Nazali kosalela mobongisi monene

WANA ezalaki ngai naino elenge mwasi ya mibu nsambo, nabandaki komituna mituna miye: ‘Mpo na nini nasengeli kokufa mokolo mosusu? Likoki ya kokima liwa ezali?’ Bayebisaki ngai ete Nzambe azali kobenga bato malamu kuna na likoló mpo na kozala na bango esika moko na ye. Nazali komona lisusu moko ya baninga na ngai ya kelasi kolobaka te: “Ebongi malamu kozala moto mabe, mpamba te bato malamu bakufaka noki!”

Nalingaki mingi kosala ba dessins (bililingi), yango wana nabandaki boyekoli ya makambo matali dessin. Na eteyelo, nazalaki ata na libaku moko te ya kokanisa na makambo matali Nzambe to ntango ya kolekisa mpo na yango. Na bongo, nazalaki na momeseno ya koloba na baninga na ngai ete, mpo na kozala mondimi, esengeli kozala na mayele moke mpenza. Ntango nasilisaki kelasi na ngai mpo na makambo matali kosala ba dessins, nazwaki mosala ya profesere ya dessin na lycée moko.

Nazalaki kolinga mosala na ngai mingi, kasi nazalaki mpe kosepela na littérature italienne mpe ya mikili misusu, na musique de chambre, na musique symphonique mpe na teatre oyo esangani na miziki to opéra. Masolo bobele moko ya Nzambe oyo nayekolaki na boumeli ya ntango wana ezalaki ba tablo ya basantu oyo badesinatere basalaki na bileko bikeseni. Nayekolaki bongo likambo oyo elimboli koyebana mingi, esengo oyo moto ayokaka ntango azali kolakisa misala na ye mpe ete bato basepeli na ye, bazali kokumisa ye mpe balingi ye lokola azali artiste.

Mosala ya kodesiné to kosala bikeko ekomaki na motuya mingi mpo na ngai, mpamba te yango ekomaki ntina na ngai ya liboso ya kozala na bomoi. Nzokande, mituna oyo nazalaki komituna ntango nazalaki na mibu nsambo ezalaki naino kati na makanisi na ngai. Nazalaki ntango nyonso koluka mwa eloko moko ya bozindo, kasi nakokaki naino te kolimbola yango. Nazalaki motangi monene mpe nazalaki kozela filozofi ete epesa eyano na mituna na ngai. Na ndenge nyonso, nalukaki eyano ya sikisiki na mituna na ngai.

Makambo nyonso wana mazalaki se kotungisa ngai kino ntango nabalaki. Nsima na kobotama ya mwana na ngai ya mwasi, mposa na ngai ya koyeba solo ebakisamaki. Nazalaki komeka komona yango na kopakolaka langi na ba dessins, na kobongisaka maloba kitoko to ba poemes, na koyokaka miziki to na kotangaka. Mbala nyonso oyo nazalaki kokende na esika bazali kobeta miziki, wana ezalaki ngai koyoka banote ya liboso, makanisi na ngai mazalaki mpenzampenza kokende epai na Nzambe, epai na Mokonzi monene oyo nayebaki ye te, mpe nazalaki kotondo ye. Na boumeli ya eleko wana, nazalaki kokumisa Nzambe mbala na mbala mpo na bonzenga ya biloko oyo nazalaki kolinga ntango nazalaki komona bébé na ngai na mpongi; langi na zamba kitoko. Nazalaki komiloba: “Oyo mawa nini boye mpo na mosala kitoko oyo ekoki kolimbola malamu makambo kitoko, esalelami mbala mingi mpo na komonisa liwa kasi bomoi te!” Kati na ba poemes mosusu ya kitoko koleka to ba teatre ya kitoko mpenza ezali kosalelama lokola banzembo ya mawa to lisolo ya kobangisa; kati na batablo kitoko koleka, misusu ezali kokumisa liwa na esika ya kokumisa bomoi mpe bonzenga na yango. Mpo na nini?

Mayoki wana ya bongolabongola ezalaki kolembisa ngai mpe nabandaki kobungisa esengo na ngai nyonso. Ezali na ntango wana nde ba Témoins de Jéhovah bayaki na ndako na ngai. Na koyokaka bango, nakanisaki ete nazali koyoka lokota ya sika. Elaka na Nzambe ya kobongola mabelé ezala paradis ezalaki na matoi na ngai lokola miziki kitoko. Nabandaki kotanga Biblia, mpe kati na yango nazwaki eyano na mituna oyo nazalaki komituna ntango nyonso uta ntango nazalaka na mibu nsambo. Nzambe alingaka te ete bato bakufa; nkutu azali kokana kopambola basaleli na ye ya sembo na kopesaka bango bomoi ya seko na mabelé.

Likambo yango esalemaki na 1973. Mobu molandaki, namipesaki na Jéhovah mpe nazwaki batisimo. Ezalaki na ngai petee te mpo na kobongola ezalela na ngai ya kosilika nokinoki mpo na kolona bolingo ya solo ya bondeko, kolongola ezaleli na ngai ya moimi mpo na kolona bolingo, mpe mposa na ngai ya kozala na biloko ya motuya mpo na kolona elimo ya komipesa! Nasengelaki komiboya ngai moko. Ba Témoins de Jéhovah basalisaki ngai mingi, elongo na makita oyo mazalaki kosalema na Salle du Royaume.

Mobongisi monene asilisaki ntembe na ngai nyonso mpe mitungisi na ngai. Nazali mpenza na botondi mingi epai na ye, Tala ntina, kobanda Septembre 1984, nabandaki mosala ya pionnier permanent: nazali kolekisa ngonga 90 mpo na kosakola nsango malamu ya Bokonzi na Nzambe sanza nyonso.

Nazali na nsai ya solo mpo na kosalela Motongi monene mpe Mobongisi monene, Jehovah elongo na libota na ngai. Tozali kozela na motema likoló ntango oyo akotia mokobo na tablo oyo eleki nyonso wana ekolimwisa ye na mabelé mobimba biloko mabe na ntango oyo. Liwa ekozala te mpe mosala ya kodesiné ekolobela mpenzampenza bomoi. Bato bakobanda bobele komonisa makambo oyo mazali kitoko, mpamba te, na ebongiseli ya sika oyo etiami na Nzambe, mpasi mpe mitungisi ekolimwa mpo na libela. Lisolo euti epai na moko na batangi na biso.