Mokapo 48
Yesu atiki Yailo mpe azongi na Nazarete
YESU akokisaki mosala monene na mokolo wana: koutaka na Dekapoli na masuwa, abikisaki mwasi moko oyo azalaki kotàngà makila mpe asekwisaki mwana mwasi na Yailo. Kasi mokolo mosuki naino te. Bobele mwa moke wana auti kobima na ndako na Yailo, bakufeli miso mibale balandi ye nsima, bazali konganga ete: “E Mwana na Davidi, yokela biso mawa!”
Kobengaka Yesu “Mwana na Davidi,” mibali wana bandimi polele ete ye azali mokitani na kiti na bokonzi na Davidi, mpe na bongo azali Masiya oyo alakamaki. Nzokande, Yesu asali lokola ete azali koyoka bango te, mbala mosusu mpo na kotala molende na bango. Kasi mibali wana mibale balembi te. Bazali kolanda Yesu oyo azali kokende na ndako esika azali kofanda; ntango akoti, bazali bobele nsima na ye.
Kuna Yesu atuni bango: “Bondimi ete nakoki kosala boye?”
Bayanoli na elikya nyonso ete, “Ee Nkolo.”
Na bongo, kosimbaka miso na bango, Yesu alobi: “Tika esalama mpo na bino lokola endimi bino!” Mpe nokinoki babandi komona! Kasi Yesu akebisi bango makasi mpenza ete: “Moto moko ayeba likambo oyo te.” Nzokande bango, na esengo nyonso, batosi etinda oyo te mpe balobi na ntina na Yesu na mboka mobimba.
Naino bato yango bakomaki mosika te, bamemeli Yesu moto moko oyo elimu mabe moko akomisa ye baba to ebubu. Ntango Yesu abengani elimu mabe, moto yango abandi koloba. Bibele bakamwi mpe balobi ete: “Likambo motindo boye emonana naino te na Yisraele.”
Bafalisai mpe bazali wana. Bakoki kowangana bikamwiseli yango te, nzokande bazali na mitó makasi mpe na motema mabe, ntina wana batyoli eutelo na nguya na Yesu, kolobaka ete: “Azali kobimisa bilimu mabe na nguya na mokolo na bilimu mabe.”
Mwa moke nsima na makambo oyo, Yesu azongi na Nazarete, mboka epai kuna akolaki, mpe mbala oyo azali elongo na bayekoli na ye. Pene na mbula moko liboso, asilaki kokende na eyanganelo, epai kuna ateyaki. Atako na ebandeli bato bakamwaki na maloba na ye kitoko, nde na nsima basilikaki mpo na mateya na ye mpe balingaki koboma ye. Sikawa, komonisaka motema mawa, Yesu ameki lisusu kosalisa bato ya mboka na ye ya kala.
Wana bisika mosusu bato bazali kosopana epai na Yesu, emonani polele ete ezali boye te na Nazarete. Yango wana, ntango sabata ekoki, akei na eyanganelo mpo na koteya. Mingi kati na bayoki na ye bakamwi. Bazali kotunana ete: “Moto oyo azwi mayele oyo mpe nguya na kosala bikamwiseli boye epai wapi? Oyo azali mwana na mosali na mabaya te? Nkombo na mama na ye Marie te, bandeko na ye Yakobo mpe Yozefe mpe Simona mpe Yuda te? Bandeko na ye ya basi, nyonso bazali na biso elongo te? Boye moto oyo azwi makambo oyo nyonso wapi?”
Bazali kolobana ete ‘Yesu azali bobele mwana ya mboka lokola biso. Tomonaki kokola na ye mpe toyebi libota na ye. Ndenge nini akoki kozala Masiya?’ Na yango, atako bilembeteli na mayele na ye mingi mpe bikamwiseli na ye, bazali kondima ye te. Ata basangani ya libota na ye moko, lokola bayebi ye malamumalamu mpenza, batuti libaku na ntina na ye, likambo oyo ememi Yesu na kosukisa ete: “Mosakoli azangi lokumu te bobele na mokili na ye moko mpe kati na ndako na ye moko.”
Ya solo, Yesu akamwe na komona ete bato na Nazarete bazali kondima te. Mpo na yango, akosala bikamwiseli mingi wana te, longola bobele kotya maboko likoló na mwa bato na bokono mpo na kobikisa bango. Matai 9:27-34; 13:54-58; Malako 6:1-6; Yisaya 9:7.
▪ Na kobengaka Yesu “Mwana na Davidi,” likambo nini bakufeli miso mibale bandimi yango?
▪ Ndenge nini Bafalisai bazali kolimbola bikamwiseli na Yesu?
▪ Mpo na nini kozonga mpo na kosalisa bafandi na Nazarete emonisi motema mawa na Yesu?
▪ Motindo nini bato na Nazarete bayambi Yesu, mpe mpo na nini?