Likanisi ya Biblia na likambo etali koboma libala mpe kokabwana

Yehova alingaka ete mwasi ná mobali oyo babalani bákokisa ndai oyo balapi ete bakotikala elongo tii liwa. Ntango Yehova abalisaki mwasi ná mobali ya liboso, alobaki boye: “Mobali . . . asengeli kokangama na mwasi na ye mpe basengeli kokóma mosuni moko.” Yesu Kristo azongelaki mpe maloba yango; kutu abakisaki boye: “Yango wana, oyo Nzambe akangisi esika moko moto akabola yango te.” (Ebandeli 2:24; Matai 19:3-6) Na bongo, mpo na Yehova mpe Yesu, libala esengeli koumela libela mpe kosuka kaka ntango molongani moko akufi. (1 Bakorinti 7:39) Lokola libala ezali mosantu, tosengeli kotalela likambo ya koboma libala na lisɛki te. Kutu, Yehova ayini koboma libala mpo na bantina oyo Biblia endimi te.​—Malaki 2:15, 16.

Biblia elobeli bantina nini oyo libala ekoki kokufa? Yehova ayini ekobo mpe pite. (Ebandeli 39:9; 2 Samwele 11:26, 27; Nzembo 51:4) Lokola pite ezali mabe mpenza na miso na ye, alobi ete ezali ntina oyo libala ekoki kokufa. (Mpo na koyeba ndimbola ya pite, talá Mokapo 9, paragrafe 7.) Yehova atiki ete molongani oyo asali lisumu te azwa ye moko ekateli ya kotikala na molongani na ye to ya koboma libala. (Matai 19:9) Na yango, soki molongani oyo asali lisumu te azwi ekateli ya koboma libala, yango ekozala te likambo oyo Yehova ayini. Nzokande, lisangá ya bokristo elendisaka moto te ete aboma libala. Kutu, makambo mosusu ekoki kotinda moto atikala na molongani na ye oyo asali lisumu, mingimingi soki molongani yango abongoli mpenza motema. Kasi, ekateli ya koboma libala mpo na ntina oyo Biblia endimi ezali kaka epai ya moto ye moko mpe ntango azwi yango, asengeli kondima nyonso oyo ekoya na nsima.​—Bagalatia 6:5.

Bakristo mosusu bazwaka ekateli ya kokabwana to koboma libala atako balongani na bango basali pite te, kasi bazali kosala bango makambo oyo eleki mpenza mpasi. Biblia elobi ete moto oyo azwi ekateli ya kotika molongani na ye, “afanda kozanga kobala to mpe ayokana lisusu” na molongani na ye. (1 Bakorinti 7:11) Mokristo oyo akabwani na molongani na ye azali na ndingisa te ya kotuna moto mosusu libala. (Matai 5:32) Tótalela mwa makambo ya minene mpenza oyo etindaki bakristo mosusu bákabwana na balongani na bango.

Koboya na nko koleisa libota. Libota ekoki kozanga nyonso, ata biloko ya ntina mpo na bomoi, mpo mobali azali kokipe mwasi ná bana te, atako azali na makoki ya kosala yango. Biblia elobi boye: “Soki moto azali te kopesa . . . bato ya ndako na ye, biloko oyo basengeli na yango, awangani kondima mpe azali mabe koleka moto oyo azali na kondima te.” (1 Timote 5:8) Soki mobali yango aboyi kotika ezaleli wana, mwasi akoki kozwa ekateli ya kosɛnga na Leta ete bákabwana mpo na komibatela mpe kobatela bana. Kasi, bankulutu basengeli koluka koyeba soki ezali mpenza solo ete mobali oyo azali mokristo azali koboya koleisa libota na ye. Moto oyo azali koboya koleisa libota na ye akoki kobimisama na lisangá.

Konyokola mpe kobɛta. Moto mosusu akoki kozala na makambo makasi mpe na ezaleli ya kobɛta molongani na ye na ndenge oyo ekómi mpenza likama mpo na kolɔngɔnɔ ya nzoto, ata mpe bomoi ya molongani na ye. Soki moto oyo azali kobɛta molongani na ye azali mokristo, bankulutu basengeli kolandela likambo yango mpo na koyeba soki ezali solo. Moto oyo azalaka nkanda makasimakasi mpe abɛtaka, akoki kobimisama na lisangá.​—Bagalatia 5:19-21.

Kopekisa moto losambo ya solo. Ekoki kozala ete moto moko azali ntango nyonso kopekisa molongani na ye asambela Nzambe ya solo to mpe kotinda ye na makasi ete abuka mibeko ya Nzambe. Na likambo ya ndenge wana, moto oyo azali na likama akoki kozwa ekateli ya kokabwana na molongani na ye soki yango ezali nzela kaka moko oyo akoki “kotosa Nzambe mpo azali mokonzi na esika ya kotosa bato.”​—Misala 5:29.

Nzokande, moto moko te asengeli kotya mbamba epai ya mobali to mwasi oyo azali kokutana na makambo minene oyo touti kolobela ete akabwana na molongani na ye to mpe atikala na ye kaka. Baninga oyo bakɔmɛli na elimo mpe bankulutu bakoki kosalisa ye mpe kopesa ye batoli oyo euti na Biblia; kasi, bakoki te koyeba makambo nyonso oyo ezali koleka kati na ye ná molongani na ye. Kaka Yehova nde akoki komona makambo yango. Mwasi mokristo akopesa Nzambe lokumu te mpe akokumisa libala te soki azali koluka kokabwana na mobali na ye, mpe mpo na yango, azali komonisa ete mikakatano na ye eleki makasi, nzokande ezali bongo te. Ezali mpe bongo mpo na mobali. Yehova ayebaka malamu ntango moto abombi likambo mpe azali kosalela mayele mabe kaka mpo akabwana na molongani na ye. “Biloko nyonso ezali bolumbu mpe ezali komonana polele na miso ya moto oyo tokozongisa monɔkɔ epai na ye.” (Baebre 4:13) Nzokande, soki mokristo moko azali ntango nyonso na likama mpe nsukansuka amoni ete ebongi akabwana na molongani na ye, bato mosusu basengeli koloba mabe te. Tosengeli kobosana te ete “biso nyonso tokotɛlɛma liboso ya kiti ya kosambisa ya Nzambe.”​—Baroma 14:10-12.