Nsango mibale oyo euti na Nzambe

Tokoki kotalela Biblia mobimba ete ezali nsango oyo euti na Nzambe. Tata na biso ya likoló akomisá yango mpo eteyaka biso. Tótalela naino nsango mibale ya ntina mingi oyo esakolamaki esili koleka mbula 2 000. Anzelu Gabriele, oyo ‘atɛlɛmaka liboso ya Nzambe’ nde asakolaki nsango yango. (Luka 1:19) Makambo ezalaki ndenge nini ntango anzelu wana asakolaki bansango wana ya ntina mingi?

Tozali na mobu soki 3 L.T.B. Epai wapi anzelu Gabriele ayebisi nsango ya liboso? Na bangomba ya Yudea, mosika te na Yerusaleme. Nganga-nzambe moko na nkombo Zekaria afandaka kuna. Ye ná mwasi na ye Elizabeti bakómi mikóló mpe babotá te. Ekómi ngala ya Zekaria ya kosala mosala ya bonganga-nzambe na tempelo ya Yerusaleme. Ntango Zekaria azali na tempelo, anzelu Gabriele abimeli ye na mbalakaka pene na etumbelo ya mpaka ya malasi.

Kozanga ntembe, likambo yango ebangisi Zekaria. Kasi anzelu akitisi ye motema na maloba oyo: “Kobanga te, Zekaria, mpo lilɔmbɔ na yo eyokami mpe endimami, mpe mwasi na yo Elizabeti akobotela yo mwana mobali, mpe okopesa ye nkombo Yoane.” Anzelu Gabriele abakisi lisusu boye: “Akozala moto monene na miso ya Yehova” mpe ‘akolɛngɛlɛla Yehova bato oyo babongisami.’​—Luka 1:13-17.

Kasi Zekaria amoni ete likambo yango ekoki kosalema ata moke te. Mpo na nini? Mpo ye ná Elizabeti bakómi mikóló. Yango wana anzelu Gabriele alobi na ye ete: “Okokoka koloba te mpe okofanda nyɛɛ tii mokolo makambo wana ekosalema, mpo ondimi maloba na ngai te, oyo ekokokisama na ntango na yango oyo etyamá.”​—Luka 1:20.

Na ntango yango, bato oyo bazali libándá bazali komituna mpo na nini Zekaria aumeli mingi kuna. Nsukansuka abimi, kasi azali kokoka koloba te. Zekaria akómi kaka kosala bajɛstɛ na mabɔkɔ na ye. Emonani polele ete amonaki emonaneli moko ntango azalaki na tempelo.

Ntango Zekaria asilisi mosala na ye na tempelo, azongi na ndako na ye. Mwa moke na nsima, Elizabeti azwi zemi! Elizabeti afandaki ye moko na ndako sanza mitano, wana azali kozela abota mwana na ye.

Na nsima anzelu Gabriele amonani lisusu mpo na mbala ya mibale. Abimeli nani? Abimeli elenge mwasi moko oyo abali naino te, nkombo na ye Maria; afandaka na nɔrdi na etúká moko na nkombo Galile, na engumba Nazarete. Anzelu Gabriele ayebisi Maria likambo nini? Ayebisi ye ete: “Nzambe amoniseli yo boboto.” Abakisi lisusu boye: “Talá! okozwa zemi mpe okobota mwana mobali, mpe okopesa ye nkombo Yesu.” Alobi na Maria lisusu ete: “Ye akozala moto monene mpe akobengama Mwana ya Oyo-Aleki-Likoló, . . . mpe akoyangela ndako ya Yakobo libela na libela, mpe bokonzi na ye ekozala na nsuka te.”​—Luka 1:30-33.

Na ntembe te, anzelu Gabriele asepeli mpenza na libaku oyo azwi ya koyebisa nsango mibale wana. Wana tozali kotánga makambo mingi oyo etali Yoane mpe Yesu, tokomona polele mpo na nini bansango wana oyo eutaki likoló ezali mpenza na ntina mingi.