Televizyo eteyaka bana malamu?

EKOKI kozala ete na bantango mosusu, omonaka malamu kotika bana na yo bátalaka televizyo wana ozali kosala makambo mosusu. Kasi, oyebi likambo oyo televizyo ekoki kosala epai ya bana?

Zulunalo moko (The New York Times) elobi ete “makambo oyo balakisaka na televizyo ekoki koyokisa ata bana ya mike mawa, kosepelisa bango, to mpe kobangisa bango.” Bazwaki bana oyo bakokisi mbula moko mpe batyaki bango liboso ya televizyo mpo bátala mwasi moko oyo azalaki kosakana na mwana-popi. Zulunalo yango ebakisi boye: “Ntango mwasi yango azalaki kosala lokola nde azali kobanga mwana-popi, bana yango mpe bazalaki koboya kosakana na mwana-popi mpe bakómaki mawamawa, bakangaki elongi mpe babandaki kolela. Kasi, ntango mwasi yango azalaki kosɛka mpe kosakana na mwana-popi, bana mpe bazalaki kosepela kosakana na mwana-popi.”

Mwana oyo atalaka televizyo mingi akómaka ndenge nini? Doktɛrɛ Naoki Kataoka, molakisi na eteyelo moko ya minganga ya maladi ya bana na Japon, ayekolaki bizaleli ya bana mingi oyo bafandaka nyɛɛ mpe bazalaka na esengo te. Ntango atalelaki likambo yango malamu amonaki ete bana yango nyonso bazalaki kotala televizyo mingi. Mwana moko ya mbula mibale azalaki kokoka kosolola te. Mwana yango amesanaki kotala televizyo mikolo nyonso kobanda ntɔngɔ tii mpokwa banda ntango azalaki naino na mbula moko. Ntango mama na ye alandaki toli ya monganga mpe apekisaki ye kotalaka televizyo, mpe akómaki kolekisa ntango mingi elongo na ye, mwana yango akómaki kosolola malamu. Likambo yango emonisi ete baboti basengeli kolekisaka ntango elongo na bana na bango.

Yehova Nzambe, mobandisi ya libota alendisaki baboti ete bálekisaka ntango mingi elongo na bana na bango. Na ntango ya kala, alobaki na basaleli na ye boye: “Okolakisa [maloba ya Nzambe] na etingya na bana na yo, mpe okosolola mpo na yango wana ekofanda yo na ndako, mpe wana ekotambola yo na nzela, mpe wana ekolala yo, mpe wana ekotɛlɛma yo.” (Deteronome 6:7) Ezali baboti nde bakoki koteya bana malamu mpe kolakisa bango ‘nzela ekoki na bango kotambola,’ kasi televizyo te.​—Masese 22:6.