Sekele 2
Tɛmɛlá mposa ya komikokanisa na basusu
BIBLIA ETEYAKA NINI? “Salá mosala na yo moko malamu, mpe okozwa likambo ya komikumisa na yango. Kasi komikokanisa te na basusu.”—Bagalatia 6:4, Biblia Contemporary English Version.
MOKAKATANO EZALI WAPI? Tokoki koluka komikokanisa na basusu—ntango mosusu na baoyo bazali na biloko mingi te koleka biso, kasi mbala mingi tolukaka nde komikokanisa na baoyo bazali na makasi, bozwi, to mpe mayele koleka biso. Nzokande, ezala ndenge nini, koluka komikokanisa na moto mosusu ezalaka kaka mabe. Tosalaka libunga ntango tokokanisaka valɛrɛ ya moto na biloko oyo azali na yango to na makambo oyo akoki kosala. Tokoki mpe kotinda basusu bákóma na bilulela mpe ezaleli ya kowelana.—Mosakoli 4:4.
OKOKI KOSALA NINI? Luká komimona ndenge Nzambe amonaka yo. Tiká makanisi na ye esalisa yo omona ndenge mpenza ozali. “Moto amonaka oyo emonanaka na miso; kasi Yehova,a amonaka ndenge motema ezali.” (1 Samwele 16:7) Yehova atalelaka te valɛrɛ na yo, na kokokanisa yo na bato mosusu, kasi nde na ndenge amonaka motema na yo, ayebaka makanisi, ndenge ozali komiyoka mpe makambo ozali kokana. (Baebre 4:12, 13) Yehova ayebaka bandelo na yo, asɛngaka mpe yo moko oyeba yango. Soki ozali koluka kokokanisa valɛrɛ na yo na oyo ya basusu, okokóma na lolendo mpe okozala lisusu na esengo te. Na yango, na komikitisa nyonso, ndimá ete okobanda ntango nyonso te kozala moto ya liboso na makambo nyonso.—Masese 11:2.
Osengeli mpenza kosala nini mpo ozala na valɛrɛ na miso ya Nzambe? Na litambwisi ya elimo santu, Nzambe atindaki mosakoli Mika akoma boye: “Ee yo moto ya mabele, ye ayebisi yo oyo ezali malamu. Mpe eloko nini Yehova azali kosɛnga yo, soki bobele komonisa bosembo, kolinga boboto mpe kotambola na bopɔlɔ elongo na Nzambe na yo?” (Mika 6:8) Soki olandi toli yango, Nzambe akotyela yo likebi. (1 Petro 5:6, 7) Oyo nde likambo ekoki kosala ete osepelaka mpenza na oyo ozali na yango!
[Maloba na nse ya lokasa]
a Nkombo ya Nzambe ndenge ezali na Biblia.
[Elilingi na lokasa 5]
Mpo na koyeba valɛrɛ na biso, Yehova atalaka oyo ezali na motema na biso