Yesu, bomoi na ye mpe mosala na ye

Ntina ya kobondela mpe ya komikitisa

LIBOSO, ntango azalaki na Yudea, Yesu apesaki lisese moko mpo na ntina ya kolendendela kati na libondeli. Sikawa ntango azali kokende na Yelusaleme mpo na mbala ya nsuka, alobeli lisusu makasi mpo na ntina na kobondela kozanga kotika. Akokaki kozala na Samaria to na Galilai ntango apesi lisese oyo mosusu na bayekoli na ye.

“Mosambisi azalaki na mboka moko, oyo abangaki Nzambe te mpe akanisaki moto te. Nde na mboka yango mwasi oyo akufeli mobali azalaki, mpe ayaki epai na ye mpe alobi ete: ‘Longisa ngai na ntina na moyini na ngai.’ Na liboso aboi, nde na nsima alobi na motema na ye ete: ‘Ata nabangi Nzambe te mpe nakanisi moto te, nde mpo ete mwasi oyo atungisi ngai, nakolongisa ye ete alembisa ngai na koya mingi boye te.” Yesu abimisi sika oyo liteya na lisolo na ye: “Yoka yango elobi mosambisi mabe! Nzambe akolongisa baponami na ye te, baoyo bazali kobianga ye moi na butu, mpe baoyo azali koyoka bango na motema molai?”

Na maloba oyo, Yesu alingi koloba soko moke te ete Jéhovah akokani na mosambisi mabe oyo. Kasi alingaki koloba ete soko mosambisi oyo mabe andimaki (alongisaki) masengami, Nzambe, oyo azali sembo mpe malamu, akoyokela kozanga ntembe basaleli na ye soko bakobondela kozanga kotika. Mpe abakisi: “Nalobi na bino ete [Nzambe] akolongisa bango nokinoki.”

Na ntango bazali kosala na kozanga sembo epai na babola mpe bato mpamba, mingimingi, bazali kopona mpo na bato oyo bazali bazwi mpe bazali na lokumu. Mpo na Nzambe, akosala bobele te ete bato mabe bazwa etumbu ezali sembo, kasi akobatela mpe na bosembo basaleli na ye, na kopesaka bango bomoi ya seko. Kasi bato boni bandimi mpenza ete Nzambe akolongisa bango nokinoki?

Na kolobaka mpo na nguya oyo libondeli ekoki kozala na yango mpo na kondima, Yesu atuni: “Kasi wana ekoya Mwana na moto, akokuta kondima awa na nse?” Atako eyano epesamaki te na motuna oyo, yango ezali komonisa ete bato moke nde bakozala na kondima motindo wana ntango Yesu akoya kati na nguya na Bokonzi. Tokoki koloba te ete moto moko te akomonisa kondima yango. Bongo yo, omonisaka kondima yango?

Na bayoki na Yesu, bamoko, kati na bango mbala mosusu bayekoli na Yesu, bazali komikumisa mpo na kondima na bango. Bazali komimona ete bazali sembo mpe bazali kotiola bamosusu, mpo na yango Yesu alobeli lisese oyo:

“Bato mibale babutaki kuna na Tempelo mpo na kobondela; moko Mofalisai mpe mosusu mokongoli na mpako. Mofalisai atelemi kobondela na ye moko ete: ‘Nzambe, natondi yo ete nazali lokola bato mosusu te, bayibi, bakeseni, bato na ekobo to ata lokola mokongoli na mpako oyo te. Nakokilaka mbala mibale poso na poso, nakokabolaka ndambo na zomi na biloko nyonso bizui ngai.”’

Bafalisai bayebanaki na ndenge bazalaki kolakisa bosembo na bango mpo na kokamwisa bamosusu. Mokolo na mibale mpe na minei, bazalaki na momesano ya kokila biloko oyo bamitielaki bango moko. Lisusu, bazali kofuta ndambo na zomi ata mpo na matiti mpamba na bilanga. Mwa basanza liboso, na ntango na elambo to eyenga na Mingombo babimisaki polele ezaleli na bango ya kotyola bato na kolobaka ete: “Ebele oyo na bato bayebi mibeko te [Elingi koloba ndimbola oyo Bafalisai bazali kopesa na Makomami], basili kolakelama mabe.”

Kati na lisese na ye, Yesu alobi mpo na moko kati na “baoyo balakelami mabe”: “Nde mokongoli na mpako atelemi mosika, alingaki ata konetola miso na likoló te, kasi abetaki ntolo na ye mpe alobi ete: ‘Nzambe, yokela ngai mawa, ngai moto na masumu!”’ Mpo ete mokongoli na mpako oyo andimaki na komikitisa nyonso mabunga na ye, Yesu alobi mpo na ye: “Nalobi na bino ete kati na bango mibale, ye wana akitaki na ndako na ye molongisami, mpo ete oyo akomizwela lokumu, lokumu na ye ekolongwa mpe oyo aboi lokumu, lokumu na ye ekozala monene.”

Na yango, Yesu alobeli lisusu makasi ntina ya kozala na komikitisa. Ekoki kokamwisa te ete bayekoli na Yesu bango moko batalelama na maloba oyo, soki totaleli lolenge na bomoi kati na yango bakolaki. Bafalisai, baoyo bazalaki komimona sembo mpe bazalaki na bopusi mingi; bato na ntango wana, bazalaki kokumisa mingi esika mpe lolenge na bomoi na moto. Kasi awa Yesu apesi mateya malamu mpo na komikitisa. Luka 18:1-14; Yoane 7:49.

◆ Mpo na nini Mosambisi mabe andimaki lisengi na mwasi mokufeli mobali, mpe liteya nini ezwami na lisese na Yesu?

◆ Ntango akoya, Yesu akoluka kondima ya motindo nini?

◆ Mpo na nini Yesu apesi lisese na Mofalisai mpe mokongoli na mpako?

◆ Ezalela nini na Bafalisai tosengeli koboya?