Mituna oyo bilenge batunaka
Mpo na nini nabangaka koyebisa basusu bindimeli na ngai?
“Nazalaki na mabaku mingi ya kopesa litatoli na kelasi. Kasi nazalaki kolekisa yango kaka boye.”—Kaleb.a
“Molakisi na biso asɛngaki bana-kelasi bápesa makanisi na bango mpo na liteya ya evolisyo. Nayebaki ete yango ezali libaku malamu ya kolobela bindimeli na ngai. Kasi, nayokaki nsɔni mpe nalobaki eloko te. Na nsima, nayokaki mabe.”—Jasmine.
SOKI ozali elenge mokristo, ntango mosusu yo mpe okutaná na likambo oyo Kaleb ná Jasmine bakutanaki na yango. Lokola bango, ekoki kozala ete olingaka Biblia-mateya ya solo oyo oyekolaka mpe olingaka koyebisa yango epai ya basusu. Kasi, obangaka. Atako bongo, okoki kokóma na mpiko. Ndenge nini? Taleláká makambo oyo mbula na mbula ntango ozali komibongisa mpo na mbula ya sika ya kelasi:
1. Yebá makambo oyo ebangisaka yo. Ntango ozali kokanisa kopesa litatoli, mbala mingi ezalaka mpasi te kokanisa mikakatano oyo okoki kokutana na yango! Nzokande, ntango mosusu, kobanga na yo ekoki kokita soki okomi makambo yango oyo ebangisaka yo.
Silisá fraze oyo.
◼ Soki napesi litatoli na kelasi, likambo oyo ekoki kosalema:
․․․․․
Motema na yo ekokita soki oyebi ete bilenge bakristo mosusu babangaka mpe lokola yo. Na ndakisa, Christopher oyo azali na mbula 14, alobi boye: “Nabangaka ete baninga ya kelasi bakosɛka ngai mpe bakoyebisa bato nyonso ete nazalaka lokola tata moko boye.” Kaleb, oyo tolobelaki na ebandeli ya lisolo, alobi boye: “Nazalaki kobanga ete bakotuna ngai motuna moko oyo nakokoka koyanola te.”
2. Ndimá mokakatano yango. Obangaka kaka mpamba? Te. Ashley, alobi boye: “Bana mosusu bamonisaka lokola basepeli koyoka mateya ya Biblia, kasi na nsima bakómaka kosɛka mpe kotyola ngai na miso ya baninga mosusu.” Nicole, oyo azali na mbula 17, akutanaki mpe na likambo yango: “Elenge mobali moko atalaki vɛrsɛ moko na Biblia na ngai mpe na Biblia na ye, mpe ntango amonaki ete maloba na yango ekeseni, alobaki ete Biblia na ngai ezali ndenge mosusu. Esalaki ngai mpasi mingi! Nazangaki maloba.”b
Makambo ya ndenge wana ekoki kobangisa mpenza! Kasi, na esika okima yango, talelá yango lokola makambo oyo mokristo asengeli kokutana na yango. (2 Timote 3:12) Matthew, oyo azali na mbula 13, alobi boye: “Yesu alobaki ete bakonyokola bayekoli na ye, yango wana tosengeli koluka te ete moto nyonso asepela na biso to asepela na bindimeli na biso.”—Yoane 15:20.
3. Kanisá matomba oyo okozwa. Likambo ya mabe oyo tokutani na yango ekoki komemela biso matomba? Amber, oyo azali na mbula 21 andimi ete ezali bongo. Alobi boye: “Ezalaka mpasi kopesa litatoli epai ya bato oyo bamemyaka Biblia te, kasi yango ekosalisa yo oyeba malamu soki ondimaka mpenza Biblia.”—Baroma 12:2.
Talelá lisusu likambo oyo okanisaki na eteni 1. Kanisá matomba ata mibale oyo okoki kozwa na likambo yango, mpe komá yango awa na nse.
1 ․․․․․
2 ․․․․․
Mwa likanisi: Ndenge nini koyebisa baninga bindimeli na yo ekoki kosala ete bátumolaka yo mingi te? Ndenge nini kosala yango ekosalisa yo olongola kobanga? Yango ekotinda yo okóma kotalela Yehova ndenge nini? Mpe ye akokóma kotalela yo ndenge nini?—Masese 23:15.
4. Omibongisa. Masese 15:28 elobi boye: “Motema ya moyengebene emanyolaka mpo na koyanola.” Nsima ya komanyola na makambo oyo okoloba, kanisá mpe mituna oyo bakoki kotuna yo. Luká masolo yango mpe bongisá biyano oyo omoni ete okokoka koyanola.—Talá etanda “Bongisá eyano na yo,” na lokasa 15.
