ETENI 5

Bózongela “mobateli ya mpate mpe mokɛngɛli ya milimo na bino”

Omonaki ete mokakatano moko to mikakatano ebele oyo balobeli na mwa buku oyo ekokani na oyo ya yo? Soki ezali bongo, yebá ete ozali na nzela ya malamu. Basaleli mingi ya sembo ya Nzambe, ezala na ntango ya kala to na mikolo na biso, bakutanaki na mikakatano ya ndenge wana. Lokola Yehova asalisaki bango bálonga mikakatano yango, akosalisa mpe yo.

Yehova akoyamba yo soki ozongeli ye

SIMBÁ ete Yehova akoyamba yo soki ozongeli ye. Akosalisa yo otika komitungisa, olongola nkanda soki bazokisaki yo, mpe ozala na kimya ya makanisi mpe ya motema mpo ozali na lisosoli ya pɛto. Na nsima, okoki kokóma lisusu na mposa ya kosalela Yehova elongo na baninga na yo bandimi. Okozala lokola bakristo mosusu ya siɛklɛ ya liboso, oyo ntoma Petro akomelaki bango ete: “Bozalaki lokola bampate, oyo bazali kobunga nzela; kasi sikoyo bozongeli mobateli ya mpate mpe mokɛngɛli ya milimo na bino.”—1 Petro 2:25.

Kozongela Yehova ezali likambo ya malamu koleka makambo nyonso oyo osengeli kosala. Mpo na nini? Okosepelisa motema ya Yehova. (Masese 27:11) Ndenge oyebi yango, Yehova ayokaka esengo to mawa; na yango, makambo oyo tosalaka esepelisaka ye to eyokisaka ye mawa. Ya solo, Yehova atindaka biso na makasi te ete tólinga ye mpe tósalela ye. (Kolimbola Mibeko 30:19, 20) Moto moko ya mayele oyo alimbolaka Biblia alobaki: “Moto moko te akoki kofungola motema na yo, osengeli kofungola yango yo moko.” Soki tozali kosambela Yehova na motema oyo etondi na bolingo, ekozala lokola tondimi kofungola motema na biso. Ntango tosali bongo, tozali kopesa ye likabo ya motuya mpenza—bosembo na biso—mpe tozali kosepelisa motema na ye mingi. Ya solo, eloko moko te ekoki kokokana na esengo oyo toyokaka ntango tozali kosambela Yehova na ndenge oyo ebongi.—Misala 20:35; Emoniseli 4:11.

Bazali koyamba ndeko mwasi moko oyo azongeli lisangá

Longola yango, soki ozongeli losambo ya solo, bobola na yo ya elimo ekosila. (Matai 5:3) Na ndenge nini? Bato mingi na mokili bamitunaka: ‘Mpo na nini tozali awa na mabele?’ Bazalaka na mposa makasi ya kozwa biyano na mituna oyo etali ntina ya bomoi. Bato bazalaka na mposa wana mpo Yehova akelaki bango na mposa yango. Asalá biso mpo tósalelaka ye na esengo. Tokoki kozala na esengo ya solosolo kaka soki toyebi ete tozali kosambela Yehova mpo tolingaka ye.—Nzembo 63:1-5.

Yebá ete Yehova alingi ozongela ye. Mpo ondima yango, simbá likambo oyo: Tosalaki mabondeli mingi mpo na kobongisa mwa buku oyo malamumalamu. Ekoki kozala ete nkulutu moko to moninga moko mokristo nde apesi yo mwa buku yango. Na nsima, otángi yango, mpe omoni ete osengeli kosalela makambo oyo yango elobeli. Nyonso wana ezali elembo oyo emonisi ete Yehova abosaná yo te. Azali nde kobenda yo malɛmbɛmalɛmbɛ mpo ozongela ye.—Yoane 6:44.

Tokoki mpenza kobɔndisama na koyeba ete Yehova abosanaka te basaleli na ye oyo babungá. Donna, ndeko mwasi moko, amonaki ete ezali mpenza solo. Alobi: “Natikaki solo malɛmbɛmalɛmbɛ, kasi mbala mingi nazalaki komanyola Nzembo 139:23, 24, oyo elobi: ‘Ee Nzambe, talá ngai malamumalamu mpe yebá motema na ngai. Talá ngai malamumalamu mpe yebá makanisi oyo etungisaka ngai, mpe moná soki kati na ngai ezali na nzela moko oyo eyokisaka mpasi, mpe kambá ngai na nzela ya seko.’ Nazalaki koyeba ete nazali moto ya mokili te—ata mokolo moko te nayokaki ete esika na ngai ezali kuna—mpe nayebaki ete nasengeli kozala nde na ebongiseli ya Yehova. Nabandaki komona ete Yehova asundolá ngai te; esengelaki kaka naluka nzela ya kozongela ye. Mpe nasepelaka mingi ndenge nazongelá ye!”

“Nabandaki komona ete Yehova asundolá ngai te; esengelaki kaka naluka nzela ya kozongela ye”

Tozali kobondela ete yo mpe ozonga mpo oyoka lisusu “esengo ya Yehova.” (Nehemia 8:10) Okoyoka mawa te soki ozongeli Yehova.

Biyano na mituna oyo etali kozongela Yehova

NAKOBANDA WAPI?

