Koyanganisama na basambeli

NTOMA Yoane azwaki emonaneli ya makambo na kokamwa oyo masengelaki kosalema na “mokolo na Nkolo.” Amonaki Nkolo Yesu Klisto kobuta na mpunda mpembe, elembo ya etumba na sembo, mpe kobima “mpo na kolonga mpe kolonga lisusu.” Mosala na ye ya yambo ezalaki bongo kobengana Satana na likoló, ye monguna ya liboso ya Nzambe, mpe abwakaki ye awa na mabelé. Satana asilikaki, mpe uta ntango yango azali koyeisa likoló na bato bampasi lokola emonanaki liboso te​—Koboma bato ebele na mbala moko, nzala, mpe maladi—​emonisami na elilingi ya batambwisi na mpunda oyo bamati likoló na bampunda ya langi ekeseni: motane, moindo, mpe ya langi lokola mpondu. (Emoniseli 1:10; 6:1-8; 12:9-12) Bampasi oyo ebandaki na 1914 mpe eyaki makasi mbula na mbula. Etikali ntango moke ekokoma na nsuka na yango kati na eleko oyo Yesu abengaki ete “bolozi monene oyo emonanaki longwa na ebandeli te. Ekobima mpe boye lisusu te.”​—Matai 24:3-8, 21.

Ndenge nini makambo masengelaki kozala mpo na basambeli ya Jéhovah na ntango wana? Emoniseli mokapo 7, versets 1 kino 10, elobeli na ntina na baanzelu ya nguya “basimbaki” mipepe ya libebi kino basambeli na Nzambe basila naino koyanganisama. Uta 1914, batikali na basangani 144 000 ya Yisraele na elimo oyo bazali naino awa na mabelé basilaki koyanganisama. Esengelaki lisusu koyanganisa “ebele monene, oyo moto te akoki kotanga motuya na bango; bauti na mabota nyonso, na mikili nyonso, na bikolo nyonso, na minoko nyonso.” Bamilió na bato basili komikotisa kati na ebele monene yango. Bazali kotelema liboso na kiti na bokonzi na Nzambe; ye oyo andimi bango mpo bamonisi kondima na bango kati na mbeka ya lisiko na Yesu, oyo abomamaki lokola mwana na mpate oyo azangi lisumu. “Bazali konganga na mongongo makasi ete: ‘Lobiko na Nzambe na biso oyo afandi na kiti na Bokonzi, mpe na Mwana na Mpate.’” Basambeli wana ya molende bazali koloba ntango nyonso na bato mosusu ete “Yaka!”; bato yango, na ngala na bango mpe bayanganisami mpo na kobika na “bolózi monene.”​—Emoniseli 7:14-17; 22:17.

“Na mokili mobimba”

Tokoki koloba mpo na basambeli wana ya sembo ete: “Lokito na bango ekomi na mokili mobimba, maloba na bango kino nsuka na mokili.” (Baloma 10:18) Mosala na bango ya molende eboti mbano kitoko. Tala mwa ndakisa na yango:

Mokili ya Mexique ekomi sikawa na basambeli ya molende 335 965, to pene na basambeli 100 000 likoló na motuya na bango oyo bazalaki esili koleka mibu misato! Mpo na nini bokoli ya motindo oyo? Na ntembe te lisoló oyo lilandi likosunga biso mpo na koyeba ntina ya bokoli yango. Elenge mobali moko na nkombo Aurelio, azalaki mosaleli kati na lingomba ya Katolike. Mbala na mbala ntango ba Témoins bazalaki koya na mboka, ye azalaki kobeta ngonga mpo na kokebisa bato ete bayoka bango te. Mokolo moko asombaki libongoli na Biblia moko ya katolike Bible de Jérusalem, mpe abandaki kotanga yango, kasi azalaki kokanga ntina ya makambo oyo azalaki kotanga te. Na nsima akutanaki na moko na baninga na ye oyo azalaki na Biblia moko Traduction du monde nouveau na mabɔkɔ na ye. Aurelio apamelaki ye mpe alobaki na ye ete Biblia na ye ezalaki ya mabe, amemaki ye epai na ye mpo alakisa ye Biblia ya “solo.” Moninga na ye alobaki na ye ete: “Tanga Exode, mokapo 20,” mpe akendaki.