5. Bandá lisolo. Ntango omibongisi mpo na kopesa litatoli, okobanda ndenge nini? Okoki kopona. Kolobela bindimeli na yo ezali lokola kobɛta mai: Bato mosusu bakitaka malɛmbɛmalɛmbɛ tii na mai, mpe bamosusu bamibwakaka mbala moko na mai. Ndenge moko mpe, na esika obanda mbala moko na lisolo ya Biblia, okoki kobanda na lisolo mosusu mpe mokemoke kotala soki moto yango azali kosepela na lisolo. Kasi, soki omoni ete ozali kobanga mingi ete makambo ebeba, okoki kopona ‘komibwaka mbala moko na mai.’ (Luka 12:11, 12) Andrew, oyo azali na mbula 17 alobi boye: “Kokanisa ndenge ya kopesa litatoli ezalaka mpasi mpo na ngai koleka kosala yango. Ntango nabandi lisolo, namonaka ete ezali pɛtɛɛ koleka ndenge nazalaki kokanisa.”c
6. Salelá bwanya. Kaka ndenge okomibwaka te na mai oyo ezali mozindo te, koluka te bótyana ntembe na makambo ezangi ntina. Kobosana te ete ezali na ntango mpo na koloba mpe ntango mpo na kofanda nyɛɛ. (Mosakoli 3:1, 7) Na bantango mosusu, ata Yesu aboyaki koyanola na mituna mosusu. (Matai 26:62, 63) Kobosana mpe te toli oyo: “Moto ya ekɛngɛ nde moto oyo amoni likama mpe amibombi, kasi bato oyo bazangi boyebi baleki kaka mpe basengeli kozwa mpasi.”—Masese 22:3.
Na yango, soki omoni ete moto oyo ozali kosolola na ye akómi kobimisa ntembe, fandá na yo nyɛɛ; na maloba mosusu, boyá ‘koleka kaka.’ Okoki nde kopesa eyano ya mokuse mpe ya bwanya. Na ndakisa, soki moninga moko ya kelasi alobi na yo boye: ‘Mpo na nini omɛlaka makaya te?’ okoki koloba kaka ete ‘mpo nalingi kobebisa nzoto na ngai te!’ Na kotalela eyano na ye, okoki kotala soki okopesa ye bandimbola mosusu ya Biblia to te.
Makambo oyo ezali awa likoló ekoki kosalisa yo ‘omibongisaka ntango nyonso mpo na kolobela’ bindimeli na yo. (1 Petro 3:15) Kasi, komibongisa elimboli te ete okozala na kobanga te. Alana, oyo azali na mbula 18 alobi boye: “Ntango opesi litatoli atako batyoli yo, okomona ete osali likambo moko ya ntina—olongi kobanga na yo mpe opesi litatoli atako oyebaki ete ekosimba te. Kasi, soki esimbi, okozala mpenza na esengo na motema! Okosepela mpo ozalaki na mpiko ya kopesa litatoli.”
Okoki kokuta masolo mingi ya “mituna oyo bilenge batunaka” na internet na esika oyo www.watchtower.org/ypf
[Maloba na nse ya lokasa]
a Bankombo mosusu ezali ya bango te.
b Mabongoli nyonso ya Biblia esalelaka maloba ndenge moko te. Nzokande, Babiblia mosusu elandaka mpenza makambo ndenge ezalaki na minɔkɔ oyo Biblia ekomamaki.
c Talá etanda “Ndenge ya kobanda lisolo,” na lokasa 16.
MITUNA YA KOMANYOLA
◼ Ekoki kozala ete elenge moko na kelasi na bino azali kokanisa boye?
‘Nayebi ete ozali Motatoli ya Yehova. Okoki kokanisa ete nakotyola yo, nzokande namemyaka yo mingi. Ndenge nini ozali kaka na kimya na mokili oyo etondi na mikakatano? Nazali kobanga. Etumba mosusu ekobima? Libala ya baboti na ngai ekokufa? Nakozonga malamu na ndako lelo ntango nakouta kelasi, kozanga ete bábɛta ngai masasi to bátya ngai mbeli? Nazali na mituna mingi, kasi emonani ete yo ozali na bomoi ya malamu mpe ezali na ntina. Ezali mpo na lingomba na yo? Nakosepela kolobela yango, kasi nazali kobanga. Okosepela kobanda lisolo na ngai?’
[Etanda/Bililingi na lokasa 16]
OYO BANINGA NA YO BALOBAKA
“Bana mosusu basɛkaka ngai ntango nazali kopesa litatoli. Kasi, mbala mingi batikaka soki bamoni ete matumoli na bango ezali kosala ngai eloko te.”—Francesca, Luxembourg.
“Soki ozali koyebisa bato te ete ozali mokristo, okobosana soki ozali nani mpe okobanda kosala makambo lokola bato nyonso. Osengeli te kolanda bato; osengeli kokangama na bizaleli na yo ya malamu.”—Samantha, États-Unis.
