Bomoi mpe misala ya Bakristo na ekeke ya liboso

“Basali misala na ndako”

“Nzokande ntango bazalaki kokende akɔtaki na mboka moko boye. Awa mwasi moko nkombo na ye Marta ayambaki ye na ndako. Mwasi yango azalaki mpe na ndeko na ye ya mwasi na nkombo Maria, oyo afandaki na makolo ya Nkolo mpe azalaki koyoka liloba na ye. Nzokande, Marta azalaki komitungisa na ebele ya misala oyo azalaki kosala. Bongo ayaki pene mpe alobaki ete: ‘Nkolo, ezali kosala yo eloko te ndenge ndeko na ngai atiki ngai moko nasalaka misala? Yebisá ye aya kosalisa ngai.’ Nkolo azongiselaki ye ete: ‘Marta, Marta, ozali komitungisa mpe komiyokisa mpasi mpo na biloko mingi. Nzokande, kaka biloko moke nde ezali na ntina, to moko kaka. Maria ye aponi eloko oyo ezali malamu, mpe bakobɔtɔla ye yango te.’”​—LUKA 10:38-42.

EMONANI ete Marta azalaki mwasi makasi na mosala. Na ntembe te, bato bazalaki kopesa ye limemya mingi. Na kotalela mimeseno ya Bayuda na ekeke ya liboso, lokumu ya mwasi ezalaki komonana na misala ya ndako mpe na makoki na ye ya kokokisa bamposa ya libota na ye.

Basi bakristo na ekeke ya liboso balendisamaki mpe bázala “basali misala na ndako.” (Tito 2:5) Kasi, bazalaki mpe na mokumba ya koteya basusu mateya ya bokristo. (Matai 28:19, 20; Misala 2:18) Wapi misala mosusu na “ebele ya misala” oyo mwasi Moyuda na ekeke ya liboso azalaki kosala? Mpe liteya nini tokoki kozwa na maloba oyo Yesu alobaki na Maria?

“Komitungisa na ebele ya misala” Mwasi Moyuda azalaki kobanda misala na ye ya ndako na ntɔngɔ makasi, ekoki kozala liboso moi ebima. (Masese 31:15) Nsima ya kolamba mwa pɔtɔpɔtɔ mpo na libota na ye, azalaki kokende kotika bana na ye ya mibali na eteyelo na sinagoga. Bana na ye ya basi bazalaki kotikala na ndako mpo na koyekola ndenge ya kokóma basi oyo bakoki.

Elongo na mama na bango, bana basi bazalaki kobanda mokolo na misala mikemike ya ndako, na ndakisa kotya mafuta na miinda (1), kokomba (2), mpe kobenda miliki na mabɛlɛ ya ntaba ya libota (3). Na nsima, bazalaki kosala mampa ya mokolo. Bana basi bazalaki liboso kopupola farini mpo na kolongola bosɔtɔ (4), mpe na nsima bazalaki kopasola mbuma mpe konika yango na enikelo ya mabɔkɔ (5). Mama azalaki kozwa farini yango, kotya yango mai mpe levire. Azalaki kobɛta pɔtɔpɔtɔ (6) mpe na nsima, azalaki kotika yango evimba, mpe azalaki kokoba na misala mosusu. Na ntango wana, bana basi bazalaki kobɛtabɛta miliki oyo bazwaki na ntaba mpo ekóma fromaje (7).

Ntango moi ebimi, mama ná bana basi bazalaki kokende na zando. Kuna bazalaki koyoka nsolo ya biloko, makɛlɛlɛ ya banyama, mpe makɛlɛlɛ ya basombi ntango bazali kokakola ntalo ya biloko, na nsima bazalaki kosomba biloko oyo bakolya mokolo wana (8). Na biloko oyo bazalaki kolya na mokolo, ndunda mpe mbisi ya kokauka ezalaki kozanga te. Soki azalaki mokristo, mwasi yango azalaki mpe kosalela libaku yango mpo na koteya basusu mateya ya solo na zando.​—Misala 17:17.

Mama ya bokɛngi azalaki kosalela mabaku wana, elingi koloba ntango bazali kokende na zando to kozonga mpo na kosalisa bana na ye báyeba mpe bátosa mitinda ya Makomami. (Kolimbola Mibeko 6:6, 7) Azalaki mpe koyebisa bana na ye ya basi mitinda oyo esengelaki kosalisa bango bázala basi oyo báyebi kosalela mbongo.​—Masese 31:14, 18.

