Mayangani ya mikili mingi na Amerika ya Nɔ́rdi na mobu 1998

Lokola yango eyebisamaki mokolo ya pɔ́sɔ mwa 5 Ɔkɔtɔ́bɛ 1996 na likita ya nsuka ya mbula ya basangani ya Watch Tower Bible and Tract Society of Pennsylvania, Lisangani ya Mikóló-Bakambi bakani kobongisa mayangani ya mikili mingi na mobu 1998. Longola mayangani ya etúká oyo tomesani kosala, mayangani ya mikili mingi ekobongisama na Amerika ya Nɔ́rdi mpe na Afrika, na Azia, na Mpótó, na Amerika Latini, na bisanga ya Antilles mpe na bisanga ya Pasifike ya Sudi.

Mingi ya mayangani yango ya sipesiale ekosalama na Amerika ya Nɔ́rdi, mpe batindami bakouta na mokili mobimba bakobyangama. Lisusu, tozali kobongisa koyamba bamisionere na mayangani ya mikili mingi yango. Bamisionere mpe bandeko mosusu oyo bazali komipesa na mosala moko ya sipesiale na mikili ya bopaya mpe oyo bazali kokokisa masengami, bakobyangama mpo na koyangana na moko ya mayangani yango na bikolo na bango, to na ekolo moko ya pembeni na oyo ya bango.

Na mikolo mizali koya bokozwa bingengiseli ya sikisiki mpo na oyo etali badati, bisika, masengami ya kokokisa mpo na kozala motindami, bibongiseli bikamatami mpo na batindami oyo bakouta na mikili ya bopaya mpe makambo mosusu. Motango moke ya batindami ya États-Unis bakozwa libaku ya koyangana na mayangani ya mikili mingi na mikili mosusu. Basakoli oyo bakani kotondisa demande mpo na kozala moko kati na batindami bakolinga ntango mosusu kobanda kobomba mosolo mpo na likambo oyo ya sipesiale.