Yesu, bomoi na ye mpe mosala na ye

Libondeli ya nsuka kati na eteni na ndako na likoló

KOTONDAKA na bolingo mozindo mpo na bantoma na ye, Yesu abongisi bango mpo na kokende na ye oyo ebelemi. Nsima wana alendisaki bango mpe ayikisaki bango mpiko mpenza, anetolaki miso na likoló mpe abondelaki epai na Tala na ye ete: “Kumisa Mwana na yo ete Mwana na yo akumisa yo. Pelamoko esili yo kopesa ye bokonzi likoló na bato nyonso ete apesa bomoi na seko epai na bango nyonso osili kopesa ye.”

Yesu akotisi lisolo moko oyo ezali kosimba motema: bomoi ya seko. Lokola azwaki “bokonzi likoló na bato nyonso,” akoki kosalela matomba na mbeka na ye na lisiko epai na bato nyonso oyo bakweisamaki na liwa. Kasi, akopesa bomoi ya seko bobele epai na bato oyo bandimami na Tata na ye, Kolimbolaka lisolo oyo, bomoi ya seko, Yesu alandeli libondeli na ye na kolobaka:

“Oyo ezali bomoi na seko ete bayeba yo Nzambe moko na solo mpe motindami na yo, Yesu Klisto.” Ya solo, lobiko ezali kotalela boyebi na ntina etali Nzambe mpe Mwana na ye. Kasi boyebi ya likolólikoló ekoki te.

Moto asengeli koyeba Nzambe mpe Mwana na ye na mozindo mpe kokolisa elongo na bango boyokani ya penepene. Moto asengeli kozala na mayoki lokola bango mpe kotalela makambo lokola bango bazali komona. Mpe na nyonso, moto asengeli kosala makasi mpo na komekola bizaleli na bango oyo bikokani na mosusu te kati na boyokani elongo na bato mosusu.

Yesu akobi na kolobaka: “Ngai nasili kokumisa yo na (mabelé), nasilisi mosala mopesi yo ngai ete nasala yango.” Lokola, kino sikawa akokisaki mosala na ye mpe ete andimisami ete ekokoba na mikolo mizali koya, asengi epai na Nzambe ete: “Tata, kumisa ngai pembeni na yo na lokumu lozalaki na ngai pembeni na yo liboso, naino mokili mozalaki te.” Asengi ete azongisama, na nzela ya lisekwa, kati na nkembo na likoló oyo azalaki na yango na liboso.

Kolobeláká na mokuse mosala ya ntina oyo akokisaki na mabelé, Yesu alobi: “Nasili (komonisa) nkombo na yo epai na bato baoyo opesaki ngai bango uta na mokili. Bazalaki bato na yo mpe opesi ngai bango mpe batosi liloba na yo,” Yesu asalelaki nkombo ya Nzambe, Jéhovah, kati na mosala na ye mpe alakisaki ebengeli na yango ya solo, kasi alakisaki bobele nkombo na Nzambe epai na bantoma na ye te. Lisusu akolisaki boyebi na bango na ntina etali Jéhovah, bomoto na ye mpe mikano na ye, mpe botondi na bango epai na ye.

Mpo na komonisa ete Jéhovah azali Mokonzi na ye mpe ete azali kolanda litambwisi na Ye, Yesu alobaki maloba malandi na komikitisa nyonso ete: “Maloba mapesi yo ngai, nasili kopesa bango yango mpe bayambi yango, mpe bayebi solo ete nabimi (lokola momonisi na yo, MN), mpe basili kondima ete yo otindi ngai.”

Kosalaka bokeseni kati na bayekoli na ye mpe bato mosusu, Yesu akobi na libondeli na ye na kolobaka ete: “Nazali kobondela na ntina na bango; nazali kobondela na ntina na mokili te kasi na ntina na baoyo osili kopesa ngai . . . Ezalaki ngai na bango elongo, nabatelaki bango . . . ; nasenzelaki bango, moko kati na bango abebaki te bobele mwana na libebi,” elingi koloba Yuda Mokeliota. Bobele na ntango yango, Yuda akokisi mosala na ye ya mabe, oyo ya kokaba Yesu. Na yango, kozanga koyeba, akokisi Makomami.

Yesu alobi: “Bamokili basili koyina bango . . . Nalombi te ete olongola bango na mokili, kasi ete obatela bango na ye mabe. (Basangani) na mokili te pelamoko ngai (nasangani) na mokili te.” Bayekoli ya Yesu bafandi kati na mokili, lisangá ebongisami ya bato oyo eyangelami na Satana, kasi bakabwani na mokili mpe na mabe na yango, mpe basengeli ntango nyonso kotikala bongo.

Yesu alobi ete: “Bulisa bango na nzela ya solo; liloba na yo lizali solo.” Awa, azali kobenga Makomami na liebele oyo azali kotanga ntango nyonso ete “solo.” Kasi mateya oyo apesaki epai na bayekoli na ye mpe Makomami na greke ya boklisto, oyo basengelaki kokoma na nsima, na kopemama na Nzambe mabengami mpe ete “solo.” Solo yango ekoki kobulisa moto, kobongola mpenza bomoi na ye mpe kosala ete azala moklisto oyo akabwani na mokili.

Sikawa, Yesu abondeli “bobele mpo na bango te kasi mpe mpo na baoyo bakondima ye mpo na maloba na bango.” Na yango, Yesu abondeli mpo na baoyo bakozala bayekoli na ye bapakolami mpe bayekoli mosusu baoyo bakoyanganisama kati na “etonga moko.” Nini asengi mpo na bango nyonso wana? “Bazala moko pelamoko yo, Tata, ozali kati na ngai mpe ngai kati na yo, . . . ete bazala moko pelamoko biso tozali moko.”

Yesu na Tata na ye basali moto moko te. kasi bazali na boyokani na makambo nyonso. Yesu abondeli mpo ete bayekoli na ye bazala na bomoko lokola bango, ete “bamokili bayeba ete yo otindi ngai mpe osili kolinga bango pelamoko elingaki yo ngai.”

Mpo na baoyo bakozala bayekoli na ye bapakolami, Yesu asali sikawa libondeli epai na Tata na ye na likoló. Libondeli nini? “Bazala na ngai elongo na esika ezali ngai ete bamona nkembo na ngai esili yo kopesa ngai, mpo ete olingaki ngai liboso ya kozalisama na mokili“, elingi koloba na ntango oyo Adam mpe Eva babotaki mwana na bango ya liboso. Liboso na ntango yango, Nzambe alingaki Mwana na ye bobele moko, oyo akomaki Yesu Klisto.

Kosukisaka libondeli na ye, Yesu alobi lisusu ete: “Nayebisaki bango nkombo na yo mpe nakoyebisa yango ete bolingo bolingaki yo ngai na yango bozala kati na bango, ngai mpe kati na bango.” Mpo na bantoma. koyeba nkombo ya Nzambe elimbolaki koyeba mpo na moko na moko na bango bolingo na Nzambe.​—Yoane 17:1-26; 10:16; Masese 8:22, 30.

▪ Na ndimbola nini Yesu azwaki “bokonzi likoló na bato nyonso”?

▪ Koyekola koyeba Nzambe mpe Mwana na ye elimboli nini?

▪ Na balolenge nini Yesu amonisaki nkombo ya Nzambe?

▪ “Solo“ ezali nini, mpe ndenge nini ezali ‘kobulisa’ moklisto?

▪ Na ndimbola nini Nzambe, Mwana na ye mpe basambeli na ye nyonso ya solo bazali moko?

▪ Na ntango nini “kozalisama na mokili” esalamaki?