Yesu, bomoi na ye mpe mosala na ye

Moto abomami na ntango ya elambo

Nsima na kopesa bango mitinda, Yesu atindi bantoma na ye mibalemibale kati na teritware. Ekoki kozala ete Petelo akendaki elongo na ndeko na ye André, Yakobo elongo na Yoane, Filipe elongo na Bartelemi, Thomas elongo na Matai, Jacques elongo na Tadé mpe Simon elongo na Yuda moto na Keliota. Esika nyonso bazalaki koleka, bituluku motoba oyo ya basakoli bazali kosakola nsango malamu ya Bokonzi mpe bazali kobikisa na ndenge ya ekamwiseli bato oyo bazali na bokono.

Na ntango yango, Yoane mobatisi azali se na boloko. Eleki sikawa mibu mibale. Na ntembe te bozali komikundola likambo yango: Yoane alobaki polele ete Herode Antipas asalaki mabe na ndenge azwaki Hérodiade mwasi ya ndeko na ye ya mobali Filipe ete akoma mwasi na ye. Mpo ete Hérode Antipas azalaki komiloba ete azalaki kolanda Mibeko ya Moise, Yoane azalaki na elonga ya kopamela libala yango oyo ezalaki solo mpenza ekobo. Ezali na ntina yango ete Hérode abwakaki ye na boloko, mbala mosusu na bopusi oyo Hérodiade atyelaki ye.

Herode Antipas ayebi ete Yoane azali moto ya sembo mpe azali koyokamela ye na esengo. Azalaki mpenza kokakatana mpo na etumbu oyo akoki kopesa ye. Nzokande, Herodiade azali koyina Yoane mpe azali koluka ntango nyonso libaku ya kobomisa ye. Tala sikawa, libaku oyo azalaki kozela emonani.

Mwa ntango moke liboso na Pake ya mobu 32, Hérode asalisi elambo monene mpo na anniversaire. Abengisi bato minene ya boyangeli na ye mpe bakonzi na basoda, mpe bato oyo baleki minene na Galilai. Na elambo yango, elenge mwasi moko abimi na kati na bato mpo na kobina liboso na babyangami: nkombo na ye Salome, mwana oyo Herodiade abotaki na mobali na ye ya liboso, Filipe. Na ntembe te mabina na ye oyo ezali kolamusa mposa ya kosangisa nzoto, esepelisi mibali nyonso oyo bazali na esika yango.

Salomé asepelisi mpenza Hérode. Yango wana mokonzi apesi ye elaka oyo: “Senga ngai eloko nini elingi yo mpe nakopesa yo yango.” mpe akateli ye lisusu ndai ete: “Eloko nini ekosenga yo na ngai nakopesa yo, kino ndambo na bokonzi na ngai.”

Liboso ete asenga eloko ye alingi, Salome abimi mpe akei kotuna likanisi ya mama na ye: “Nasenga eloko nini?”

Libaku oyo azalaki kozela emonani! Kozanga kokakatana Hérodiade ayanoli ye ete: “Moto na Yoane Mobatisi.”

Na yango Salomé azongaki epai na Herode mpe alobi na ye: “Nalingi ete opesa ngai sikawa moto na Yoane Mobatisi.”

Likambo yango esali mpenza Herode mpasi na motema. Kasi, lokola babyangami na ye bayokaki ye kobimisa maloba yango, yango etungisi ye ete azanga kokokisa maloba ya elaka na ye, ata soko asengeli koboma moto oyo asali eloko te. Apesi etinda mpe bobele na ntango yango, moto moko ya makasi akei na boloko mpo na kokokisa etinda na ye oyo ya nsomo. Nsima na mwa ntango abimi na boloko na moto ya Yoane na sani mpe apesi yango epai na Salomé; mpe ye akumbi yango epai ya mama na ye. Koyokaka likambo oyo esalemi, bayekoli na Yoane bayei koluka nzoto na Yoane na boloko mpo ete bakende kokunda yango, bongo na nsima bakei koyebisa nsango yango ya mawa epai na Yesu.

Nsima na mwa mikolo, Herode ayoki nsango na Yesu oyo azali kobikisa bato na maladi mpe azali kobengana bilimu mabe, abangi, mpamba te amilobi ete moto yango ekoki kozala mpenza Yoane nde asekwisami na bakufi. Mpe alingi mpenza kokutana na Yesu, mpo na koyoka mateya na ye te, kasi mpo na koyeba soko makanisi na ye mazali solo to te. Matai 10:1-5; 11:1; 14:1-12; Malako 6:14-29; Luka 9:7-9.

◆ Mpo na nini Yoane akoti boloko, mpe mpo na nini Hérode alingi koboma ye te?

◆ Ndenge nini Herodiade azwi nzela ya kobimisa Yesu?

◆ Nsima na liwa na Yoane, mpo na nini Hérode alingi kokutana na Yesu?