Bolingo ezali na ntina mingi

MOTO nyonso: mokóló to mwana, mondɛlɛ to moindo, ezala alobaka monɔkɔ nini, azalaka na mposa ya bolingo. Soki mposa yango ekokisami te, moto azalaka na esengo te. Monganga moko akomaki boye: “Bolingo mpe boninga ezali mosisa ya makambo oyo ebɛlisaka mpe ebikisaka biso, oyo eyokisaka mawa mpe epesaka esengo, oyo eyokisaka biso mpasi mpe esilisaka mpasi. Soki babimisi nkisi ya sika oyo ekosala lokola bolingo, monganga nyonso akopesa yango na bato na ye ya maladi. Monganga oyo akopesa yango te, ayebi mosala te.”

Kasi, na mokili oyo, mingimingi na radio, na televizyo, ata mpe bavɛdɛti, balobelaka mingi nde bozwi, nguya, lokumu, pite ná ekobo, na esika ya bolingo. Balakisi mingi balendisaka bana-kelasi bámityela mikano ya kokóma bato minene mpe kozala na mosala ya malamu, mpe bamonisaka ete kobonga ya moto etaleli libosoliboso kozala na biloko wana. Toboyi te, kotánga kelasi mpe koyekola mosala ezali na ntina, kasi esengeli nde komipesa mobimba na yango mpe kobosana bandeko ná baninga? Mokomi moko ya kala, oyo atángaki kelasi mingi mpe azalaki koyekola bizaleli ya bato alobaki ete moto oyo azali na makoki mingi, kasi azangi bolingo azali lokola “eteni ya ebende ya bronzɛ oyo ezali kolela to sɛmbalɛ oyo ezali kobɛta.” (1 Bakolinti 13:1) Moto ya ndenge wana akoki kokóma na bozwi, to mpe koyebana mingi, kasi akozala mpenza na esengo te.

Yesu Klisto, moto oyo ayebaki bato malamumalamu mpe alingaki bango, ateyaki bato mingimingi kolinga Nzambe mpe kolinga mozalani. Alobaki boye: “Osengeli kolinga Yehova Nzambe na yo na motema na yo mobimba mpe na molimo na yo mobimba mpe na makanisi na yo nyonso. . . . Osengeli kolinga mozalani na yo lokola yo moko.” (Matai 22:37-39) Kaka bato oyo batosaki maloba wana nde bakómaki bayekoli na ye ya solo. Yango wana, alobaki boye: “Na ndenge wana bato nyonso bakoyeba ete bozali bayekoli na ngai, soki bozali na bolingo na kati na bino.”​—Yoane 13:35.

Kasi, lelo oyo, ndenge nini moto akoki kokóma na bolingo? Ndenge nini baboti bakoki koteya bana na bango bolingo? Tokozwa biyano na mituna yango na lisolo oyo elandi.

[Bililingi na lokasa 3]

Na mokili oyo etondi na lokoso, kokóma na bolingo ezali lisɛki te