Osimbaka mabaku ya koyebisa basusu bindimeli na yo?

“SOLO ezali kaka moko?” Wana ezalaki likambo oyo bana basengelaki kolobela na mamekani moko oyo esalemaki na ekólo Pologne. Malako mpo na mamekani yango elobaki boye: “Tozali na mposa ya solo kaka moko te. Moto moko te alingi ezala bongo. Solo ezali kaka moko te.” Agata, moyekoli moko ya mbula 15 oyo azali Motatoli ya Yehova, asalelaki libaku wana mpo na koyebisa basusu bindimeli na ye.

Mpo na kobongisa mamekani yango, Agata abondelaki Yehova mpe abandaki koluka masolo oyo elobeli likambo yango. Azwaki makambo oyo eyokani na likambo oyo basengelaki kolobela na Linɔ́ngi ya Mosɛnzɛli ya 1 Yuli 1995. Azongelaki motuna oyo Pilato atunaki Yesu: “Solo ezali nini?” (Yoane 18:38) Agata amonisaki ete Pilato atunaki motuna yango na lityo mpenza, lokola nde alobaki boye: ‘Solo? Solo nde nini? Solo ezali te!’ Agata akomaki boye: “Motuna ya Pilato ekundwelaki ngai likambo oyo basɛngi biso tólobela na mamekani mpe malako oyo bapesaki mpo na mamekani yango.”

Na nsima, alobelaki likanisi ya bato ya filozofi oyo balobaka ete solo etali bato na bato. Likanisi na bango ezali ete moto moko akoki koloba ete likambo boye to boye ezali solo mpe mosusu alobi ete ezali solo te, kasi bango nyonso mibale bazali na “elonga.” Atunaki mituna lokola, “Nani akondima komata na mpɛpɔ soki andimi te ete mayele oyo basalelaka mpo na komatisa mpɛpɔ na likoló ezali solo te?” Na nsima, abendaki likebi na Biblia mpe alobaki ete: “Tosengeli mpenza kotyela Liloba ya Nzambe motema, mpo elobelaka mpenza makambo ya solo.” Na nsima, alobaki ete azali na elikya ete baoyo bazali mpenza na mposa ya koyeba solo bakowelela te koloba ete solo ezali te, kasi bakoluka na motema mpiɔ tii ntango bakozwa yango.

Bapesaki Agata diplome moko. Bapesaki ye mpe libaku ya kolobela makambo yango liboso ya baninga nyonso ya kelasi. Baninga mingi ya kelasi bandimaki koyekola Biblia na ye. Agata azali mpenza na esengo lokola asalelaki libaku wana mpo na koyebisa basusu bindimeli na ye. Ya solo, soki ozali kosalela mabaku nyonso mpo na koyebisa basusu bindimeli na yo, milende na yo ekobota mbuma. Mabaku nini ozali na yango ya koyebisa basusu bindimeli na yo?