Bazali kosakola nsango malamu epai ya bababa

“BAZALI komemela bino bilei ya elimo!” Wana ezali ndenge mokambi moko ya ndako ya mibange alobaki mpo na Batatoli ya Yehova oyo bayaki kosakola na ndako yango, na Navalcarnero, na Madrid, na Espagne. Nini etindaki ye aloba bongo?

Bato mingi oyo bafandi na ndako yango (Rosas del Camino) bazali bababa. Kasi, lokola Batatoli basalá makasi mpo na koyeba bajɛstɛ ya Espagne mpo na kosolola na bababa, basololaka na bato yango. Mokambi yango akumisaki Batatoli na ndenge balekisaka ntango na bango ofele mpo na koteya makambo ya elimo epai ya bato oyo bazali mpenza na mposa na yango. Amonaki ndenge nsango malamu ya Bokonzi esalisaki bato yango. Mpe bato yango, mingimingi baoyo bakufá miso mpe matoi, basepelaka mingi ntango Batatoli bayaka kotala bango.

Eulogio, moko ya bato yango oyo akufá miso mpe matoi, azali sikoyo koyekola Biblia na Batatoli ya Yehova. Mokolo moko, ntango bazalaki koyekola, mobange moko ayaki mpe apesaki Motatoli nzembo moko oyo bato yango basalaki mpo na komonisa botɔndi na bango. Motó ya likambo ya nzembo yango ezalaki: “Kozala Motatoli.” Eteni moko elobaki boye: “Bazali na bomoi malamu mpe bamitambwisaka na molɔngɔ, mpe Yehova azali kopesa bango bwanya oyo etondisaka bango na esengo. Bakendaka kotala bato mbala na mbala na bandako na bango mpo batyaka elikya na bango epai ya Yehova.”

Elikya na bango epai ya Yehova nde etindaka Batatoli mingi na mokili mobimba báyekola bajɛstɛ mpo na kosolola na bababa na bikólo na bango. Na ndenge yango, bazali kosakola nsango ya elikya oyo elendisaka epai ya bato yango.