Biblia ekokani na babuku mosusu?

“Makomami nyonso ekomami na litambwisi ya elimo ya Nzambe mpe ezali na litomba . . . , mpo moto ya Nzambe akoka mpenza, azala na nyonso oyo esengeli mpo na mosala nyonso ya malamu.”​—2 TIMOTE 3:16, 17.

BATO nyonso te nde bandimaka ete maloba ya vɛrsɛ wana ezali solo. Bongo yo? Okanisaka ete Bibia ezali:

• Buku moko oyo ekomamá malamu mpenza?

• Moko ya babuku mosantu oyo bato bazwaka na valɛrɛ mingi?

• Buku moko ya masapo oyo ezali na mateya oyo etali bizaleli malamu?

• Liloba ya Nzambe?

Motuna mosusu yango oyo: Mateya oyo ondimaka ezali mpenza na ntina? Talá oyo Biblia elobi: “Makambo nyonso oyo ekomamaki kala ekomamaki mpo eteya biso, mpo, na ezaleli na biso ya koyika mpiko mpe na libɔndisi oyo euti na Makomami, tózala na elikya.” (Baroma 15:4) Biblia emonisi ete ekomamaki mpo na koteya biso, kobɔndisa biso, mpe kopesa biso elikya.

Soki Biblia ezalaki kaka buku moko oyo ekomamá malamu mpenza to ezali kaka moko ya babuku mosantu, olingaki nde kondima eteya yo, etambwisa libota na yo, mingimingi soki mateya na yango ekeseni na makambo oyo okanisaka ete ezali malamu? Soki Biblia ezalaki kaka buku oyo etondi na masapo, bilaka na yango elingaki kobɔndisa yo mpe kopesa yo elikya?

Na ngámbo mosusu, bamilio ya bato oyo bayekoli Biblia bandimi ete ezali mpenza Liloba ya Nzambe. Mpo na nini? Biblia ekeseni na babuku mosusu nyonso na nini? Tosɛngi yo otánga masolo oyo elandi mpo na koyeba makambo mitano oyo ekesenisi Biblia na babuku mosusu nyonso.