OYO OKOKI KOSALA NTANGO NTALO YA BILOKO EZALI KOMATA

Zalá na elikya

Na ekólo esika ofandi, ntalo ya biloko ezali se komata, kasi mbongo oyo ozwaka ezali moke? Ozali komitungisa mpo na kokokisa bamposa na yo moko mpe oyo ya bato ya libota na yo? Soki ezali bongo, okoki komitungisa mpo na avenire na yo. Kasi, ata na ntango wana ya mpasi, kozala na elikya ekoki kosalisa yo.

MPO NA NINI EZALI NA NTINA

Bato oyo bazalaka na elikya basukaka kaka te na kozela ete makambo ebongwana. Elikya etindaka bango básala oyo bakoki mpo na kobongisa makambo ya bomoi na bango. Na ndakisa, bolukiluki moko emonisi ete mbala mingi bato oyo bazalaka na elikya . . .

bayikelaka mikakatano na bango mpiko
bamesanaka nokinoki na mbongwana oyo esalemi
bazwaka bikateli ya malamu na bomoi, mpe baboyaka mimeseno oyo ekoki kobebisa sante na bango

OYO OKOKI KOSALA

Ya liboso, luká koyeba ndenge Biblia ekoki kosalisa yo. Biblia ezali na makanisi ya sikisiki oyo ekoki kosalisa yo oyeba oyo okoki kosala ntango ntalo ya biloko ezali se komata. Makanisi yango ekoki kosalisa yo oyeba oyo okoki kosala na bomoi na yo ya lelo mpe na mikolo ezali koya ntango makambo ekokóma lisusu mpasi.

“Mayɛlɛ ekobatela yɔ mpe bosɔsɔli ekosunga yɔ.”—Masese 2:11, Bible Haut-Fleuve

Ya mibale, luká koyeba oyo Biblia elobi mpo na mikolo ezali koya. Soki oyebi valɛrɛ ya bwanya oyo ezali na Biblia, yango ekotinda yo oluka koyeba malamumalamu oyo buku yango elobi mpo na mikolo ezali koya. Na ndakisa, okoyekola ete Nzambe alingi kaka te ozala na “bomoi ya malamu na mikolo ezali koya mpe elikya” kasi apesi mpe yo ntina oyo osengeli kondimela elikya yango. (Yirimia 29:11) Ntina yango ezali Bokonzi ya Nzambe.

BOKONZI YA NZAMBE EZALI NINI, MPE EKOSALA NINI?

Bokonzi ya Nzambe ezali guvɛrnema oyo ekoyangela mabele mobimba. (Danyele 2:44; Matai 6:10) Uta na likoló, guvɛrnema yango ekosilisa mpasi mpe bobola, mpe na esika na yango, ekozala nde na kimya mpe bato bakozala na nyonso oyo basengeli na yango mpo bázala na esengo, ndenge bavɛrsɛ oyo elandi emonisi yango.

“Okozala na esengo mpe makambo na yo ekotambola malamu.”—Nzembo 128:2.

“[Bato oyo Bokonzi ya Nzambe ekoyangela,] bakoboma nzoto mpamba te.”—Yisaya 65:23.

“Bilei ekozala ebele mpenza na mabele.”—Nzembo 72:16.

Bamilio ya bato batyelaka bilaka yango motema, bandimaka ete Nzambe “akoki kokosa te.” (Tito 1:2) Na yango, ekozala malamu yo moko oluka koyeba oyo Biblia eteyaka. Elikya oyo Biblia epesi ekoki kopesa yo makasi oyo osengeli na yango mpo na koyika mpiko ntango ntalo ya biloko ezali se komata mpe kosalisa yo ozala na kondima ete na mikolo ezali koya, makambo ekobonga.