Tolanda kotambola kati na pole mpe na bolingo

NDIMBOLA ya makambo na ntina na mokanda ya liboso na Yoane

JÉHOVAH azali liziba na pole mpe na bolingo. Ezali epai na Nzambe nde tosengeli kobutwa mpo na ko zwa pole na elimo. (Nzembo 43:3) Nzokande, bolingo ezali moko na bambuma ya elimo santu na ye.​—Bagalatia 5:22, 23.

Pole, bolingo mpe makambo mosusu masili kolobelama kati na mokanda ya liboso ya ntoma Yoane, moye mopemamaki na Nzambe. Mingi mpenza, mokanda yango mokomamaki na Efese to na bamboka ezali zingazinga na yango, pene na mobu 98. Ekomamaki na mokano ya kobatela baklisto longwa na lipengwi mpe kosalisa bango na kolanda kotambola kati na pole. Mpo ete bolingo na biso, kondima na biso mpe bosembo na biso mpo na solo ezali kotyama na komekama, boye tokozwa mpenza matomba na botaleli ya mokanda yango.

‘Totambola kati na pole’

Yoane alimboli ete baklisto ya sembo basengeli kotambola kati na pole ya elimo. (1Yn 1:1–2:29) Alobi ete: “Nzambe azali pole mpe molili [ya misala mabe to ya mbindo] mozali kati na ye te.” ‘Kotamboláká kati na pole,’ baklisto bapakolami na elimo basili ‘kozalana na lisangá’ elongo na Nzambe, elongo na Klisto mpe bamoko elongo na bamosusu. Basili kosukolama na masumu na nzela na makila na Yesu.

Ata soko tozali baklisto bapakolami, baoyo bazali na elikya ya bomoi na likoló, to mpe tozali na elikya ya kozala na bomoi ya seko na mabelé, tokoki kozwa litomba na mbeka na Yesu bobele soko tolingi bandeko na biso, kasi mokili te. Tosengeli mpe kozela ete tomitika kopusana na bapengwi te, lokola “motemeli na klisto,” oyo azali koangana Tata mpe Mwana. Mpe kobosana soko moke te ete bobele baoyo bakangami na solo mpe bazali kosalela boyengebene nde bakozwa esengo ya kozala na bomoi ya seko.

Bana na Nzambe bakomonisaka bolingo

Sikawa Yoane amonisi bana na Nzambe. (3:1–4:21) Epai moko, bazali kosala makambo malamu; epai mosusu bazali kotósa mitinda na Jéhovah na ntina etali ‘kozala na kondima na nkombo na Mwana na ye Yesu Klisto mpe kolingana bamoko na bamosusu.’

Moto oyo azali na “boyebi na Nzambe,” ayebi mikano na Jéhovah mpe ayebi lolenge nini bolingo n Ye emonisamaka. Yango esengeli kosalisa moko wana na komonisa bolinga Ya solo, “ye oyo akolingaka te, ayebi Nzambe te, mpo ete Nzambe azali bolingo.” Bolingo na Nzambe emonanaki ntango “atindaki Mwana na ye bobele moko lokola mbeka na lisiko mpo na biso.” Mpo ete jéhovah alingi biso mingi, biso mpe kosengisami na kolingana bamoko na bamosusu. Na yango, moto na moto oyo akolobaka ete alingi Nzambe, asengeli mpe kolinga bandeko na ye ya elimo.

Kondima ‘ekolóngaka mokili’

Bolingo ezali kopusa bana na Nzambe na kotósa mitinda na ye, kasi ‘bakolónga mokili nde na kondima.’ (5:1-21) Kondima na biso epai na Nzambe, na liloba na ye mpe epai na Mwana na ye, ezali kopesa biso nzela na ‘kolónga mokili’ na kobwakáká makanisi na yango ya libunga, banzela na yango ya mbindo mpe na kotósáká mitinda na jéhovah. Nzambe asili kopesa elikya ya bomoi na seko epai na baoyo ‘basili kolónga mokili’ mpe akoyokaka mabondeli na bango oyo mazali na boyokani na mokano na ye. Mpo ete “moto na moto oyo asili kobotama na Nzambe akosalaka masumu te,” Satana akoki kolónga motindo na moto wana te. Kasi, ata bapakolami to basaleli na jéhovah baoyo bazali na elikya ya kozala na bomoi na mabelé, basengeli komikundola ete “mokili mobimba mozali na nsé na nguya na ye oyo mabe.”

[Etanda/​Elilingi na lokasa 29]

Mbeka na lisiko: Yesu azali “mbeka ya lisiko mpo na masumu na biso [oyo ya bayekoli na ye bapakolami]. Kasi bobele mpo na yango na biso te, nde mpo na mokili mobimba,” bato nyonso oyo batikali. (1 Yoane 2:2) liwa na ye ezalaki “lisiko” (na greke hi·la·smosʹ, oyo elimboli “mbondi”), kasi ezali te na ndimbola ya kosilisa nkanda na Nzambe. Mbeka na Yesu esili kolembisa, to kokokisa masengami na boyengebene na kokoka ya Nzambe. Lolenge nini? Na kopesáká moboko ya boyengebene, ya sembo, moye mokopesa nzela na lilimbisi na masumu na biso, mpo ete Nzambe “azali moyengebene mpe akolóngisa moto [abotami na masumu] nani akondima Yesu.” (Baloma 3:23-26; 5:12) Na kopesáká mwango ya kobongisa mpenza masumu na bato, mbeka na Yesu ebongisaki likambo yango, na boye ete moto akoki sikawa koluka mpe kozala na boyokani malamu elongo na Jéhovah. (Baefese 1:7; Baebele 2:17) Biso banso tosengeli kotonda ye.