Mposa na ye ezalaki kati na mobeko ya Yehova

NDEKO Albert Schroeder, oyo azalaki na Lisangani ya Mikóló-Bakambi ya Batatoli ya Yehova, akufaki mokolo ya misato 8 Marsi 2006. Azalaki na mbula 94 mpe alekisaki mbula koleka 73 na mosala ya ntango nyonso.

Ndeko Schroeder abotamaki na engumba Saginaw, na etúká ya Michigan, na États-Unis na mobu 1911.a Ntango azalaki mwana moke, nkɔkɔ na ye ya mwasi azalaki koteya ye Biblia, mpe yango etindaki ye alinga mingi kotángaka Liloba ya Nzambe. Ayekolaki monɔkɔ ya Latin ná monɔkɔ ya Allemand mpe makambo etali lontiliki (électricité) na iniversite ya Michigan. Nzokande, ntango akómaki kosepela mingi na Biblia, akataki kelasi mpe abandaki mosala ya ntango nyonso. Na 1932, akómaki kosala na Betele ya Brooklyn, na New York.

Na 1937, Ntango ndeko Schroeder azalaki na mbula 26, akómaki kokamba mosala ya Batatoli ya Yehova na Grande-Bretagne. Molende na ye na mosala ya kosakola elendisaki bandeko mingi bákɔta na mosala ya ntango nyonso. Elenge moko oyo asalaki na ye na Betele ya Londres ezali John Barr. Na nsima, basalaki na ye bambula mingi na Lisangani ya Mikóló-Bakambi.

Tobosani te mosala oyo Ndeko Schroeder asalaki mpo na Batatoli ya Yehova na ntango ya bitumba. Na sanza ya Augusto 1942, bakangaki ye na Grande-Bretagne. Nsima ya mobembo molai mpe ya mpasi na ntango ya etumba, akómaki na Brooklyn na sanza ya Sɛtɛmbɛ.

Na ntango wana, Batatoli ya Yehova bazalaki komona ete bakozala na mosala monene nsima ya Etumba ya Mibale ya mokili mobimba. Ndeko Schroeder akamwaki mpe asepelaki mpenza ntango azwaki mokanda oyo elobaki ete azwi mokumba ya kozala sekrɛtɛrɛ na Gileadi, eteyelo ya Société Watchtower mpo na mateya ya Biblia. Na boumeli ya mwa bambula, azalaki molakisi na eteyelo yango, mpo na kobongisa bamisionɛrɛ. Bandeko oyo atángisaki na Eteyelo ya Gileadi, mpe na nsima na Eteyelo ya Mosala ya Bokonzi babosanaka te ntango kitoko oyo balekisaki na ye na bakelasi yango. Azalaki kosepela koteya bana-kelasi na ye bálinga mibeko ya Nzambe mpe komonisa bango ntina ya kokoba koyeba Yehova.

Na 1956, Ndeko Schroeder abalaki Charlotte Bowin, mpe na 1958 babotaki mwana mobali, nkombo na ye Judah Ben. Ndeko Schroeder azalaki tata mpe mobali malamu. Na 1974, akɔtaki na Lisangani ya Mikóló-Bakambi, mpe bandeko oyo bazalaki kosala na ye, basepelaki mingi na mosala na ye. Azalaki na boboto mpe na komikitisa; kasi, na koleka, azalaki kolinga kokumisa nkombo ya Nzambe. Tondimi mpenza ete Ndeko Schroeder azwi mbano na ye mpo na bomoi na likoló mpamba te azalaki moklisto mopakolami oyo ‘mposa na ye ezalaki na kati ya mobeko ya Yehova.’​—Nzembo 1:2.

[Maloba na nse ya lokasa]