Mituna oyo bilenge batunaka . . .
Mpo na nini nasengeli kotángaka?
“Nakokaka kotánga mingi te. Nalingaka nde kotala televizyo.” — Margarita, mbula 13, Russie.
“Soki basɛngi ngai natánga buku moko to nakende kobɛta bale, nakopona kobɛta bale.” — Oscar, mbula 19, États-Unis.
LOKOLA ozwi likoki ya kotánga maloba oyo, na ntembe te omoni ete kotánga ezali na ntina mingi. Atako bongo, mbala mosusu omonaka ete kotánga buku moko, ata kutu lisolo moko ya zulunalo, ezali lokola komɛla nkisi: Oyebi ete ekosalisa yo, kasi olingi komɛla yango te.
Bakomi ya Lamuká! batunaki bilenge ya bikólo 11 báloba mikakatano mpe matomba oyo bazwaka na kotánga. Yoká makambo balobaki.
Mpo na nini okokaka kotánga te?
“Nazalaka mpenza na ntango ya kotánga te.”—Semsihan, mbula 19, Allemagne.
“Kotánga ezali mosala monene. Nakanisi ete nazali mwa gɔigɔi.”—Ezekiel, mbula 19, Philippines.
“Nalingaka te bátinda ngai na makasi natánga masolo oyo elɛmbisaka.”—Christian, mbula 15, Angleterre.
“Soki buku ezali moke, nakoki kondima kotánga yango. Kasi, soki ezali monene, nalɛmbaka liboso kutu nabanda kotánga.”—Eriko, mbula 18, Japon.
“Makambo mingi etindaka makanisi na ngai epai na epai. Nakokaka te kotya makanisi na ngai nyonso esika moko.”—Francisco, mbula 13, Afrika ya Sudi.
Balendisaka bilenge baklisto bátángaka Biblia. (Nzembo 1:1-3) Okokaka kotánga yango te? Mpo na nini okokaka te?
“Biblia ezali monene mingi! Nakanisi ete ata soki natángi yango bomoi na ngai mobimba, nakosilisa yango te!”—Anna, mbula 13, Russie.
“Biteni mosusu ya Biblia ezali makasi, mpe esepelisaka mpenza te.”—Jezreel, mbula 11, Inde.
“Nakokaka te kotánga Biblia mokolo na mokolo mpo nazali na programɛ ya malamu te.”—Elsa, mbula 19, Angleterre.
“Ezalaka mpasi mpo na ngai mpamba te misala ya ndako mpe badevuare ya kelasi ezwaka ngai ntango mingi.”—Zurisadai, mbula 14, Mexique.
“Nakokaka kotánga Biblia te mpo nalingaka kosakana mingi.”—Sho, mbula 14, Japon.
Emonani ete kotánga ekoki kozala mpasi. Kasi, ebongi mpenza kosala milende mpo na kotánga? Matomba nini ozwi na kotánga?
“Kotánga esalisi ngai nayeba makambo mingi, mpe nayeba komityela motema ntango nazali kosolola na bato.”—Monisha, mbula 14, Inde.
“Kotánga esepelisaka ngai mpe esalisaka ngai nabosana mitungisi na ngai.”—Alison, mbula 17, Australie.
“Kotánga esalisaka ngai nayeba bisika oyo nakoki kokóma te.”—Duane, mbula 19, Afrika ya Sudi.
“Kotánga esalisaka ngai nayeba ete makambo oyo bayebisi ngai ezali mpenza solo, na esika ya kondima kaka oyo basusu balobi.”—Abihú, mbula 16, Mexique.
Nini esalisi yo osepela na kotánga?
“Banda bomwana, baboti na ngai balendisaka ngai natángaka na mongongo makasi.”—Tanya, mbula 18, Inde.
“Baboti na ngai balendisaki ngai nakanisaka ntango nazali kotánga, nalukaka komona na makanisi makambo oyo nazali kotánga.”—Daniel, mbula 18, Angleterre.
“Tata ayebisaki ngai nabanda kotánga liboso mikanda ya Biblia oyo nalingaka mingi, na ndakisa mokanda ya Nzembo mpe ya Masese. Lelo oyo, nakóma kosepela kotánga Biblia, namonaka yango lisusu etumbu te.”—Charene, mbula 16, Afrika ya Sudi.
