Toli ya bwanya mpo na motema mpe nzoto

“Motema ya kimya ezali bomoi ya nzoto ya mosuni.”​—MASESE 14:30.

“Motema oyo ezali na esengo esalaka malamu lokola eloko oyo ebikisaka.”​—MASESE 17:22.

● Salomo, mokonzi ya Yisraele, nde alobaki maloba wana ya pɛtɛɛ mpe ya ntina mingi, esali sikoyo mbula soki 3 000.a Kasi maloba yango ezali mpenza solo? Minganga na mikolo na biso balobi nini?

Zulunalo moko (Journal of the American College of Cardiology) elobelaki bato oyo bazalaka na motema kimya mpe baoyo basilikaka; elobi boye: “Makambo oyo minganga bayekoli mikolo oyo emonisi ete kosilika mpambampamba mpe koyina bato ekoki kopesa moto maladi ya motema.” Na yango, zulunalo yango ebakisi ete: “Mpo na kolonga kopekisa mpe kosilisa maladi yango ya motema, ekoki mpe kosɛnga . . . moto asuka kaka na kozwa nkisi ya monganga te, kasi mpe ayeba kopekisa nkanda na ye mpe atika koyina bato.” Na mokuse, motema ya kimya esalisaka moto azala nzoto kolɔngɔnɔ, kaka ndenge Biblia elobi.

Kozala na motema ya esengo mpe epesaka matomba ya malamu ndenge wana. Monganga Derek Cox, oyo alandelaka mpe makambo ya kolɔngɔnɔ ya nzoto na ekólo Écosse, alobaki na zulunalo ya BBC ete: “Soki ozali na esengo, okobɛlabɛlaka mingi te lokola bato oyo bazalaka na esengo te.” Zulunalo yango ebakisi boye: “Bato oyo bazalaka na esengo mingi babatelamaka mpe na bamaladi mingi, na ndakisa maladi ya motema ya bɔɔngɔ.”

Mpo na nini Salomo, moto ya bwanya mpe bato mosusu oyo bakomaki Biblia, bayebaki makambo mingi banda kala? Eyano ezali polele. “Nzambe akobaki kopesa Salomo bwanya mpe mayele mingi mpenza.” (1 Bakonzi 4:29) Longola yango, Salomo akomaki makambo na bwanya na elobeli ya polele mpo bato nyonso bákanga ntina na yango, kozanga báfuta mbongo.

Mpo na nini te kozwa momeseno ya kotánga Biblia mokolo na mokolo? Ndenge bamilio ya bato basili komona yango, yo mpe okozala na esengo mingi “ntango bwanya ekokɔta na motema na yo mpe boyebi ekokóma elɛngi na molimo na yo, likoki ya kokanisa ekokɛngɛla yo, [mpe] bososoli ekobatela yo.” (Masese 2:10, 11) Likambo yango ezali kokitisa motema, boye te?

[Maloba na nse ya lokasa]