Ozali koyoka ete okokoka lisusu te?

Na ndakisa, Sally,a mwasi moko oyo afandi na États-Unis, abungisaki biloko na ye nyonso ntango mopɛpɛ moko makasi ebɛtaki na mboka na bango; alobi boye: “Nakómaki koyoka ete nakokoka lisusu te. Namonaki ete nakómi mpenza na nsuka mpe eumelaki bongo mikolo mingi.”

Ezalaka ndenge nini ntango liwa ezwi ndeko to moninga moko? Janice, mwasi moko oyo afandi na Australie, alobi boye: “Ntango bana na ngai mibale ya mibali bakufaki, nakómaki koyoka ete bomoi na ngai ezali lisusu na ntina moko te. Nabondelaki Nzambe, nalobaki na ye: ‘Yokelá ngai mawa, nakokoka lisusu te! Tiká ngai nakufa na ngai.’”

Mpo na Daniel, mwasi na ye nde asalaki ekobo. Alobi boye: “Ntango mwasi na ngai ayebisaki ngai ete asalaki ekobo, nayokaki lokola batubi ngai mbeli na motema. Mpasi yango ezalaki kozongela ngai mbala na mbala, eumelaki basanza mingi.”

Na zulunalo oyo, tokolobela ndenge bomoi na yo ekoki kozala kaka na ntina ata soki

• Likama ekómeli yo

• Ndeko to moninga na yo akufi

• Molongani na yo asali ekobo

• Ozali kobunda na maladi ya makasi

• Ozali koyoka ete okómi mpenza na nsuka

Ya liboso, tokoki kosala nini ntango likama moko ekómeli biso?