Bandakisa ya kolanda—Paulo

Ntoma Paulo azalaki kolobela mitungisi na ye kozanga kolekisa ndelo. Na bosembo nyonso, alobaki ete: “Ntango nalingi kosala oyo ezali malamu, oyo ezali mabe nde ezali epai na ngai.” Ntoma Paulo azalaki mpenza kolinga kosala oyo ezali malamu. Akomaki boye: “Na motema na ngai, nasepelaka mpenza na mobeko ya Nzambe.” Kasi mokakatano ezalaki wapi? Paulo alobaki boye: “Nazali komona . . . mobeko mosusu oyo ezali kobunda etumba na mobeko ya makanisi na ngai mpe oyo ezali komema ngai mokangami epai ya mobeko ya lisumu oyo ezali na binama na ngai.” Paulo azalaki kosepela te na mabunga na ye. Alobaki boye: “Ngai moto ya mawa!”—Baroma 7:21-24.

Mabunga na yo etindaka yo oyoka mawa? Soki ezali bongo, kobosana te ete ata ntoma Paulo amiyokaki mpe ndenge wana na ntango mosusu. Kasi Paulo ayebaki mpe ete Kristo akufaki mpo na bato lokola ye, yango wana alobaki ete: “Nzambe azwa matɔndi na nzela ya Yesu Kristo Nkolo na biso!” (Baroma 7:25) Paulo azalaki kotalela lisiko lokola likabo oyo epesamá mpenza mpo na ye. Akomaki boye: “Mwana ya Nzambe . . . alingaki ngai mpe amikabaki mpo na ngai.” (Bagalatia 2:20) Soki olɛmbi nzoto, kanisá lisiko. Mpe soki mabunga na yo elɛmbisi yo, kobosana soki moke te ete Kristo akufaki mpo na basumuki, kasi mpo na bato ya kokoka te.