Liteya 15

Tósalisa basusu ete básala mokano ya Nzambe

Mpo na nini koyebisa basusu makambo oyo ozali koyekola? (1)

Osengeli koyebisa nsango malamu epai na nani? (2)

Bopusi nini etamboli na yo ekoki kozala na yango likoló na basusu? (2)

Ntango nini okoki kosakola elongo na lisangá? (3)

1. Kino sikawa, osili koyekola makambo mingi ya malamu na Biblia. Boyebi yango esengeli komema yo na kolóna bomoto ya boklisto. (Baefese 4:22-24) Boyebi wana ezali na ntina mingi mpo ete ozwa bomoi ya seko. (Yoane 17:3) Nzokande, basusu mpe basengeli koyoka nsango malamu mpo ete bango mpe bákoka kobikisama. Baklisto nyonso ya solo basengeli kopesa litatoli epai na basusu. Yango ezali etindá euti na Nzambe.​—Baloma 10:10; 1 Bakolinti 9:16; 1 Timoté 4:16.

2. Okoki kobanda na koyebisáká makambo malamu oyo ozali koyekola epai na baoyo bazali zingazinga na yo. Yebisá makambo yango na libota na yo, na baninga, na baoyo otángaka na bango mpe na baoyo osalaka na bango esika moko. Zalá na boboto mpe na motema pɛtɛɛ wana ozali koyebisa bango makambo yango. (2 Timoté 2:24, 25) Obosana te ete mbala mingi bato batalelaka etamboli na moto koleka makambo oyo azali koloba. Na yango etamboli malamu na yo ekoki kobenda basusu ete báyoka nsango oyo ozali koyebisa bango.​—Matai 5:16; 1 Petelo 3:1, 2, 16.

3. Na nsima, okoki kokokisa masɛngami mpo na kobanda kosakola elongo na Batatoli ya Yehova na esika oyo ofandi. Yango ezali litambe moko ya ntina mingi mpo na bokóli na yo. (Matai 24:14) Oyo nde esengo okozala na yango soki okosalisa moto moko ete akóma mosaleli ya Yehova mpe kozwa bomoi ya seko!​—1 Batesaloniki 2:19, 20.