala basalaki—likambo ya kokamwa na mboka oyo mosala na bango ya koteya Biblia epekisami.

Na mobu 2000 mpe 2001, na mokili mobimba, bamilio ya bato bakozala na mayangani ya etúká ya Batatoli ya Yehova oyo ekozala na motó ya likambo ete “Batosi ya Liloba ya Nzambe.” Soki yo moko mpe okozala na liyangani yango, okomona na miso ete bato yango basalelaka mpenza makambo oyo ezali na Biblia, basalaka misala malamu oyo epesaka Nzambe lokumu.