Nasala nini mpo ete nabika?”

NASALA nini mpo ete nabika?” Mokengeli moko na boloko na mboka Filipe, na mokili na Macédoine, ye moto atunaki motuna oyo na mobu 50 ya ntango na biso. Mabelé mautaki koningana mpe yango ebukaki bikuke ya boloko oyo ye azalaki kokengela. Akanisaki ete bato na boloko bakimaki mpe alingaki komiboma. Kasi moko kati na bakangami, nkombo na ye ntoma Paulo, alobaki na ye: “Omisala likambo mabe te! Mpo ete biso banso tozali awa.”​—Misala 16:25-30.

Paulo mpe moninga oyo azalaki na ye na boloko, Sila, bayaki na Filipe mpo na kosakola nsango ya lobiko, mpe na nsima bakangamaki mpo ete bakoselaki bango makambo. Lokola bakangami bakimaki te, mokengeli yango asepelaki mpe andimaki koyoka nsango ya Paulo mpe Sila. Asengelaki kosala nini mpo azwa lobiko oyo esakolamaki na bamisionere baklisto oyo mibale?

Na mikolo na biso, bato bazali ntango nyonso na mposa ya lobiko oyo Paulo mpe Sila bazalaki kosakola. Kasi, mingi kati na bango bazali koboya kondima ete lobiko ezali. Mbala mosusu bazali komona mabe na elobeli mpe lokoso ya bakonzi na mangomba oyo bazali komiloba ete bazali koteya bango nzela ya lobiko; to bazali kosepela te na mayoki ya lokuta oyo ezali komonana na ebele na mangomba oyo ezali kosakola nsango ya lobiko lokola eloko ya kozwela mosolo. Na ntina na basakoli yango ya lokuta, journaliste Philip Howard alobaki ete “bazali koluka nde kotambwisa mayoki ya bato mpe koluka mosolo na esika ete basimba elimo na bango.”​—Tala 2 Petelo 2:2.

Bato mosusu bazali komona mabe na mbongwana oyo ezali kosalema epai na bato oyo bandimi ete “babikisami”. Na mokanda na bango elobi ete Snapping, Flo Conway mpe Jim Siegelman balobeli makambo mingi matali lingomba-ata likambo ya “lobiko”-oyo mazali komonana uta mwa bambula. Bamonisi “mabe” ya makambo yango, mpe balobi ete bato bazali “kobendama” na mbongwana ya pwasa na bizaleli na bango, mbongwana oyo ezali komemela bango bosepeli mpe pole te oyo elakami, kasi yango ezali kobimisa se makanisi mpamba, ezali kokanga bango miso mpe bazali kokoka te kotalela makambo ndenge yango ezali. Bongo babakisi: “Likambo yango ezali lokola bato bazipami miso, mpe bazangi likoki ya kokanisa.”

Ezalaki bongo te mpo na baklisto ya ekeke ya liboso oyo bazalaki komona nzela ya lobiko. Ntango ntoma Paulo ayanolaki na motuna na ye: “Nasengeli kosala nini mpo nabikisama?”, mokengeli na boloko na mboka Filipe ‘azipamaki miso’ te. Epai mosusu, Paulo mpe Sila basalelaki ‘mayoki’ na ye te, to basengaki ye mosolo te. “Bayebisaki ye [nde] liloba ya Jéhovah.” Batindaki mobali yango ete akanisa, mpe basalisaki ye na kozwa boyebi na bibongiseli oyo bizwami na Nzambe mpo na kopesa lobiko epai na bato.​—Misala 16:32.

“Ndimela Nkolo Yesu”

Bamisionere baklisto oyo bafungolaki makanisi ya mokengeli na boloko mpo ete amona solo ya moboko na ntina na lobiko. Solo yango ekokani na oyo elimbolamaki na ntoma Petelo na ntango lisangá ya boklisto efungwamaki. Petelo abendaki likebi likoló na mosala monene oyo Klisto asalaki na likambo ya lobiko, mpe abengaki ye “Mokonzi na bomoi”. Alobaki lisusu: “Lobiko mpe ezali na moto mosusu te, mpo ete nkombo mosusu te esili kopesama awa na nse kati na bato ete tokoka kobika mpo na yango.” (Misala 3:15; 4:12) Paulo mpe Sila balakisaki soda mofilipié epai ya Mobandisi na lobiko, wana elobaki bango na ye ete: “Ndimela Nkolo Yesu mpe okobikisama.”​—Misala 16:31.

Kasi, kondimela Nkolo Yesu elimboli nini? Mpo na nini nkombo mosusu ezali te oyo na nzela na yango tokoki kobikisama? Bato banso bakozwa lobiko? Bantoma bazalaki kondima maloba oyo ete: “Soko obiki, obiki mpo na libela?” Mituna oyo mizali na ntina, mpamba te atako maloba mpe misala ya bakonzi na mangomba mingi ya ntango na biso esili kobungisa ntina ya lobiko, ata bongo, tozali se na mposa ya kobika. Biso banso tozali na mposa ya kozwa eyano ekoki mpe ya malamu na motuna oyo: “Nasengeli kosala nini mpo ete nabikisama?”