“Baoyo bakokita na masuwa kati na mai-monene”

PEMBENI ya libongo ya Gloucester, na etúká ya Massachusetts, na États-Unis, ezali na ekeko moko ya bronzɛ ya moto alati ekɔti mpe azali kotambwisa masuwa na kati ya mopɛpɛ makasi. Basalaki monima yango mpo na kokanisa bamilio ya babomi-mbisi ya engumba Gloucester oyo bakufá na mbu. Na nse ya monima mpe na etanda moko oyo ezali pembeni na yango, bakomi maloba ya Nzembo 107:23, 24: “Baoyo bakokita na masuwa kati na mai-monene, bakosalaka mombongo na mai-na-monana, bango bakomona misala ya [Yehova] mpe bikamwiseli na ye kati na bozindo.”

Mosala ya koboma mbisi na Mai Monene ya Atlantique ezali na makama mingi mpenza. Bato soki 5368 ya Gloucester​—engumba oyo ezali lelo na bato koleka 30 000—​bakufá na mosala ya koboma mbisi na mbu. Makomi oyo ezali na monima yango elobi boye: “Bamosusu bazwamaki na mipɛpɛ makasi mpe mbonge ya mopɛpɛ ya nsɔmɔ oyo eutaki na nɔrdi. Bamosusu bakufaki ntango bazalaki bango moko na mwa bwato oyo etikaki masuwa mpe ekendaki kobɛta na mabelé. Bamasuwa mosusu etutanaki na ntango ya mipɛpɛ makasi mpe ezindaki. Misusu ezindaki mpo bamasuwa ya minene etutaki yango.”

Monima wana esalisaka bato bámona mosala ya mpasi mpe makama oyo babomi-mbisi, basili kokutana na yango na boumeli ya bankama ya bambula. Kanisá mawa mpe ebele ya mpisoli ya bato oyo babungisaki mibali, batata, bandeko to mpe bana na bango. Nzokande, Yehova abosani te basi oyo bakufelá mibali, bitike, mpe baoyo nyonso bakufá na mai. Ntoma Yoane alobelaki likambo moko oyo ekosalema na mikolo ekoya: “Mbu ezongisaki bakufi oyo bazalaki na kati na yango, mpe liwa ná Hadesi ezongisaki bakufi oyo bazalaki na kati na yango.” (Emoniseli 20:13) Ntango bato oyo ‘bakitaki na masuwa kati na mai-monene’ bakosekwa, na ntango wana nde bakomona “misala ya Yehova.”