Yesu, mosala na ye mpe bomoi na ye

Akoti lisusu na temple

YESU na bayekoli na ye bauti kolekisa butu na bango ya misato na Betani uta balongwaki na Yeriko. Lelo, lundi le 10 Nisan, kotana na ntongo ekuti bango na nzela wana ezalaki bango kokende na Yelusaleme. Yesu ayoki nzala. Mpe, ntango amoni nzete na figi oyo ezali na bankasa, akei epai na yango koluka soko eboti mwa bambuma.

Bankasa na nzete oyo ebimi liboso na elaka, mpo ete elaka na mbuma na figi ebandaka na sanza ya Juin, mpe sikawa ezali bobele na nsuka ya sanza ya Mars. Nzokande, Yesu akanisi mbala mosusu ete, lokola nzete yango ebimisi bankasa liboso na ntango, bambuma ekoki mpe kobima liboso ya ntango. Kasi elikya na ye ekokisami te; bankasa emonisi nzete lolenge oyo yango ezali te. Na yango Yesu alakeli mabe nzete na figi wana na koloba ete: “Tika ete moto alya mbuma na yo lisusu te!’ Lisolo ekoya na periodike oyo ekoteya biso oyo ekomelaki nzete yango mpe ndimbola na elilingi oyo mpo na yango Yesu alakelaki mabe nzete wana ya figi.

Kolandaka mobembo na bango, Yesu na bayekoli na ye baumeli te nde bakomi na Yelusaleme, mpe Yesu akei na temple, oyo atalaki mokolo yango liboso na nsima ya midi. Nzokande, sikawa, asali likambo, lokola asalaki yango esili koleka mbula misato, na mobu 30, ntango ayaki kokumisa Elekeli. Abengani baoyo bazalaki kosomba na koteka kati na temple mpe abaloli bamesa na bato oyo bazalaki kosanzé mbongo, na bakiti ya batekisi na bibenga (bapizió). Apesi ata nzela epai na moto moko te na komema ata mwa eloko na kati na temple.

Na kopamelaká baoyo bazali kosanzé mbongo mpe batekisi na banyama kati na temple, alobi ete: “Ekomami te ete: ‘Ndako na ngai ekobyangama ndako na mabondeli mpo na mabota nyonso’? Nde bino bosili kozalisa yango esika na miyibi.” Bazali solo miyibi mpo ete babakisi ntalo mpo na bato oyo bakokaki kosala ndenge mosusu te bobele kosomba epai na bango banyama oyo basengeli mpo na kopesa mbeka na bango. Na yango misala oyo na mombongo ezali lolenge moko na kobotola to koyiba na miso na Yesu.

Ntango banganga minene, bakomeli mpe bato minene kati na bato bayoki nsango na likambo oyo Yesu asalaki, baluki lisusu nzela ya koboma ye. Na kosalaka bongo bamonisi ete bakoki kobongwana te. Kasi bayebi te ndenge nini bakoki koboma Yesu, mpo ete bato nyonso bazalaki koyoka ye.

Longola Bayuda na kobotama, Bato na Mabota bayaki mpo na Elekeli. Bazali bapakano oyo babongwanaki na kolanda lingomba na Bayuda. Tala sikawa Bagreke, na ndenge emonani, bango mpe babongwanaki na losambo na Bayuda, babelemi epai na Philippe mpe basengi nzela ya kokutana na Yesu. Philippe akei epai na André, mbala mosusu mpo na kotuna ye soki bokutani motindo yango ekozala ya mayele. Emonani ete Yesu azali naino na kati ya temple, epai kuna Bagreke bakoki komona ye.

Yesu ayebi ete atikali bobele na mikolo moke ya bomoi na ye, mpe asaleli lisese moko kitoko mpo na komonisa likambo na ye: “Ntango esili koya wana Mwana na moto akokumisama. Solo solo nazali koloba na bino ete, soko mbuma na blé ekokwea na mabelé mpe akokufa te, ekotikala bobele moko mpenza; nde soko ekokufa, ekobota mbuma mingi.

Mbuma moko na blé ezali na motuya mingi te. Kasi, ekokoma ndenge nini soki ekonami na mabelé mpe “ekufi’, na ndimbola ete ekozala nkona lisusu te? Ekobota mpe, ntango ekoya, ekobongwana nzete oyo ekobimisa bambuma mingi ya blé. Na lolenge ekokani, Yesu azali moto bobele moko ya kokoka na bomoi. Kasi, soki akufi sembo liboso na Nzambe, akomi nzela ya kopesa bomoi ya seko na bato oyo bazali sembo, baoyo bazali koboya makambo mosusu lokola ye. Ezali mpo na ntina yango Yesu alobi ete: Ye oyo alingi bomoi na ye akobungisa yango mpe ye oyo akoyina bomoi na ye kati na mokili oyo, akobatela yango kino bomoi na seko.”

Ezali solo ete Yesu azali kokanisa te bobele mpo na ye moko, mpamba te nsima apesi ndimbola oyo: “Soki moto akosalela ngai, tika ete abila ngai, mpe na esika ezali ngai mosali na ngai akozala wana lokola. Soki moto akosalela ngai, Tata akokumisa ye.” Oyo nde lifuti kitoko mpo na moto asili kolanda Yesu mpe asili kosalela ye! Ezali bongo kokumisama na Tata na kozalaka elongo na Klisto kati na Bokonzi.

Na kokanisaka mpo na minyoko minene mpe liwa ya nsomo oyo ezelaki ye, Yesu alobi lisusu: “Sasaipi molimo na ngai etungisami, naloba nini? Tata bikisa ngai na ntango oyo.” Ya solo, soki bobele likambo oyo ezelaki ye ekokaki kopengwisama mpo na ye! Kasi te, mpo alobi ete: “Kasi nakomi na ntango oyo mpo na likambo oyo.” Yesu andimi mpenza bibongiseli oyo Nzambe azwaki, kati na yango kokufa na ye lokola mbeka. Matai 21:12, 13, 18, 19; Malako 11:12-18; Luka 19:45-48; Yoane 12:20-27.

◆ Mpo na nini Yesu amilengeli kozwa mbuma na nzete ya figi wana ezali elaka na yango te?

◆ Mpo na nini Yesu abyangaki baoyo bazalaki koteka na temple ete bazalaki “miyibi’?

◆ Na ndimbola nini Yesu azali lokola mbuma na blé oyo ekufi?

◆ Yesu amiyoki ndenge nini wana ezali ye kokanisa mpo na bampasi mpe liwa oyo ezali kozela ye?