Mokapo 34

Mpo na nini kolanda makambo oyo Biblia elobaka?

Kanisá ete yo ná baninga na yo mibale ya basi bozali kolya na restora ya eteyelo, mpe elenge mobali moko oyo ayei sika na eteyelo akɔti na restora.

Mwana mwasi ya liboso alobi boye: “Oyebi, Matthieu alelá yo mpenza! Nayebi yango na ndenge atalaka yo. Miso na ye ezalaka kaka epai na yo!”

Mwana mwasi ya mibale ayebisi yo na litoi boye: “Oyebi, azali na ye na mwa moto te!”

Yo moko mpe oyebi ete ezali makambo ya solo. Mokolo moko kutu Matthieu abengisaki yo na fɛti na bango. Ya solo, oboyaki mpo ozalaki komituna soki fɛti yango ekozala ndenge nini.

Moninga oyo alobaki liboso akati yo maloba mpe abakisi boye:

“Mpo kaka nazali na mwa moto na ngai, soki te nalingaki nalinga Matthieu!”

Na nsima atali yo mpe akamwe. Oyebi motuna nini alingi atuna yo.

Moninga yango atuni yo: “Mpo na nini ozalaka na mwa moto te?”

Osepelaka te na motuna wana. Na ntembe te olingaka kozala na mwa moto na yo. Kasi bayebisá yo ke ezali malamu ozela tii ntango okokoka mpo na kobala mpo obanda kolinga mwana mobali. Soki ezalaka te mpo na . . .

Mwana mwasi ya mibale atuni boye: “Oz’oboya nde mpo na lingomba na bino?”

Olobi boye, ‘wana mpenza ndenge nazalaki kokanisa!’

Mwana mwasi ya liboso alobi na yo na lityo: “Yo likambo nyonso kaka Bible, Bible, Bible. Mpo na nini te na ntango mosusu komisepelisa ata mwa moke?”

ESALEMÁ ete báseka yo mpo osalaka makasi olanda makambo oyo Biblia elobaka? Soki ezali bongo, mbala mosusu omitungisaka soki kolanda makambo oyo Biblia elobaka ezangisaka yo mabaku ya komisepelisa. Elenge mwasi moko na nkombo Deborah, amiyokaki mpe ndenge wana. Alobi boye: “Namonaka ke kosalela makambo oyo Biblia elobaka, ezali lokola moto azali na kashɔ. Baninga na ngai ya kelasi bazalaki kosala nyonso oyo balingi, mpe nakómaki kolula bango.”

Ndenge oyo okoki kobongola makanisi na yo

Esɛngi kaka te okutana na likambo moko boye mpo ozwa mayele. Kasi, ndenge Biblia emonisi yango, kozwa liteya na mabunga ya basusu ezali likambo ya bwanya; Asafe moko ya bakomi ya nzembo amonaki likambo yango. Na ntango moko boye, amonaki lokola ete kolanda makambo oyo Biblia elobaka ezali lokola moto azali na kashɔ. Kasi kotalela ezaleli ya bato oyo batikaki Nzambe bakómaki na yango, esalisaki ye abongola makanisi na ye. Na nsima, Asafe amonaki ete bato yango bazali likoló ya “mabele ya mosɛlu.”​—Nzembo 73:18.

Mpo na kokwea te na mabunga oyo basusu bakweaki, tótalela makambo bilenge mosusu oyo, na ntango moko boye, batikaki kolanda makambo oyo Biblia elobaka mpe bakómaki kosala pite.

● Makambo nini ebebisaki makanisi mpe bizaleli na yo?

Deborah: “Ntango nazalaki kokende na kelasi, nazalaki komona elenge mokomoko azali na mwa moto na ye mpe ezalaki komonana lokola bazali na esengo. Ntango nakómaki kolekisa ntango ná bango, nazalaki komona ndenge bazali koyambana mpe kopesana babizi; nazalaki kolula bango mpe nazalaki komiyoka ete nazali kaka ngai moko. Mbala mingi, nazalaki kolekisa bangonga na kokanisakanisa mwana mobali moko oyo nazalaki kosepela na ye. Yango ezalaki kotinda ngai nazalaka ná ye.”

Mickaël: “Nazalaki kotánga mikanda mpe kotala bafilme oyo elobelaka mingi makambo ya kosangisa nzoto. Kobɛta masolo ya makambo ya kosangisa nzoto ná baninga na ngai, etindaki ngai nakóma koluka koyeba soki kosangisa nzoto ezalaka ndenge nini. Yango wana, ntango nabandaki kozala ná mwana mwasi, nazalaki kokanisa ete tokoki kosimbanasimbana kozanga ete tósangisa nzoto, mpe nazalaki kokanisa ete nakokoka komipekisa liboso ete tókende mosika.”

André: “Nazalaki kotala pornografi na internet. Nakómaki komɛla masanga mingi. Mpe nakómaki kokende bafɛti ná bilenge oyo bazalaki kotosa te makambo oyo Biblia elobaka.”

Tressi: “Nayebaki ete kosangisa nzoto liboso ya kobala ezali mabe, kasi nazalaki koyina yango te. Nalingaki te kosangisa nzoto liboso ya kobala, kasi bamposa ya nzoto ekweisaki ngai. Na ebandeli, lisosoli na ngai ezalaki kotungisama te.”

● Bomoi oyo ozalaki na yango epesaki yo esengo?

