Nzambe amibanzabanzaka mpo na biso?

OZALI nde kobunda na mikakatano ya libota, na maladi, na mitungisi na mosala, to mikumba mosusu? Bato mingi bazali bongo. Nani lelo oyo azali komitungisa te mpo na kozanga bosembo, kobomana, mpe mobulu? Makambo ezali mpenza ndenge Biblia elobi ete: “Bozalisi mobimba ezali kokoba komilelalela elongo mpe ezali konyokwama elongo tii sikoyo.” (Baloma 8:22) Yango wana bato mingi bazali kotuna ete: ‘Nzambe amibanzabanzaka mpenza mpo na biso? Akosalisa biso?’

Salomo, mokonzi ya bwanya abondelaki Nzambe ete: “Zambi yo, bobele yo, oyebi mitema ya bana ya bato.” Salomo azalaki kondima ete Nzambe ayebi biso mpe amibanzabanzaka mpo na mokomoko na biso. Asɛngaki Nzambe ‘ayoka kuna na likoló’ mpe andima mabondeli ya moto na moto oyo abangaka ye oyo akoyebisa ye “mpasi na ye mpe mawa na ye.”​—2 Ntango 6:29, 30.

Lelo oyo, Nzambe azali mpe komibanzabanza mpo na biso mpe azali kosɛnga biso tóbondela ye. (Nzembo 50:15) Alaki ete akoyanola na mabondeli ya solosolo oyo eyokani na mokano na ye. (Nzembo 55:16, 22; Luka 11:5-13; 2 Bakolinti 4:7) Yehova ayokaka ‘moto moko soki bato nyonso na [ye], . . . bakobondela epai na ye to bakolɔmbaka ye.’ Na yango, soki tozali kotyela Nzambe motema, tozali kobondela ye asalisa biso, mpe topusani penepene na ye, akobatela biso mpe akotambwisa biso na bolingo. (Masese 3:5, 6) Yakobo, mokomi moko ya Biblia, alobi na biso ete: “Bópusana penepene na Nzambe, mpe ye akopusana penepene na bino.”​—Yakobo 4:8.