LITEYA 56
Batelá bomoko ya lisangá
Ntango tozalaka elongo na bandeko ya lisangá, tomonaka bosolo ya maloba oyo ya mokonzi Davidi. Alobaki boye: “Ezali mpenza malamu mpe esengo ete bandeko báfanda na bomoko!” (Nzembo 133:1) Bomoko na biso eyá yango moko te. Mokomoko na biso asalaka makasi mpo na kobatela yango.
1. Likambo nini ya kokamwa emonanaka epai ya basambeli ya Yehova?
Soki okei na mboka mosusu mpe oyangani na makita ya lisangá, mbala mosusu oyebi te monɔkɔ ya mboka yango, kasi okomiyoka te ete ozali mopaya. Mpo na nini? Mpo biso nyonso na mokili mobimba tosalelaka kaka mikanda moko mpo na koyekola Biblia. Lisusu, tosalaka makasi tólingana na motema moko. Ezala tofandi na mboka nini, biso nyonso ‘tobelelaka nkombo ya Yehova mpe tosalelaka ye na bomoko.’—Sefania 3:9.
2. Okoki kosala nini mpo na kobatela bomoko ya lisangá?
Biblia elobi: “Bólinganaka makasi na motema moko.” (1 Petro 1:22) Ndenge nini okoki kosalela toli yango? Na esika ya kotala kaka mabunga ya bandeko, taláká nde bizaleli na bango ya malamu. Koluka kaka te kolekisa ntango elongo na bandeko oyo balingaka makambo oyo yo mpe olingaka, kasi luká mpe koyeba bandeko oyo bakeseni na yo. Yango wana, tosengeli kosala makasi tótika kokanisela basusu mabe.—Tángá 1 Petro 2:17.a
3. Okosala nini ntango bozwani matata na ndeko moko?
Tozali na bomoko, kasi tozali mpe bato ya kozanga kokoka. Na bantango mosusu, tokoki koyokisa basusu mpasi to mpe bakoki koyokisa biso mpasi. Yango wana Liloba ya Nzambe eyebisi biso ete: “Bókoba . . . kolimbisana . . . kaka ndenge Yehova alimbisaki bino na motema moko, bino mpe bósala bongo.” (Tángá Bakolose 3:13.) Tosalelaka Yehova masumu mbala na mbala, kasi alimbisaka biso. Yango wana alingi ete biso mpe tólimbisaka basusu. Soki oyebi ete ozokisi moto moko, luká kobongisa makambo ná moto yango.—Tángá Matai 5:23, 24.b
KƆTÁ NA MOZINDO
Luká koyeba makambo oyo okoki kosala mpo na kobatela bomoko mpe kimya ya lisangá.
Okosala nini mpo na kozongisa kimya?
4. Salá makasi otika kokanisela basusu mabe
Tolingaka bandeko na biso nyonso, kasi ekoki kozala mpasi tózala moninga ya moto oyo akeseni na biso. Nini ekoki kosalisa biso? Tángá Misala 10:34, 35, mpe na nsima yanolá na mituna oyo:
Yehova andimaka bato ya lolenge nyonso bákóma Batatoli na ye. Ndenge nini okoki komekola Yehova ntango otalelaka bato oyo bakeseni na yo?
Na esika ofandi, bato bakaniselaka basusu mabe na makambo nini? Mpo na nini osengeli koboya yango?
Tángá 2 Bakorinti 6:11-13, mpe na nsima yanolá na motuna oyo:
Okoki kosala nini mpo olinga bandeko oyo bakeseni na yo?
5. Limbisáká na motema moko mpe batelá kimya
Yehova alimbisaka biso na motema moko ata soki azalaka te na mposa ete tólimbisa ye. Tángá Nzembo 86:5, mpe na nsima yanolá na mituna oyo:
Ndenge nini Yehova alimbisaka biso?
Mpo na nini ozali na botɔndi ndenge Yehova alimbisaka?
Makambo nini ekoki kosala ete tózala na kimya te na basusu?
Ndenge nini tokoki komekola Yehova mpe kobatela bomoko ná bandeko na biso? Tángá Masese 19:11, mpe na nsima yanolá na motuna oyo:
Soki ndeko moko apesi yo mpasi, okoki kosala nini mpo na kobongisa makambo ná ye?
Na bantango mosusu, biso mpe topesaka basusu mpasi. Soki esalemi bongo, tosengeli kosala nini? Talá VIDEO, mpe na nsima yanolá na motuna oyo elandi.
Na video yango, ndeko mwasi asalaki nini mpo na kozongisa kimya?
6. Lukáká bizaleli ya malamu epai ya bandeko
Ntango tozali koluka koyeba bandeko na biso malamu, tokoyeba bizaleli na bango ya malamu mpe bolɛmbu na bango. Ndenge nini tokoki kotya likebi na bizaleli na bango ya malamu? Talá VIDEO, mpe na nsima yanolá na motuna oyo elandi.
Nini ekoki kosalisa yo otalaka bizaleli ya malamu ya bandeko?
Yehova atalaka bizaleli na biso ya malamu. Tángá 2 Ntango 16:9a, mpe na nsima yanolá na motuna oyo:
Koyeba ete Yehova atalaka nde bizaleli na yo ya malamu esali yo nini?
Ata diama ya kitoko ekoki kozala na mbeba, kasi ezalaka kaka na valɛrɛ. Ndenge moko mpe, bandeko na biso bazali bato ya kozanga kokoka, kasi bazali na valɛrɛ mingi na miso ya Yehova
SOKI MOTO ALOBI NA YO: “Kolimbisa moto ezali kobosana likambo te.”
Mpo na nini tosengeli kolimbisaka na motema moko?
NA MOKUSE
Tokoki kobatela bomoko ya lisangá soki tozali kolimbisa mpe kolinga bandeko nyonso.
Bozongeli
Okoki kosala nini mpo otika kokanisela basusu mabe?
Okosala nini soki ozali na matata ná ndeko moko?
Mpo na nini olingi komekola Yehova na likambo etali kolimbisa?
MAKANISI MOSUSU
Talá ndenge ndakisa moko oyo Yesu apesaki ekoki kosalisa biso tóboya kosambisa basusu.
Tosengeli kosɛnga bolimbisi ata soki tomoni ete tosali likambo moko ya mabe te?
“Kosɛnga bolimbisi ezali sɛkɛlɛ mpo na kozongisa boyokani” (Linɔ́ngi ya Mosɛnzɛli ya 01/11/2002)
Talá ndenge bato mosusu bayekolaki ndenge ya kosalela bato makambo kozanga koponapona.
Kosambisa te na kolanda oyo ezali komonana na libándá (5:06)
Luká koyeba ndenge oyo okoki kosilisa matata ná ndeko moko liboso ete elongola kimya na lisangá.
“Luká kosilisa matata na bolingo” (Linɔ́ngi ya Mosɛnzɛli ya 05/2016)