“Ntango nakokisaki mbula minei, baboti na ngai bapesaki ngai mesa ná armware oyo batyaki mikanda nyonso oyo basombelá ngai banda nabotamaki.”—Airi, mbula 14, Japon.
Mpo na nini okanisi ete kotánga Biblia ezali na ntina?
“Bato bandimaka ebele ya makambo ya lokuta oyo bakanisaka eutá na Biblia. Yango wana, ezali malamu kotánga Biblia yo moko mpo na koyeba soki makambo yango ezali solo.” (Misala 17:11)—Matthew, mbula 15, États-Unis.
“Kotánga Biblia etindaka moto akanisa mingi. Kasi, yango esalisi ngai nazangaka maloba te ntango nazali koyebisa basusu makambo oyo nandimaka.” (1 Timote 4:13)— Jane, mbula 19, Angleterre.
“Ntango nazali kotánga Biblia, namonaka lokola Yehova ye moko nde azali koloba na ngai. Ntango mosusu, yango esimbaka mpenza motema na ngai.” (Baebele 4:12)—Obadiah, mbula 15, Inde.
“Nasalaka makasi nasepelaka na kotánga Biblia mpamba te yango eyebisaka ngai oyo Yehova akanisaka mpo na ngai mpe epesaka ngai toli ya malamu.” (Yisaya 48:17, 18)—Viktoriya, mbula 14, Russie.
Ntango nini otángaka Biblia mpe mikanda oyo elimbolaka yango?
“Nazali na programɛ. Eloko ya liboso oyo nasalaka soki nalamuki na ntɔngɔ, ezali kotánga mokapo moko ya Biblia.”—Lais, mbula 17, Brésil.
“Natángaka Biblia mpe mikanda mosusu oyo elimbolaka Biblia na engbunduka ntango nazali kokende kelasi. Ekoki sikoyo mbula minei banda nazali kosala bongo.”—Taichi, mbula 19, Japon.
“Natángaka Biblia mwa moke na butu nyonso liboso nalala.”—Maria, mbula 15, Russie.
“Natángaka nkasa minei ya Linɔ́ngi ya Mosɛnzɛli to Lamuká! mokolo na mokolo. Yango esalisaka ngai nasilisa zulunalo yango nyonso liboso mosusu eya.”—Eriko, mbula 18, Japon.
“Natángaka Biblia ntɔngɔ nyonso liboso nakende kelasi.”— James, mbula 17, Angleterre.
Ndenge maloba ya ebandeli ya paragrafe ya liboso emonisi yango, kotánga ekoki kosalisa yo oyeba komityela motema mpe oyeba makambo mingi. Lisusu, kotánga Biblia mpe mikanda oyo elimbolaka Biblia, na ndakisa zulunalo oyo, ekosalisa yo ‘opusana penepene na Nzambe.’ (Yakobo 4:8) Na bongo, ata soki okokaka kotánga te, kolɛmba te!
KANISÁ MAKAMBO OYO
◼ Mpo na nini osengeli kotángaka Liloba ya Nzambe?
◼ Ndenge nini okoki kozwa ntango ya kotánga Biblia mpe mikanda oyo elimbolaka yango?—Baefese 5:15, 16.
[Etanda na lokasa 25]
LUKÁ BOYOKANI OYO EZALI KATI NA MAKAMBO
Luká koyeba boyokani nini ezali kati na makambo oyo ozali kotánga mpe oyo oyebaka, oyo etali yo mpe biloko oyo ezali zingazinga na yo. Omituna boye:
◼ Makambo oyo otángi Makambo to mikakatano oyo balobeli awa ekokani na oyo natángaki na babuku, mikanda mpe masolo mosusu? Bato oyo balobeli awa, makambo na bango mosusu ekokani na oyo ya bato mosusu oyo balobeli na mikanda oyo natángaki?
◼ Makambo oyo etali yo Makambo oyo natángi ezali na boyokani nini na makambo oyo nasalaka, na mimeseno na ngai, mpe makambo oyo etungisaka ngai? Ekoki kosalisa ngai nasilisa mikakatano oyo nazali na yango to nabongisa bomoi na ngai?
◼ Biloko oyo ezali zingazinga na yo Makambo oyo natángi eteyi ngai nini mpo na biloko oyo Nzambe akelá, mpo na mai mpe mopɛpɛ, mpo na mimeseno ya bato, to mpo na mikakatano oyo bato bazali na yango? Makambo oyo eteyi ngai nini mpo na Mozalisi?