12 Komityela mikano

YANGO ELIMBOLI NINI?

Mokano ezali kaka ndɔtɔ mpamba te; ezali likambo oyo tolingi ete ekokisama. Mpo na kokokisa mokano moko, esɛngaka kobongisa yango, kobongola yango soki esengeli, mpe kosala milende mpo na kokokisa yango.

Mikano ekoki kozala ya ntango mokuse (oyo esɛngaka mikolo to bapɔsɔ mpo na kokokisa yango), ya mwa molai (basanza), mpe ya ntango molai (mbula moko to koleka). Mpo na kokokisa mikano ya ntango molai, esɛngaka naino komityela mikano ya ntango mokuse.

MPO NA NINI EZALI NA NTINA?

Kokokisa mikano ekoki kosalisa yo omityela motema, oyokana malamu na baninga na yo, mpe ekoki kobakisela yo esengo.

Kotika kobanga: Soki omityeli mikano ya mikemike mpe okokisi yango, okobanga te komityela mikano ya minene. Ekosalisa yo mpe obanga te ntango okutani na mikakatano ya mokolo na mokolo, na ndakisa kosala likambo moko mpo baninga na yo batye yo mbamba.

Boninga: Bato basepelaka kozala elongo na bato oyo bazalaka na mikano, elingi koloba oyo bayebi likambo nini balingi kokokisa, mpe bazali na mposa ya kokokisa yango. Kutu, kosala elongo na moto oyo yo ná ye bozali na mokano moko ezali lolenge eleki malamu ya kokómisa boninga na bino makasi.

Esengo: Soki omityeli mikano mpe okokisi yango, okomona ete osali likambo moko ya ntina.

“Nalingaka komityela mikano. Esalisaka ngai nazanga likambo ya kosala te mpe nazala kaka na likambo moko oyo nazali koluka kokokisa. Ntango okokisi mokano moko, ezalaka likambo ya esengo kotala nsima mpe koloba: ‘Nasali yango mpenza! Nakokisi likambo oyo nakanaki kosala.’”​—Christopher.

TOLI YA BIBLIA: “Ye oyo azali kotalatala mopɛpɛ akolona mboto te; mpe ye oyo azali kotala mapata akobuka mbuma te.”​—Mosakoli 11:4.

OYO OKOKI KOSALA

Salá makambo oyo elandi mpo na komityela mikano mpe kokokisa yango.

Yebá makambo oyo olingi kosala. Salá liste ya mikano oyo olingi komityela, mpe salá makasi okokisa yango; poná oyo olingi kokokisa liboso, oyo okokokisa nsima na yango, oyo ekolanda, mpe bongo na bongo.

Mibongisá. Mpo na mokano mokomoko, salá makambo oyo elandi:

• Tyá dati ya nsuka oyo olingi kokokisa yango.

• Tyá na molɔngɔ makambo oyo okosala mpo na kokokisa yango.

• Kanisá mikakatano oyo ekoki kobima mpe nini okosala mpo na kolonga yango.

Kokanga mabɔkɔ te. Kozela te oyeba naino makambo nyonso ya mikemike mpo na koluka kokokisa mokano oyo omityeli. Omituna boye: ‘Eloko nini ya libosoliboso nakoki kosala mpo nakokisa mokano na ngai?’ Na nsima, salá yango. Tyáká elembo na mokano mokomoko oyo okokisi.

TOLI YA BIBLIA: “Myango ya moto ya etingya ememaka mpenza na litomba.”​—Masese 21:5.