Nkomá ya batángi

Kolekisa ntango malamu Nandimi ete ezali na mitindo mingi ya malamu ya kosepela mpo na bilenge, lokola yango elobelami na lisoló “Mituna bilenge batunaka . . . Lolenge nini nakoki kolekisa ntango malamu?” (22 Sɛtɛ́mbɛ 1996, ebimeli ya Lifalansé) Tokoki kokende kotala ndako oyo babombaka biloko ya kala (musée) to mpe lopango ya banyama to mpe kosala mwa pikiniki ata mpe koyangana esika moko. Baoyo kati na biso bazali mpenza na mosolo te bakoki mpe kosepela na kobyangáká bilenge mosusu na ndako na bango mpo na kosakana to mpo na kolya mwa bilei.

V. A., Brésil

Nkɔndɔkɔ moko elombe Nasengeli koyebisa bino ete nasepelaki mingi na lisoló “Bolingo ya mama moko mpo na bana na ye,” oyo ebimaki na Lamuká! ya Yanuáli-Mársi 1997. Nafandi na ekólo oyo makambo ya kosangisa nzoto ekómi lokola lisɛki mpe epai bilenge basi bakakatanaka te mpo na kosopa zemi. Nakanisi ete nkɔndɔkɔ mama Scarlett azali ndakisa malamu ya mama oyo amibanzabanzaka mpo na bana na ye.

E. B., Mali

Nasepelaki mingi na kotánga lisoló ya Scarlett, oyo abangaki te kobikisa bana na ye na garaje oyo ezikaki. Akamwisaki ngai mpamba te azali nkɔndɔkɔ oyo na ndakisa na yango bato ebele bakoki koyekola makambo mingi. Nakanisi ete ezali malamu mpenza kobimisa masoló motindo wana.

D. W., Allemagne

Lisoló na bino na ntina na Scarlett mpe bana na ye esimbaki motema mpe ezalaki na nguya mpenza mpo ete ezalaki kokweisa kosopa zemi, ezalaki lolenge ya lisoló oyo natángá naino liboso te.

J. G., États-Unis

Nakokaki bobele kobimisa mpisoli ntango natángaki lisoló yango. Nalingaka nyama ya lolenge nyonso mpe nasepelaka na mateya oyo Yehova ateyaka biso na nzela na bango. Epesaka ngai mpasi na motema na komona ete bato ya “mayele” bamibanzabanzaka te mpe batyelaka bana na bango likebi te lolenge nkɔndɔkɔ wana etyelaki bana na yango.

C. C. États-Unis

Acouphène Matɔ́ndi mingi mpo na lisoló “Acouphène​—Makɛlɛlɛ oyo esengeli koyikela yango mpiko?” (22 Sɛtɛ́mbɛ 1996, ebimeli ya Lifalansé) Nazali kotungisama na yango esili koleka mibu motoba. Nabangaki ete nazalaki na maladi moko oyo ekoki kobikisama te mpamba te monganga moko te azalaki na likoki ya koyebisa ngai na bosikisiki nini ezalaki kotungisa ngai. Na kotángáká lisoló na bino, yango ekitisaki motema na ngai. Sikawa nazali koyikela yango mpiko wana nazali kozela mokili ya sika, epai kuna moto moko te akozala na maladi.​—Yisaya 33:24.

C. F., Italie

Nabandaki kotungisama na mokakatano yango esili koleka pene na mbula zomi. Ezalaki mpenza likambo ya mpasi na kokanisa ete nasengelaki koyoka makɛlɛlɛ yango ntango nyonso! Kasi lelo oyo, nayekoli koyikela makɛlɛlɛ ya litoi na ngai mpiko. Nazali kozela na motema likoló ntango oyo na lisalisi ya Yehova, nakoyoka lisusu MALAMU!

J. S., République Tchèque

Nazali kotungisama na Acouphène ekómi sikawa mbula mibale na ndambo, mpe nasali baekzamɛ́ ya monganga ndenge na ndenge, bakisá mpe oyo ebéngami CT ya bɔɔngɔ́. Bobangi mpe nkanda ezalaki mikakatano oyo nazalaki kokutana na yango na bomoi na ngai. Na kotángáká lisoló na bino, nazali koyikela yango mpiko.

M. G. T. F., Sri Lanka

Mobali na ngai atungisamaka na Acouphène. Anyokwamaka mpe mingi na makanisi. Makambo oyo malobelamaki na lisoló yango masalisaki ngai ete nazalaka na boboto mingi epai na ye. Na bantango mosusu makɛlɛlɛ yango ebulunganisaka ye mingi, mpe nasengeli koyambola ete nazalaki mpenza na boboto te na ndenge esengeli. Nasepelaki mingi na lolenge ya bosikisiki oyo lisoló yango ekomamaki. Nandimisami ete lisoló yango likosalisa bato mingi oyo babalani na bango basengeli kososola motungisi yango.

L. F., États-Unis