Anzelu ya Yehova abatelaki Ezekiasi

Ekólo Asiri esilaki kozwa bokonzi oyo ezalaki koyangela mabota zomi ya Yisraele. Kasi sikoyo Senakeribe, mokonzi ya Asiri, alingaki mpe kozwa bokonzi ya Yuda, ekólo ya mabota mibale. Abandaki kozwa engumba mokomoko ya Yuda. Kasi, engumba oyo alingaki mingi koleka ezalaki Yerusaleme. Senakeribe ayebaki te ete Yehova azalaki kobatela Yerusaleme.

Ezekiasi, mokonzi ya Yuda, apesaki Senakeribe mbongo mingi mpo atika Yerusaleme. Atako Senakeribe azwaki mbongo yango, atindaki kaka basoda na ye bábundisa Yerusaleme. Bato ya Yerusaleme bakómaki kobanga mpo basoda ya Asiri bazalaki se kopusana. Ezekiasi ayebisaki bango: ‘Bóbanga te. Basoda ya Asiri bazali makasi, kasi Yehova akokómisa biso makasi koleka bango.’

Senakeribe atindaki momemi-nsango na ye, Rabashake, na Yerusaleme mpo na kosɛka bato ya engumba yango. Rabashake atɛlɛmaki libándá ya engumba mpe agangaki: ‘Yehova akoki kosalisa bino te. Ezekiasi akosa bino te. Nzambe moko te akobikisa bino na lobɔkɔ na biso.’

Ezekiasi atunaki Yehova soki asala nini. Yehova ayanolaki: ‘Maloba ya Rabashake ebangisa bino te. Senakeribe akozwa Yerusaleme te.’ Na nsima, Senakeribe atindelaki Ezekiasi mikanda. Mikanda yango elobaki: ‘Bómitika na mabɔkɔ na ngai. Yehova akobikisa bino te.’ Ezekiasi abondelaki ete: ‘Ee Yehova, bikisá biso mpo bato nyonso báyeba ete ozali Nzambe ya solo kaka moko.’ Yehova ayebisaki ye: ‘Mokonzi ya Asiri akokɔta na Yerusaleme te. Nakobatela engumba na ngai.’

Senakeribe amonaki ete mosika te akozwa Yerusaleme. Kasi na butu moko, Yehova atindaki anzelu moko esika basoda ya Asiri batyaki kaa libándá ya engumba. Anzelu yango abomaki basoda 185000! Mokonzi Senakeribe abungisaki basoda na ye nyonso ya mpiko. Lokola azalaki na eloko mosusu ya kosala te, azongaki epai na ye na nsɔni. Yehova abatelaki Ezekiasi mpe Yerusaleme, kaka ndenge alobaki. Soki ozalaki na Yerusaleme, olingaki kotyela Yehova motema?