Tólata elimo ya komikitisa
1 Davidi, elenge moko mobateli ya mpate, atyeli Yehova motema mpe alongi soda moko ya elombe. (1 Sam. 17:45-47) Yobo, moto moko ya bozwi mingi, akangi motema na bampasi ya makasi. (Yobo 1:20-22; 2:9, 10) Yesu, mwana ya Nzambe, amonisi ete makambo nyonso oyo azali koteya euti epai ya Tata na ye. (Yoa. 7:15-18; 8:28) Na ndakisa mokomoko oyo tolobeli, komikitisa ezalaki na ntina mingi. Ndenge moko mpe lelo oyo, komikitisa ezali na ntina mingi na makambo ndenge na ndenge oyo tozali kokutana na yango.—Kols. 3:12.
2 Na mosala ya kosakola: Biso baministre baklisto, tosakolaka nsango malamu na komikitisa mpenza epai ya bato ya ndenge nyonso, tokaniselaka bango mabe te mpo kaka bazali na mposo mosusu, mimeseno mosusu, to bautá epai mosusu. (1 Kol. 9:22, 23) Soki bato mosusu bazali na limemya te to bazali koboya nsango ya Bokonzi na lofundo nyonso, biso tozongiselaka bango maloba na lofundo te, kasi tolandaka koluka bato oyo babongi. (Mat. 10:11, 14) Na esika ya koluka kokamwisa bato mosusu na makambo oyo toyebi to na bakelasi oyo totángá, tobendaka nde likebi ya bato na Liloba ya Nzambe mpamba te toyebi ete yango ezali na nguya koleka maloba nyonso oyo tokoki koloba. (1 Kol. 2:1-5; Ebe. 4:12) Na ndakisa ya Yesu, topesaka lokumu nyonso na Yehova.—Mko. 10:17, 18.
3 Na lisangá: Baklisto basengeli mpe ‘kolata elimo ya komikitisa na kati na bango.’ (1 Pet. 5:5) Soki tozali kotalela bandeko ete baleki biso, tokoluka makambo oyo tokosalela bango na esika ya kozela ete bango básalela biso. (Yoa. 13:12-17; Filp. 2:3, 4) Tokokanisa te ete misala lokola kotya bopɛto na Ndako ya Bokonzi ezali mpo na bato lokola biso te.
4 Komikitisa esalisaka biso ‘tókangaka motema moto na moto na makambo ya mosusu na bolingo’ mpe yango esalaka ete kimya mpe bomoko ezala na kati ya lisangá. (Ef. 4:1-3) Komikitisa esalisaka biso tótosa baoyo batyami mpo na kotambwisa lisangá. (Ebe. 13:17) Esalisaka biso tóndima toli to disipilini nyonso oyo bakoki kopesa biso. (Nz. 141:5) Lisusu, komikitisa etindaka biso tótyela Yehova motema ntango tozali kokokisa mokumba nyonso oyo bapesi biso na lisangá. (1 Pet. 4:11) Biso mpe tondimi lokola Davidi ete kolonga eutaka na makoki ya moto te, kasi nde na lipamboli ya Nzambe.—1 Sam. 17:37.
5 Liboso ya Nzambe na biso: Koleka nyonso, tosengeli ‘komikitisa na nse ya lobɔkɔ ya nguya ya Nzambe.’ (1 Pet. 5:6) Soki tozali kobundana na mikakatano, tozali ntango mosusu na mposa makasi ya libɔndisi oyo Bokonzi ya Nzambe ekopesa. Kasi, komikitisa ekosalisa biso tózala na motema molai ya kozela Yehova akokisa bilaka na ye na ntango oyo ye aponi. (Yak. 5:7-11) Se ndenge Yobo moto ya sembo amonisaki yango, mposa na biso ya libosoliboso ezali ete “nkombo ya Yehova elanda kopambolama.”—Yobo 1:21, NW.
6 Mosakoli Danyele ‘amikitisaki liboso ya Nzambe na ye’ mpe Yehova apambolaki ye na ndenge andimaki ye mpe apesaki ye mikumba mosusu mingi ya malamu. (Dan. 10:11, 12) Tiká ete biso mpe tólata komikitisa mpamba te toyebi ete “komikitisa mpe kobanga Yehova ezali nzela ya bozwi mpe lokumu mpe bomoi.”—Mas. 22:4, NW.