Biblia​—Ekomamá mpenza “na litambwisi ya elimo ya Nzambe”?

ONDIMAKA ete Biblia eutá epai ya Nzambe? To okanisaka ete ezali kaka buku moko oyo ezali na makanisi ya bato?

Banda kala, ata bato oyo bamibengaka bakristo bayokanaka te na likambo wana. Na ndakisa, na 2014, ankɛtɛ moko oyo esalemaki na États-Unis emonisaki ete bandimi mingi ya mangomba ya bokristo bandimaka ete “tókende epai tózanga epai, Biblia ezali na boyokani na Nzambe.” Longolá yango, na kati ya bato oyo batunaki, soki tozwi bato 5, moko akoloba ete Biblia ezali buku “ya masapo mpe masolo ya kala, ya istware, mpe ezali na mitinda oyo bato bakomá.” Makanisi wana oyo ekeseni ebendi likebi na biso na ndimbola ya maloba: “na litambwisi ya elimo.”​—2 Timote 3:16.

MALOBA “NA LITAMBWISI YA ELIMO” ELIMBOLI NINI?

Biblia ezali na mikanda mikemike 66, oyo ekomamaki na bato soki 40, na boumeli ya bambula soki 1 600. Kasi, soki bato nde bakomaki Biblia, mpo na nini koloba ete ekomami na “litambwisi ya elimo ya Nzambe”? Na mokuse, maloba “na litambwisi ya elimo ya Nzambe” elimboli ete makambo oyo ezali na Biblia eutá epai ya Nzambe. Biblia emonisi likambo yango na maloba oyo: “Bato balobaki makambo oyo euti na Nzambe ndenge elimo santu ezalaki kotinda bango.” (2 Petro 1:21) Na maloba mosusu, Nzambe asalelaki elimo santu, nguya na ye oyo emonanaka te, mpo na koyebisa bato oyo bakomaki Biblia nsango na ye. Tokoki kokokanisa likambo yango na patrɔ moko oyo azali koyebisa sɛkrɛtɛrɛ na ye makambo ya kokoma na mokanda. Sɛkrɛtɛrɛ azali nkolo mokanda yango te; nkolo mokanda ezali nde patrɔ oyo azali koyebisa ye makambo ya kokoma.

Bato mosusu oyo bakomaki Biblia bayokaki nsango ya Nzambe na matoi na bango na nzela ya anzelu. Basusu bazwaki bimonaneli oyo eutaki epai ya Nzambe. Na mabaku mosusu, Nzambe ayebisaki bato nsango na ye na nzela ya bandɔtɔ. Atako mbala mosusu Nzambe azalaki kotika bato oyo bakomaki Biblia bákoma nsango na ye na maloba na bango moko, ntango mosusu azalaki mpe koyebisa bango makambo ya kokoma. Na ndenge yango, bato oyo bakomaki Biblia bakomaki nde makanisi ya Nzambe, kasi ya bango moko te.

Nini ekoki kondimisa biso ete bato oyo bakomaki Biblia, bakomaki yango na litambwisi ya elimo ya Nzambe? Tótalela makambo misato oyo etindaka biso tóndima ete Biblia eutá epai ya Nzambe.