Nkoma ya batángi

Bilembeteli ya bozalisi Nasali elongo na bato ya siansi na boumeli ya bambula ebele, mpe nazalaki ntango nyonso koyoka nkanda ntango bazalaki koloba ete kondima ete biloko oyo ezali na molɔ́ngɔ́ ezalisamaki ezali mpenza bozoba. Masolo “Kosuka te kaka na oyo miso na yo ekoki komona” (22 Augusto 2000, ebimeli ya Lifalanse) epesi mpenza biyano na ntembe ya ndenge wana. Na mwa nkasa, bopesi bilembeteli oyo ezali komonisa polele ete biloko oyo ezali na molɔ́ngɔ́ ezalisamaki. Ebongi kopesa Lamuká! longonya mpo na masolo na yango kitoko mpe mpo na bolukiluki oyo bazali kosala mpo na kobimisa masolo yango.

B. E., Nouvelle-Zélande

Nayekolaka Biblia na Batatoli ya Yehova, mpe banda natalelaki makambo etali baatomɛ, baselile mpe ADN, kondima na ngai epai ya Nzambe ekómi lisusu makasi.

T. K., Japon

Sikawa nakoki kolimbola mpo na nini minama ebimaka, mpo na nini matiti ezalaka langi ya pondu, mpe atomɛ ezali nini! Atako Lamuká! ezali zulunalo ya siansi te, ekomaka makambo ya siansi oyo ezali kondimisa ete Mozalisi azali.

M. F., États-Unis

Kobika kozanga kozongisama makila Lisolo “Likambo oyo esɛngi kosalela lisosoli” (22 Augusto 2000, ebimeli ya Lifalanse) esimbaki mpenza motema na ngai. Nakutanaki na likambo ya ndenge wana ntango ekzamɛ ya monganga emonisaki ete nazali na maladi babengi leucémie aiguë promyélocytaire. Makambo oyo ekómelaki ngai nsima ekeseni mpenza te na oyo ekómelaki Darlene. Bayebisaki ngai ete natikali kaka na mwa mikolo moke ya bomoi. Banda bayebisá ngai bongo eleki sikoyo mbula misato.

A. B., Allemagne

Kotungisama mpo na kondima kosangisa nzoto Nalingi komonisa botɔndi na ngai mpo na lisolo “Mituna oyo bilenge batunaka . . . Ezaleli nini nakoki kozala na yango soki bazali kotungisa ngai mpo nandima kosangisa nzoto?” (22 Augusto 2000, ebimeli ya Lifalanse) Na eteyelo, bapesaki ngai ebele ya bankombo mpo nazalaki koboya komipesa na etamboli ya mbindo. Ntango nasilisaki kelasi ya ntei, nakanisaki ete mitungisi yango ekosila, kasi bana basi mosusu balobaki na ngai makambo oyo ezali kokende kaka na nzela wana. Lokola namonisaki polele ete nazali moklisto, yango esalisaki ngai naboya masɛnginya ya ndenge wana. Matɔndi mingi mpo na bilei ya elimo oyo bozali kopesa biso.

H. C., Zambie

Lisolo yango esalisaki ngai mingi. Mwana mobali moko ya kelasi na biso atikaka te kotala ngai. Sikawa nayebi mpenza nini nasengeli kosala.

H. K., États-Unis

Eyaki mpenza na ntango moko malamu! Na esika oyo nasalaka, bazali kotungisa ngai mbala na mbala mpo nandima kosangisa nzoto. Likambo yango elekelaki ngai. Kaka na ntango oyo nalingaki komitika, lisolo yango ebimaki. Sikawa nayebi ndenge ya kozala na bato na esika ya mosala.

L. T., États-Unis

Engumba moko ya Russie Banda kompanyi na ngai ekómá kosala mombongo na mikili mosusu, nasepelaka kotánga masolo etali mikili ndenge na ndenge. Moninga moko ya mosala azali na mwana na ye ya mobali na Russie, yango wana nayebisaki ye lisolo ya “Mobembo na engumba Novgorod” (22 Augusto 2000, ebimeli ya Lifalanse) Asepelaki mingi kozwa yango, mpe nsima ya kotánga yango asɛngaki ngai nimero mosusu ya Lamuká! Napesaki ye nimero ya 22 Mai 2000, oyo ezalaki na lisolo “Montre moko ya monene oyo ekokani na mosusu te.” Nsukansuka andimaki kosala abonema ya Lamuká! Matɔndi mingi na ndenge bozali kobimisa masolo ya ntina ndenge wana.

S. O., États-Unis

Goulache ya maimai? Nalingaki komeka kolamba elubu babengi goulache ya Hongrie oyo bolobeli na lisolo “Elubu oyo eutaki na mokili ya molunge.” (8 Sɛtɛmbɛ 2000, ebimeli ya Lifalanse) Nabandaki malamu tii na esika oyo bolobaki ete esengeli kobakisa litrɛ mibale ya mai. Goulache na ngai ekómaki maimai na esika ete ezala supu ya kilo ndenge bolakisaki na fɔtɔ. Ezali ete nakangi malamu te ndenge ya kosala elubu yango to boni?

L. P., Canada

Te, tosalaki libunga na ndenge tobengaki yango supu ya kilo, mpamba te elubu yango ezali mpenza supu ya ‘goulache’ ya Hongrie. Babuku mosusu ya makambo ya kolamba esɛngaka kotya mai mingi te. Kasi, likambo ya esengo ezali ete batángi mosusu bamekaki kosala elubu yango mpe bakomeli biso mpo na komonisa ndenge basepelaki na yango!—BAKOMI.