Kotosa baboti na yo ezali lokola kofuta nyongo na banki. Soki ozali kofuta malamu, bakobanga te kodefisa yo
MPO NA BILENGE
10 Kotyelama motema
YANGO ELIMBOLI NINI?
Bato oyo babongi kotyelama motema bandimamaka epai ya baboti na bango, baninga na bango, mpe bapatrɔ na bango. Batosaka mibeko, bakokisaka bilaka na bango, mpe balobaka ntango nyonso solo.
MPO NA NINI EZALI NA NTINA?
Mbala mingi, soki bapesi moto mwa bonsomi, ezalaka mpo amonisaki na boumeli ya ntango mingi ete azali moto ya kotyela motema.
“Lolenge eleki malamu ya kotinda baboti na yo bátyela yo motema ezali ya komonisa ete ozali moto oyo akɔmeli mpe oyo azwaka makambo na lisɛki te, kaka te ntango ozali elongo na bango, kasi ata ntango bazali te.”—Sarahi.
TOLI YA BIBLIA: “Bókoba kotala soki bozali ndenge nini.”—2 Bakorinti 13:5.
OYO OKOKI KOSALA
Soki olingi ete bato bákoba kotyela yo motema, to mpe soki olingi ete bato bázongela kotyela yo motema, makambo oyo elandi ekoki kosalisa yo.
Zalá sembo. Soki olobaka lokuta, bato bakotika kotyela yo motema. Kasi, soki olobaka solo mpe ondimaka mabunga oyo osali, basusu bakotyela yo motema.
“Ezali mpasi te kozala sembo ntango makambo nyonso ezali kotambola malamu. Kasi, soki ozali sembo na likambo moko oyo ekoki kokitisa lokumu na yo, bato bakotyela yo motema lisusu mingi koleka.”—Caiman.
TOLI YA BIBLIA: “Tolingi kozala sembo na makambo nyonso.”—Baebre 13:18.
Zalá moto oyo abongi kotyelama motema. Ankɛtɛ moko oyo esalemaki na États-Unis emonisi ete mpo na kozwa bato na misala, bakompanyi mingi elukaka libosoliboso nde bato oyo babongi kotyelama motema. Koyekola kozala moto oyo abongi kotyelama motema sikoyo ekosalisa yo ntango okokóma mokóló.
“Baboti na ngai bamonaka ntango nakokisaka mikumba na ngai mpe nasalaka misala ya ndako kozanga ete báyebisa ngai yango mbala na mbala. Mbala nyonso oyo nasalaka bongo kozanga ete bátinda ngai, namonaka ete batyelaka ngai motema lisusu mingi.”—Sarah.
TOLI YA BIBLIA: “Natye motema ete okondima, . . . mpo nayebi ete okosala ata koleka makambo oyo nalobi.”—Filemo 21.
Monisá motema molai. Ntango elenge azali kokola na nzoto, yango emonanaka polele; kasi esɛngaka ntango mpo basusu bámona ete elenge yango azali kokóma mokóló oyo ayebi kokokisa mikumba na ye mpe akómi na makanisi ya mikóló.
“Kokanisa te ete baboti mpe bato mosusu bakotyela yo motema mpo osali likambo ya malamu kaka mbala moko. Kasi soki ozali kosala makambo ya malamu mbala na mbala, mokemoke, bakotyela yo motema.”—Brandon.
TOLI YA BIBLIA: “Bólata . . . motema molai.”—Bakolose 3:12.