Yesu, bomoi na ye mpe mosala na ye

Na ntongo ya mokolo ya mosala mingi

ETIKI ye Yelusaleme na mokolo na Lundi na mpokwa, Yesu azongi na Betania, mboka oyo ezali na ekiteli na Est na ngomba na Olive. Mokolo na mibale mpo na mosala na ye ya nsuka na Yelusaleme eleki bongo. Na ntembe te, Yesu akei lisusu kolala epai na moninga na ye Lazare. Oyo ezali butu ya minei alekisi na Betania uta Vendredi oyo alongwaki na Yeriko.

Sikawa, tokomi Mardi 11 Nisan. Na ntongontongo, Yesu mpe bayekoli na ye bazongeli mobembo. Lelo ekozala mpenza mokolo na ntina mingi; mokolo motondi na mosala mingi koleka mikolo mosusu oyo Yesu asili kosala na boumeli ya mosala na ye. Akomonana na temple mpo na mbala ya nsuka. Mokolo yango mokozala mpe mokolo ya nsuka na mosala na ye liboso ete asambisama mpe abomama.

Mpo na kokende na Yelusaleme, Yesu mpe bayekoli na ye bazongeli bobele na nzela na ngomba na Olive. Pembeni na nzela oyo ezali kouta na Betania, ntoma Petelo amoni nzete oyo Yesu alakelaki mabe lobi eleki na ntongo. Alobi na ye ete: “Labuni, tala nzete na figi oyo elakelaki yo mabe, esili kokauka.”

Kasi mpo na nini Yesu akausaki nzete yango? Apesi bantina na maloba oyo: “Nazali koloba na bino solo ete, soko bozali na kondima mpe bokobeta ntembe te, bokosala bobele oyo esalami na nzete na figi oyo te, kasi ata soko bokoloba na ngomba oyo [ngomba na Olive, esika oyo bazalaki] ete: ‘Opikwa mpe obwakama na mai, ekozala bobele bongo. Nyonso ekolobaka bino na libondeli, soko bokondima, bokozwa yango.”

Na kokaukisaka nzete, Yesu apesi elakiseli epai na bayekoli na ye, komonisaka bango ete, bazali na mposa na kondima epai na Nzambe. Na yango, alobeli bango ete: “Biloko nyonso bizali bino kosenga na kobondela, bondima ete bosili kozwa yango mpe, ekozala na bino.” Wana ezali liteya na ntina mpenza, oyo esengeli na bango ete basimba malamu, mingimingi na ntina na komekama oyo ezali kozela bango nokinoki. Kasi, boyokani mosusu ezali kati na kufa ya nzete wana, mpe ezaleli ya kondima.

Lokola nzete wana na figi, libota ya Yisraele ezali na ezaleli ya bokosi. Na yango, atako Yisraele asalaki kondimana elongo na Nzambe, oyo na yango libota lizali komonana lokola ete lizali kotosa mitinda na Nzambe, eyaki komonana ete, Yisraele ezalaki na kondima te mpe ezalaki kobota mbuma te. Mpo na kozanga kondima, etikali moke libota yango ekoboya Mwana na Nzambe! Yango wana Yesu, na kobomaka nzete na figi, asaleli yango ndakisa na ntina mpenza, mpo na nsuka oyo ezali kozela libota yango ezangi bosembo, oyo ezali kobota mbuma te.

Nsima na mwa ntango moke, Yesu mpe bayekoli na ye bakoti na Yelusaleme. Bakei na temple lokola ezalaki momesano na bango, epai kuna Yesu abandi koteya. Banganga minene mpe mikolo na Yisrale, baoyo babosanaki te, likambo oyo Yesu asalaki lobi eleki epai na bato oyo bazalaki kosanze mbongo kati na temple, batuni ye motuna oyo na matumoli: “Ozali kosala makambo oyo na bokonzi nini? Nani mpe apesi yo bokonzi oyo?”

Mpe Yesu azongisi ete: “Ngai mpe nakotuna bino liloba moko, soko bokoloba na ngai, ngai mpe nakoyebisa bino na bokonzi nini nazali kosala makambo oyo. Libatisi na Yoane euti wapi? Na likoló soko na bato?”

Banganga wana mpe mikolo bakomi kotunana mpo na koluka eyano nini bakozongisela ye. “Soko tokoloba ete, na likoló, akoloba na biso ete: ‘Mpo na nini bondimaki ye te?’ Soki tokoloba ete: ‘na bato’ tokobanga ebele, mpamba te, nyonso batangi ete Yoane azalaki mosakoli.” a kozangaka eyano mpo na kozongisa, bakonzi wana balobi na Yesu boye ete: “Toyebi te.”

Yesu mpe alobi na bango ete: “Ngai mpe nakoloba na bino te mpo na bokonzi bozali ngai kosala makambo oyo.” Matai 21:19-27; Malako 11:19-33; Luka 20:1-8.

◆ Na nini Mardi 11 Nisan ekeseni na mikolo mosusu?

◆ Liteya nini Yesu apesi na kokaukisaka nzete na figi?

◆ Ndenge nini Yesu azongisi eyano na baoyo batunaki soko na bokonzi nini ye azalaki kosala makambo?