Mosala mosusu oyo basi bazalaki kosala na mokolo ezalaki kokende na libulu ya mai (9). Kuna bazalaki kotoka mai mpo na libota, ntango mosusu bazalaki kosolola na basi mosusu oyo bazalaki mpe koya kotoka mai. Ntango kaka bazongi na ndako, mama ná bana na ye ya basi bazalaki kobanda kotumba mampa. Liboso, bazalaki kokabola pɔtɔpɔtɔ yango ndambondambo mpe kotya yango na kikalungu ya patatalu, na nsima bazalaki kokɔtisa yango na etumbelo ya mampa oyo basilaki kopelisa mɔtɔ (10), oyo mbala mingi ezalaki libándá. Wana bazali koyoka nsolo ya mampa yango mpe kosolola, bazalaki mpe kotala ndenge ezali kobela.

Na nsima, bazalaki kokende na mwa mikɛli ya mai oyo ezalaki mosika te mpo na kosukola bilamba (11). Basi bazalaki libosoliboso konika bilamba na sabuni oyo esalemi na nkasa ya nzete moko boye. Nsima ya kolongola fulufulu ya sabuni na mai mpe kokamola yango, basi bazalaki kotanda bilamba yango na mwa matiti mpe mabanga oyo ezalaki wana mpo ekauka.

Nsima ya komema na ndako, bilamba yango oyo basukolaki, mama ná bana na ye ya basi bazalaki komata na nsamba ya ndako na bango mpo na kotonga (12) elamba nyonso oyo ebebaki liboso ya kotya yango na esika oyo bazalaki kobomba bilamba. Na nsima, bana basi bazalaki koyekola ndenge ya kosala broderie mpe kotonga bilamba na bansinga (13). Na nsima, basi bazalaki kobanda kolamba bilei ya mpokwa (14). Koyamba bapaya ezalaki momeseno na bango, na yango libota mobimba ezalaki komibongisa mpo na kolya mampa, ndunda, framaje, mbisi ya kokauka mpe komɛla mai ya malili elongo na mopaya nyonso oyo azalaki koya epai na bango.

Na butu, soki bana balingi kokende kolala, mama azalaki kopakola mafuta na mabɔlɔngɔ ya bana oyo bazokaki. Na nsima, na mwa kongɛnga ya mwinda, baboti bazalaki Kobɛtɛla bana na bango lisolo moko ya Makomami mpe kobondela elongo na bango. Na nsima, ntango ndako ezalaki kokóma nyɛɛ, mobali azalaki mpenza na ntina ya kokumisa mwasi na ye na maloba oyo: “Mwasi oyo akoki, nani akoki kozwa ye? Motuya na ye eleki mosika oyo ya mabanga kitoko ya korai.”​—Masese 31:10.

Kopona “eloko oyo ezali malamu” Na ntembe te, basi ya bokɛngi na ekeke ya liboso bazalaki na “ebele ya misala” oyo ezalaki kozwa bango ntango. (Luka 10:40) Ndenge moko mpe basi ya lelo, mingimingi bamama bazalaka na makambo mingi ya kosala. Bamasini ndenge na ndenge oyo ebimi lelo oyo esali ete misala mosusu ya ndako ekóma pɛpɛlɛ mpo na basi mosusu. Kasi, bomoi ya lelo ezali kosala ete bamama mingi básuka kaka te na misala ya ndako, kasi mpe bákende kosala epai mosusu.

Longola mikakatano oyo bazali kokutana na yango, basi bakristo mingi lelo oyo balandaka ndakisa ya Maria, oyo tolobelaki na ebandeli ya lisolo. Bazwaka mpenza makambo ya elimo na motuya. (Matai 5:3) Babatelaka malamu mabota na bango, ndenge Makomami elendisi bango. (Masese 31:11-31) Kasi, batosaka mpe toli oyo Yesu apesaki Marta. Lokola azalaki mwasi ya elimo, andimaki mpenza na motema moko toli wana ya boboto. Basi bakristo batikaka te ete misala na bango ya ndako ebebisa mabaku oyo bazali na yango ya koyekola makambo ya Nzambe (15) to ya koyebisa basusu mateya ya solo. (Matai 24:14; Baebre 10:24, 25) Na ndenge yango, baponaka “eloko oyo ezali malamu.” (Luka 10:42) Mpo na yango, Nzambe, Kristo mpe mabota na bango bazwaka bango na motuya mingi.​—Masese 18:22.