Mituna na batangi

◼ Mpo na nini Yesu asalaki Ekaniseli bobele elongo na bantoma, kasi elongo na bayekoli mosusu te oyo basengelaki mpe koyambama kati na kondimana na sika?

Emonani lokola ete motuna oyo mouti na likanisi mabe oyo ete, na mpokwa wana, Yesu ayanganaki na bantoma na ye mpo na kokumbisa Elambo na Nkolo elongo na lisangá na boklisto lisalemi na baklisto bapakolami oyo basilaki kokɔtisama kati na kondimana na sika. Ya solo, na mokolo ya 14 Nisan ya mobu 33, lisangá na boklisto naino esalemaki te, nde Yesu ayanganaki elongo na bantoma na ye mpo na elambo ya mbula na mbula ya Pasiká na Bayuda.

Ya solo, Yesu azalaki na bayekoli mosusu longola mibali 12 oyo bayebanaki lokola bantoma. Na mobu oyo mozalaki liboso na kufa na ye, atindaki bayekoli 70 ete basala mobémbo mpo na kosakola nsango malamu. Nsima na lisekwa na ye, ”amonanaki na bandeko koleka nkámá mitano na mbala moko.’’ Mpe bayekoli “soko monkámá na ntuku mibale” bayanganaki na mokolo ya Pantekɔte. (1 Bakolinti 15:6; Misala 1:15, 16, 23; Luka 10:1-24) Kasi tolalela naino etuluku oyo ezalaki elongo na Yesu wana asalaki feti ya mbula na mbula oyo ebéngami ete Elambo na Nkolo.

Luka 22:7, 8 elakisi ntango oyo elambo yango esalemaki. Totangi boye: “Mokolo na mampa mazangi mfulu ekomaki, mokolo mokokaki na koboma mwana na mpate na Pasiká. Bongo Yesu atindaki Petelo na Yoane, mpe alobaki ete: “Bokenda kobongisa Pasiká mpo na biso ete tolya yango.” Balobaki ete: “Olingi ete tobongisa yango wapi?” Alobaki na bango ete: “Wana okokɔta bino na mboka, mobali moko akozwana na bino komema mbeki na mai. Bolanda ye kati na ndako kuna ekokota ye mpe boloba na nkolo na ndako ete ‘Molakisi alobi na yo ete: “Wapi eteni na ndako kuna ekolya ngai Pasiká elongo na bayekoli na ngai.’”” Na mpokwa wana, Yesu ayanganaki bobele elongo na ba 12 mpo na feti ya Bayuda. Alobaki na bango ete: “Nazalaki na mposa mingi ya kolya Pasika oyo elongo na bino, naino ezwi ngai mpasi te.”​—Luka 22:11, 15.

Uta kobandisama na yango na Ezipito, Pasiká ezalaki feti ya libota. Na ntango Pasiká esalemaki, Nzambe alobaki na Moïse ete libota moko na moko lisengelaki koboma mwana na mpate moko. Soki nde libota lizali moke mingi na boye ete ekokoka te kosilisa mobimba na mwana na mpate, esengelaki na bango kosangana na libota mosusu lizali penepene na bango te balya elambo yango elongo. Ebongi bongo kokanisa ete, mpo na Pasiká ya mobu 33, bayekoli mingi na Yesu bayanganaki elongo na mabota na bango mpo na kolya elambo yango lokola ezalaki momeseno na bango.

Kasi Yesu azalaki na “mposa mingi” ya kolekisa Pasiká ya nsuka na ntina mingi mpe butu ya nsuka oyo ezalaki liboso na liwa na ye, elongo na bayekoli na ye ya penepene, baoyo bazalaki elongo na ye na boumeli ya ndambo monene ya mosala na ye. Nsima na elambo wana ya Pasiká, Yesu alobelaki bango na ntina na feti na sika oyo bayekoli na ye nyonso basengelaki kokumisa yango na ntango ekoya. Vinyo oyo esengelaki kosalelama na feti wana na boklisto, elakisi makilá ya “kondimana na sika” oyo esengelaki kokitana kondimana na Mibeko.​—Luka 22:20.

Nzokande, na mpokwa ya 14 Nisan ya mobu 33, kondimana na sika ezwaki naino nguya na yango te, mpamba te Yesu, mbeka oyo esengelaki kopesa motuya na yango, epesamaki naino te. Kondimana na Mibeko ezalaki bobele kokokisa mosala na yango. Kondimana na Mibeko ekakisamaki naino likoló na nzete te. Epai mosusu, bobele na mokolo na Pantekɔte nde emonanaki ete kondimana na sika oyo esalemi elongo na Yisraele na elimo, ekitanaki kondimana na kala oyo esalemaki elongo na Yisraele ya mosuni.​—Bagalati 6:16; Bakolose 2:14.

Na yango, ezala bantoma 11 na sembo to mpe bayekoli nyonso mosusu, bakɔtisamaki te kati na kondimana na sika na mpokwa wana. Ezalaki te mpo na koboya kondima Bayuda mosusu oyo bazalaki bayekoli na ye nde Yesu atikaki bango koyangana elongo na mabota na bango mpo na kokumisa Pasiká.