Masiya amonani

MBULA koleka 500 nsima ya esakweli ya Danyele, Gabriele, anzelu ya Nzambe abimelaki Maria, elenge mwasi moko oyo ayebaki naino mibali te, oyo azalaki moto ya libota ya Mokonzi Davidi. Gabriele alobaki na ye boye: “Mbote, moto oyo Nzambe amoniseli boboto mingi, Yehova azali na yo.” (Luka 1:28) Kasi, Maria abangaki. Mbote oyo Gabriele apesaki ye elimbolaki nini?

Gabriele alimbolaki boye: “Maria, kobanga te mpo Nzambe amoniseli yo boboto; mpe talá! okozwa zemi mpe okobota mwana mobali, mpe okopesa ye nkombo Yesu. . . . Yehova Nzambe akopesa ye kiti ya bokonzi ya Davidi tata na ye, mpe . . . bokonzi na ye ekozala na nsuka te.” (Luka 1:30-33) Ezalaki mpenza nsango malamu! Maria asengelaki kobota Masiya, “momboto” oyo bazalaki kozela banda kala!

Na mbula oyo elandaki, Yesu abotamaki na Beteleme. Na butu yango, anzelu moko ayebisaki bato oyo bazalaki kobatela bampate boye: “Talá! nazali kosakwela bino nsango malamu ya esengo moko monene . . . mpo lelo, na engumba ya Davidi, baboteli bino Mobikisi, oyo azali Kristo Nkolo.” (Luka 2:10, 11) Na nsima, libota ya Yesu ekendaki kofanda na Nazarete; kuna nde esika Yesu akolaki.

Na mobu 29 T.B., mobu oyo Masiya asengelaki komonana, Yesu abandaki kosalela Nzambe, akómaki mosakoli na ye, ntango azalaki na mbula “soki ntuku misato.” (Luka 3:23) Bato mingi bayaki kososola ete Nzambe nde atindaki ye. Balobaki boye: “Mosakoli monene abimi na kati na biso.” (Luka 7:16, 17) Kasi makambo nini Yesu ateyaki?

Yesu ateyaki bato kolinga Nzambe mpe kosambela ye: Alobaki boye: “Yehova Nzambe na biso azali Yehova kaka moko, mpe osengeli kolinga Yehova Nzambe na yo na motema na yo mobimba mpe na molimo na yo mobimba mpe na makanisi na yo nyonso mpe na makasi na yo nyonso.” (Marko 12:29, 30) Alobaki mpe boye: “Osengeli kosambela nde Yehova Nzambe na yo, mpe kaka ye moko nde osengeli kosalela mosala mosantu.”​—Luka 4:8.

Yesu alendisaki bato bálinganaka: Alobaki ete: “Osengeli kolinga mozalani na yo lokola yo moko.” (Marko 12:31) Alobaki mpe ete: “Makambo nyonso oyo bolingaka bato básalela bino, bino mpe bósalela bango kaka bongo; ya solo, wana nde likambo ya ntina oyo Mibeko mpe Basakoli bateyi.”​—Matai 7:12.

Yesu azalaki koyebisa basusu nsango ya Bokonzi na molende: Alobaki ete: “Nasengeli mpe kosakola nsango malamu ya bokonzi ya Nzambe . . . , mpamba te natindamaki mpo na yango.” (Luka 4:43) Mpo na nini Bokonzi ya Nzambe ezali na ntina mingi?

Makomami eteyaka ete Bokonzi ya Nzambe ezali guvɛrnema ya likoló oyo ekoyangela mabele. Yesu Masiya nde Mokonzi oyo Nzambe aponi mpo na koyangela na Bokonzi yango. Na emonaneli moko, mosakoli Danyele amonaki Nzambe kuna na likoló azali kopesa Masiya “boyangeli, lokumu ná bokonzi.” (Danyele 7:14) Bokonzi yango ekotya Paradiso na mabele mobimba mpe ekopesa basaleli ya Nzambe likabo ya bomoi ya seko. Wana ezali mpenza nsango oyo eleki malamu!