“Ntango nazalaki elenge, nazalaki kolinga te kokesana na bilenge mosusu. Kasi, nakómaki komona ndenge mateya ya solo ebongisaka bomoi ya bato. Yango elendisaki ngai mpe etindaki ngai namona motuya ya mateya ya solo.”—Jason, Nouvelle-Zélande.
[Etanda na lokasa 16]
NDENGE YA KOBANDA LISOLO
◼ “Ozali kokana kosala nini na eleko ya konje?” [Nsima ya koyoka eyano, lobelá makambo oyo ozali kokana kosala, na ndakisa kokende na liyangani to mpe kosala mingi na mosala ya kosakola.]
◼ Lobelá nsango moko, mpe na nsima tuná boye: “Oyokaki nsango yango? Okanisi nini mpo na yango?”
◼ “Okanisi ete mikakatano ya mbongo oyo ezali na mokili [to mokakatano mosusu] ekosila? [Tiká ye apesa eyano.] Mpo na nini okanisi bongo?”
◼ “Osambelaka?”
◼ “Okanisi ete bomoi na yo ekozala ndenge nini nsima ya mbula mitano?” [Nsima ya koyoka eyano, yebisá ye mikano na yo.]
[Etanda na lokasa 15]
(Mpo na komona yango, talá mokanda)
Bongisá eyano na yo
Katá etanda oyo mpe bombá yango!
Likanisi: Lobelá etanda oyo na baboti mpe baninga na yo. Tondisá etanda yango. Na nsima, kanisá mituna mosusu oyo baninga ya kelasi bakoki kotuna yo.
Etamboli
Motuna
Okanisaka nini na likambo ya kosangisa nzoto mibali na mibali mpe basi na basi?
Eyano
Nayinaka bango te, kasi naboyaka nde etamboli na bango.
Motuna mosusu
Yango ezali te kokanisela basusu mabe?
Luká eyano na mikanda
1 Bakorinti 6:9, 10; Mituna oyo bilenge batunaka—Biyano bibongi, Volimi 2-F, mokapo 28d
Eyano
Te, mpo naboyaka lolenge nyonso ya pite—kosangisa nzoto basi na basi mpe mibali na mibali, mpe bongo na bongo.
Moto na yo
Motuna
Mpo na nini ozalaka na mwa moto te?
Eyano
Nazwá ekateli ya kozela tii ntango nakokola mpo nalinga.
Motuna mosusu
Ezali mpo na lingomba na yo?
Luká eyano na mikanda
Loyembo ya Salomo 8:4; buku Mituna oyo bilenge batunaka, Volimi 2-F, mokapo 1.
Eyano
Ɛɛ. Tokangamaka kaka na moto oyo tokobalana na ye, kasi ngai nakoki naino te mpo na kobala!
Politiki
Motuna
Mpo na nini oboyaka kopesa bendele losako?
Eyano
Namemyaka ekólo epai nafandaka, kasi nasambelaka yango te.
Motuna mosusu
Okoki kobunda te mpo na ekólo na yo?
Luká eyano na mikanda
Yisaya 2:4; Yoane 13:35; buku Biblia eteyaka mpenza nini? nkasa 148-151.e
Eyano
Te. Ebele ya Batatoli bakondima mpe te kobundisa ekólo oyo.
Makila
Motuna
Mpo na nini bolingaka te bázongisa bino makila?
Eyano
Nandimaka bázongisa ngai mai to nkisi mosusu oyo ekoki komatisa ngai makila kozanga ete nazwa SIDA. Kasi, Biblia elobi ete tóboya makila, yango wana naboyaka bázongisa ngai makila.
Motuna mosusu
Kasi soki ezali mpo na kobikisa bomoi na yo, Nzambe akolimbisa yo te?
Luká eyano na mikanda
Misala 5:28, 29; Baebre 11:6; Biblia eteyaka, nkasa 129-131.
Eyano
Poná
Motuna
Songolo azali mpe na lingomba na bino, mpe asalaki boye. Mpo na nini yo osalaka yango te?
Eyano
Bateyaka biso mitinda ya Nzambe, kasi batindaka biso na makasi te tósalela yango! Mokomoko asengeli kozwa ekateli.
Motuna mosusu
Elingi koloba ete na lingomba na bino moto na moto asalaka oyo alingi?
Luká eyano na mikanda
Eyano
Bozalisi
Motuna
Mpo na nini bondimaka liteya ya evolisyo te?
Motuna
Mpo na nini nasengeli kondima yango? Bato ya siansi bango moko kutu bayokanaka te na likambo yango; bango kutu nde bato ya mayele!
Motuna mosusu
Luká eyano na mikanda
Eyano
[Maloba na nse ya lokasa]
d Ebimisami na Batatoli ya Yehova.
e Ebimisami na Batatoli ya Yehova.
[Elilingi na lokasa 16]
Kopesa litatoli ezali lokola kobɛta mai. Okoki kopona kobanda mokemoke—to komibwaka!