Soki moto abɛli mingi, mpo azongela misala na ye, abandaka malɛmbɛmalɛmbɛ. Ndenge moko mpe, okoki kozonga makasi na elimo soki ozali kolya mokemoke bilei ya elimo, mokolo na mokolo. Kokanisa te ete osengeli kosala makambo nyonso mbala moko. Ntango mosusu okoki kolekisa mwa miniti na kotánga Biblia to koyoka botángi na yango, koyekola mokanda na biso moko to kosalela site Internet na biso jw.org, to kotala baemisyo oyo ezali na tv.jw.org. Longola yango, luká koyangana nokinoki na likita moko ya lisangá. Oyo eleki nyonso, bondelá Yehova mpe sɛngá ye asalisa yo. ‘Bwakelá ye mitungisi na yo nyonso, mpo atyelaka yo likebi.’—1 Petro 5:7.

“Ntango natikaki kosakola mpe koyangana na makita, nazalaki koyoka nsɔni mpo na kobondela. Ntango nazwaki makasi ya kobondela, nkulutu moko ya lisangá na biso ayaki kotala ngai. Asalisaki ngai nayeba ete Yehova asundolá ngai te. Nkulutu yango alendisaki ngai nabanda kotánga Biblia mokolo na mokolo. Ntango nasalaki yango, nazwaki makasi ya kozongela makita. Na nsima, nazongelaki kobima na mosala ya kosakola. Nazali na esengo mingi ndenge Yehova asundolaki ngai te.”—Eeva.

LISANGÁ EKOYAMBA NGAI NDENGE NINI?

Yebá ete bandeko ya lisangá bakoyamba yo na esengo soki ozongi. Na esika ya koloba na yo mabe to kosambisa yo, bakomonisa nde ete balingi yo mpe bakosala nyonso oyo esengeli mpo na kolendisa yo.—Baebre 10:24, 25.

“Nazalaki koyoka nsɔni kozonga na Ndako ya Bokonzi. Nazalaki komituna soki baninga bakotalela ngai ndenge nini. Ndeko mwasi moko oyo nayebaki mbula 30 liboso alobaki na ngai ete: ‘Bozongi malamu, mwana na ngai!’ Maloba wana esimbaki mpenza motema na ngai. Namonaki ete nazongi mpenza na ndako.”—Javier.

“Nakendaki na Ndako ya Bokonzi mpe nafandaki na molɔngɔ ya nsuka mpo moto amona ngai te. Kasi, bandeko mingi oyo bamonaká ngai ntango nazalaki koya na makita na bomwana, bayebaki ngai. Bapesaki ngai mbote na esengo mpe bayambaki ngai, mpe motema na ngai ekitaki. Ezalaki lokola nde nazongi na ndako.”—Marco.

NDENGE NINI BANKULUTU BAKOSALISA NGAI?

Bankulutu bakosalela yo makambo na boboto. Bakopesa yo longonya mpo ozali na mposa ya kozongela “bolingo oyo ozalaki na yango liboso.” (Emoniseli 2:4) Na motema mawa nyonso, bakosalisa yo obongisa mbeba nyonso osalaki; bakosala bongo na “elimo ya boboto.” (Bagalatia 6:1; Masese 28:13) Bankulutu bakoki kozwa bibongiseli mpo ete ndeko moko ayekola na yo, mbala mosusu na mikanda lokola Sepelá na bomoi libela na libela! to Pusaná penepene na Yehova to “Bótikala na kati ya bolingo ya Nzambe á penepene na Yehova .” Zalá na kondima ete bankulutu bakobɔndisa yo mpe bakosalisa yo na nyonso oyo ozali kosala mpo ozongela Yehova.—Yisaya 32:1, 2.

“Nalɛmbaki na boumeli ya mbula mwambe (8), kasi bankulutu bazalaki kosala nyonso mpo na kosalisa ngai. Mokolo moko, nkulutu moko alakisaki ngai bafɔtɔ oyo tokangaki. Bafɔtɔ yango ezongisaki na makanisi na ngai basuvenire ya malamu mpe nabandaki lisusu kokanisa esengo oyo nazalaki na yango ntango nazalaki kosalela Yehova. Na bolingo nyonso, bankulutu basalisaki ngai nazongela lisangá.”—Victor.

“Akokómisa yo makasi”

Buku na biso ya nzembo, Tóyembela Yehova na esengo, ezali na nzembo kitoko oyo ekoki kobɔndisa yo mpe kolendisa yo ntango obandi kozonga makasi na elimo. Na ndakisa, kanisá maloba ya loyembo ntuku misato na mwambe (38). Loyembo yango euti na maloba oyo ezali na 1 Petro 5:10, motó ya likambo na yango elobi: “Akokómisa yo makasi.”

Ntina Nzamb’alakisi yo solo na ye,

Olongwe na molili, yang’oyo:

Amonaki mposa ya motema na yo

Ya koluka ye mp’ozala sembo.

Band’olaká okosalela ye,

Az’otika kosalisa yo te.
Nzambe apesi Mwana na ye mpo na yo;

Alingi ozwa mpenza lobiko.

Lokol’akabá Mwana na ye mpo na yo,

Makasi ye akosopela yo.

Aza’ koyeba bolingo na yo;

Asundolaka te bato na ye.

(MONDIMO)

Na makila ya Yesu, Nzamb’asombaki yo.

Mpe akosunga yo, okozwa makasi.

Akobatela yo, akokamba yo seko.

Ɛɛ, akosunga yo, okozwa makasi.

Mpo na koyoka loyembo yango mpe nzembo mosusu ya Bokonzi, kende na esika bakomi MIKANDA > MIZIKI.