Deborah: “Na ebandeli, namonaki lokola ete nakómi mpenza na bonsomi mpe nazalaki na esengo mpo baninga na ngai bakómaki kosepela na ngai. Kasi, esengo yango eumelaki te. Nakómaki komimona mbindo, namonaki ete namemi ngambo mpe bomoi na ngai ezali na ntina te. Nayokaki mawa mingi ndenge nabebisaki nzoto na ngai liboso nabala.”

André: “Nazalaki lisusu na nsɔmɔ te ya kosala makambo ya mabe. Kasi na kati ya motema, nazalaki koyoka lokola namemi ngambo mpe nazalaki lisusu na esengo te.”

Tressi: “Etamboli ya mbindo esalá ete nabebisa bolenge na ngai. Nakanisaki ete ngai ná mwana mobali wana tokosepelisana mpenza. Kasi, ezalaki bongo te. Esukelaki biso mabe, toyokisanaki mpasi mpe mawa, mpe totikelaná basuvenire ya mabe. Nazalaki kolela butu nyonso na mbeto na ngai, mpe koloba ete ebongaki mpenza nalanda nzela ya Yehova.”

Mickaël: “Nakómaki komiyoka lokola eteni moko ya nzoto na ngai ekufi. Nazalaki kosala makasi nakanisa te mpasi oyo ezaleli na ngai ezalaki kopesa basusu, kasi nazalaki kokoka te. Nayokaki mawa ntango namonaki ete napesaki basusu mpasi na ndenge nalukaki kaka bolamu na ngai moko.”

● Toli nini okoki kopesa bilenge mosusu oyo bamonaka ete kolanda makambo oyo Biblia elobaka, ezali lokola moto azali na kashɔ?

Tressi: “Tosá makambo oyo Yehova alobaka, mpe zalá na baninga oyo batosaka makambo yango. Yango ekopesa yo esengo mingi.”

Deborah: “Yebá ete makambo oyo okosala etali kaka yo moko te. Bizaleli na yo ekoki mpe koyokisa basusu mpasi. Mpe soki oboyi kolanda toli ya Nzambe, okobebisa bomoi na yo.”

André: “Soki okɔmɛli naino te, okokanisa ete baninga na yo bazali na bomoi ya esengo mpenza. Mokemoke, okoki kobanda kolanda bizaleli na bango. Yango wana, yebá kopona baninga. Tyelá Yehova motema, mpe makambo oyo eyokisaka mpasi na motema ekoyela yo te.”

Mickaël: “Na kati ya biloko ya motuya mpenza oyo Yehova apesá yo, tokoki mpe kotánga kobatela lokumu na yo mpe kobatela nzoto na yo tii mokolo okobala. Kobebisa yango kaka mpo na kozanga komipekisa, ezali mpenza komisambwisa. Yebisáká baboti na yo to mikóló mosusu makambo oyo ezali kotungisa yo. Soki osali likambo ya mabe, yebisá yango polele mpe luká kobongisa yango. Soki osali makambo ndenge Yehova alingaka, okozala na kimya ya solosolo.”

Mateya ya Biblia, etyaka biso nkaka to ebatelaka biso?

Yehova azali “Nzambe ya esengo,” mpe alingi ete yo mpe ozala na esengo. (1 Timote 1:11; Mosakoli 11:9) Makambo oyo Biblia elobaka ezali mpo na bolamu na yo. Ya solo, okoki komona yango lokola batye yo nsinga na nkingo. Kasi, mateya ya Biblia ezali nde mpo na kobatela yo na likama.

Ya solo, okoki kotyela Biblia motema. Soki ondimi kotosa makambo oyo yango elobaka, okosepelisa Yehova mpe okozwa matomba mingi.​—Yisaya 48:17.

VƐRSƐ OYO EKOSALISA YO

“Ngai Yehova nazali Nzambe na yo, Moto oyo azali koteya yo mpo na litomba na yo moko.”—Yisaya 48:17.

TOLI

Kanisá ndenge oyo okoki komonisa leki na yo ete makambo oyo Biblia elobaka ezali malamu. Koyebisa basusu mateya ya Biblia oyo ondimaka, ezali lolenge malamu ya kofandisa yango na motema na yo.

OYEBAKI YANGO . . . ?

Esɛngaka kaka mwa ntango moke mpo na kobebisa boyokani na yo ná Yehova, kasi esɛngaka bambula mpo na kobongisa yango.

MAKAMBO OYO NAKOSALA

Mpo nayeba ete kosalela mateya ya Biblia, ezali malamu mingi, nako ․․․․․

Soki nabandi kolula bato oyo balandaka makambo ya mokili, nako ․․․․․

Na mokapo oyo, nakosepela kotuna moboti (baboti) na ngai boye ․․․․․

OKANISI NINI?

● Mpo na nini esɛngi kaka te okutana na likama moko boye liboso omona ete koboya kotosa mibeko ya Nzambe ememaka makama?

● Makambo oyo Deborah, Mickaël, André mpe Tressi balobi, eteyi yo nini?

● Mpo na nini bato mosusu bamonaka ete mateya ya Biblia etyaka bango nsinga na nkingo, kasi mpo na nini makanisi ya bongo emonisi ete batalaka mosika te?

[Likanisi ya paragrafe na lokasa 285]

‘‘Kozwa disiplini mpo na mabe oyo osali, esalaka mwa mpasi, kasi koluka kobomba mabe oyo osali, esalaka mpasi mingi koleka.’’​—Donna

[Bililingi na lokasa 288]

Mateya ya Biblia etyaka yo nkaka te, kasi ebatelaka nde yo