Yesu, bomoi na ye mpe mosala na ye

Bayekoli mingi batiki kolanda Yesu

NA KAPERNAUME, kati na eyanganelo moko, Yesu alobeli mokumba oyo azali kokokisa lokola azali limpa ya solo euti na likolo. Lisolo na ye ebimisi koimaima kati na bato nyonso oyo bamonaki ye ntango azalaki kozonga wana eutaki ye na ngambo mosusu ya ebale Galilai, epai kuna balyaki mampa mpe mbisi oyo ekomaki mingi na nzela na ekamwiseli.

Yesu ayebisi likambo oyo mosusu: “Kwanga ekopesa ngai ezali mosuni na ngai mpo na bomoi na mokili.” Mibu mibale liboso, na ebandeli ya mobu 30, alobaki na Nikodeme ete Nzambe alingaki mokili mingi mpe apesi Mwana na ye bobele moko lokola Mobikisi. Na kotalela likambo oyo azali koyebisa sikawa, moto nyonso oyo akolya nzoto na ye na elobeli ya elilingi, na kozalaka na kondima na mbeka oyo akokokisa nsima ya mwa ntango, akoki kozwa bomoi ya seko.

Nzokande maloba yango ekweisi to ebetisi bayoki na ye libaku. Bongo Bayuda bamituni boye: “Ndenge nini moto oyo akoki kopesa biso mosuni na ye ete tolya yango?” Yesu alingi koyebisa bango malamu ete kolya nzoto na ye ezali na lolenge ya elilingi. Mpo na komonisa malamu likambo yango, abimisi likanisi moko oyo bato bakoki kondima yango te soki balandi yango ndenge ezali.

“Solosolo nazali koloba na bino ete, soko bokolya mosuni na Mwana na moto te mpe bokomele makila na ye te, bokozala na bomoi kati na bino mpenza te. Ye oyo akolyaka mosuni na ngai mpe akomelaka makila na ngai azali na bomoi na seko mpe ngai nakosekwisa ye na mokolo na nsuka. Mpo ete mosuni na ngai ezali bilei ya solo mpe makila na ngai ezali bimeli ya solo. Ye oyo akolyaka mosuni na ngai mpe akomelaka makila na ngai, akoumela kati na ngai mpe ngai kati na ye.”

Ya solo, soki Yesu azalaki kolobela mpenza likambo etali kolya mosuni ya moto, maloba na ye ezalaki ya kotyola mpenza. Kasi, azalaki kolendisa bayoki na ye te na kolya mosuni na ye to komela makila na ye mpenzampenza. Azalaki bobele komonisa ete baoyo nyonso balingi kozwa bomoi ya seko basengeli kondima mbeka oyo akopesa na kokabaka nzoto na ye ya moto na kokoka mpe na kosopaka makila na ye. Atako bongo, mingi kati na bayekoli na ye bango moko bazalaki kokanga ntina ya mateya na ye te mpe babimisi ntembe. “Oyo liloba makasi! Nani akoki koyoka yango?”

Koyebaka ete mingi kati na bayekoli na ye bazalaki koimaima, Yesu alobi na bango: “Likambo oyo ezali koleisa bino libaku? Soko nde bokomona Mwana na moto kobuta esika ezalaki ye liboso? . . . Maloba masili ngai kosolola na bino mazali elimo mpe bomoi. Kasi bamosusu kati na bino bazali kondima te.”

Yesu abakisi: “Mpo na likambo oyo nayebisaki bino ete moto akoki koya na ngai te, bobele soko epesameli ye longwa na Tata.” Na maloba wana, mingi kati na bayekoli na ye bakei mpe batiki kolanda ye. Na bongo Yesu amibaloli epai na bantoma na ye zomi na mibale mpe atuni bango: “Bino mpe bolingi kokenda?”

Petelo ayanoli: “Nkolo, tokenda epai na nani? Yo ozali na maloba na bomoi na seko; biso mpe tondimi mpe toyebi ete, yo ozali Mobulami na Nzambe.” Oyo elembo kitoko nini ya bosembo epai na Petelo mpe bantoma mosusu baoyo, nkutu, mbala mosusu bakangaki mpenza ntina ya mateya na Yesu te kati na likambo yango!

Lokola eyano ya Petelo esimbaki motema na ye, Yesu alobi boye: “Ngai nde naponi bino bazomi na mibale? Nde moko kati na bino azali molimo mabe”, to ebandeli ya etamboli mabe.

Yesu auti kolembisa bato na kotemelaka makanisi na bango ya komeka kotya ye mokonzi, mpe mbala mosusu bazali kokanisa boye: ‘Ndenge nini moto oyo akoki kozala Masiya nzokande azali koboya kosala mosala oyo ebongisami mpo na Masiya?’ Wana ezali mpe motuna oyo eyelaki bango nokinoki kati na elimo to na makanisi na bango. Yoane 6:51-71; 3:16.

◆ Yesu apesi mosuni na ye mpo na banani mpe na ndimbola nini tokoki koloba ete bato yango bazali ‘kolya mosuni na ye’?

◆ Maloba nini mosusu ya Yesu etungisaki bato, kasi ezali kolobela mingi likambo nini?

◆ Ntango bato mingi batiki kolanda Yesu, Petelo alobaki nini?