Ndenge ya kolonga momeseno ya kosakana na binama ya kobotela

Momeseno ya kosakana na binama ya kobotela ebebisaka boyokani ya moto na Nzambe; etindaka moto aluka komisepelisa mpe ebebisaka makanisi.a Moto oyo azali na bolɛmbu yango akoki kobanda kotalela nzoto ya moto mosusu lokola eloko oyo esalemá kaka mpo na kokokisa mposa ya nzoto. Mpo na ye, kosangisa nzoto na moto ekokipe te soki alingani na moto yango, ezali kaka mpo na komisepelisa mpe kosilisa mposa ya nzoto. Nzokande, mposa yango mpe esilaka mpo na libela te. Na esika aboma binama ya nzoto “na likambo ya pite, mbindo, mposa [mabe] ya kosangisa nzoto,” moto oyo asakanaka na binama ya kobotela atumolaka nde bamposa yango.​—Bakolose 3:5.

Ntoma Paulo akomaki boye: “Bandeko ya bolingo, tómipɛtola na mbindo nyonso ya mosuni mpe ya elimo, tómonisaka ete tozali kobanga Nzambe mpo bosantu na biso ekóma ya kokoka.” (2 Bakorinti 7:1) Soki ozali kobunda etumba mpo na kotosa maloba yango, kolɛmba nzoto te. Yehova ‘asepelaka kolimbisa’ mpe kosalisa. (Nzembo 86:5; Luka 11:9-13) Kutu, lokola motema na yo moko ezali koloba na yo ete likambo oyo osalaka ezali mabe, mpe ozali kosala milende mpo na kotika yango​—ata soki ozali kokwea mbala mosusu—​yango emonisi ete ozali na makanisi ya malamu. Kobosana mpe te ete “Nzambe azali monene koleka mitema na biso mpe ayebi makambo nyonso.” (1 Yoane 3:20) Nzambe amonaka kaka masumu na biso te; atalelaka moto na mobimba na ye. Lokola ayebi makambo na biso nyonso, na boboto mpenza ayokaka mabondeli na biso ntango tozali kosɛnga bolimbisi. Yango wana, bondeláká Nzambe ntango nyonso na komikitisa mpe na etingya, lokola mwana oyo azali kokima epai ya tata na ye ntango azali na mokakatano. Yehova akosalisa yo ozala na lisosoli ya pɛto. (Nzembo 51:1-12, 17; Yisaya 1:18) Nzokande, atako ozali kobondela Nzambe, kokanga mabɔkɔ te. Na ndakisa, boyá na motema moko kotala bafɔtɔ to bafilme ya makambo ya nsɔni mpe kimá baninga mabe.b

Soki ozali kokoka kaka te kolonga momeseno ya kosakana na binama ya kobotela, sololá na moboti na yo soki azali mokristo to na moninga moko oyo akɔmɛli na elimo.c​—Masese 1:8, 9; 1 Batesaloniki 5:14; Tito 2:3-5.