Mosaleli wana ya katolike abandaki botangi na ye na mokapo ya liboso mpe atangaki mokanda ya Exode kino akomaki na mokapo 20, versets 4 mpe 5. Akamwaki na komona likambo oyo Biblia na ye ya Katolike ezalaki koloba na ntina na bikeko. Lomingo elandaki nsima ya misa, alakisaki sángó mikapo oyo mizalaki kolobela mpo na bikeko. Na ebandeli, sángó alobaki na ye ete azalaki nde kokumisa bikeko kasi azalaki kosambela yango te. Komonaka ete Aurelio andimaki te, afundaki Aurelio ete azali koyekola Biblia elongo na ba Témoins de Jéhovah. Aurelio awanganaki, mpe abakisaki ete: “Kasi sikawa na kosala yango.”

Ntango ba Témoins bayaki lisusu na mboka, Aurelio akendaki kosolola na bango mpe abandaki boyekoli ya Biblia elongo na bango. Atikaki mosala na ye na ndakonzambe, mpe nsima na sanza misato akokisaki masengami mpo na kosangana na mosala ya kosakola elongo na ba Témoins de Jéhovah. Ekuke ya liboso oyo abetaki ezalaki ya sángó, oyo andimaki te ete mosaleli na ye ya kala na ndakonzambe akokaki kobongwana kino kokoma mosakoli ya nsango malamu ya Bokonzi. Sángó abengisaki ye na kolobaka ete akobimisa ye na lingomba, kasi Aurelio alobaki na ye ete ezalaki na ntina te, mpamba te asilaki kolongwa na lingomba. Molende na ye epesaki mpiko epai na bato mingi ya mboka baoyo basilaki kobanda koyekola elongo na ba Témoins de Jéhovah. Aurelio mpe bato mosusu 21 ya mboka wana bazwaki batisimo na assemblée de district oyo elandaki. Bokoli ezali mingi na etúka yango na boye ete bobele nkulutu se moko nde azalaki kotalela mituna mpo na bato balingi kozwa batisimo elongo na etuluku wana.

“Lokito na bango eyokani”

Nzela ya kokima nsango na Bokonzi ezali te. Moto moko ya mboka Italie abandaki komona mabe lokola ba Témoins de Jéhovah bazalaki kozonga mbala na mbala. Ntango kompanyi na ye etindaki ye na Singapour, mokatolike yango alobaki ete sikawa esili, nakotungisama lisusu te. Kasi na kokamwa na ye monene, ba Témoins bazalaki mpe kuna. Na bongo asombaki bambwa mibale ya nkanda mpo na kobengana ba Témoins ya liboso oyo bakoya kotala ye. Ntango ba Témoins de Jéhovah mibale ya basi bayaki epai na ye, bambwa bangangaki. Lokola babangaki, basi yango bakimaki mpe wana ekomaki bango na motákanelo to carrefour, bakabwanaki nzela. Moko na bango, lokola mbwa abelamaki pene na ye, na kobanga nyonso abimisaki ba brochures mibale kati na sakosi na ye mpe akotisaki yango na monoko ya mbwa oyo efongwamaki monene. Mbwa yango etelemaki, ebalukaki, mpe ezongaki epai na nkolo na yango.

Poso elandaki, ba Témoins wana mibale bayaki kozongela moto moko akofandaka na lopango oyo etalani na ndako ya mobali wana. Mobali yango azalaki kati na elanga na ye mpe, kozanga komizela bandeko basi bakamwaki nakomona ete mobali yango apesi bango mbote mpe abengi bango baya epai na ye. Ayebisaki bango ete asolola naino na ba Témoins de Jéhovah te mpe atanga naino ata mokanda na bango moko te. Kasi akamwaki mingi na komona ba brochures kati na monoko ya moko na bambwa na ye. Atangaki yango bobele na mpokwa wana, mpe mikanda yango misepelisaki ye mingi. Atako azalaki mokatolike banda kobotama na ye, ayebisaki mposa ya koyekola Biblia elongo na ba Témoins de Jéhovah.

Lokola moto wana asengelaki kozonga na Italie, bibongiseli bikamatamaki mpo ete ba Témoins de Jéhovah ya ekolo wana bayekola elongo na ye kuna na mboka na bango. Wana ebandaki ye koyangana na makita ya boklisto elongo na mwasi na ye, sángó mokonzi, na nkanda nyonso, akanelaki bango makasi. Na nsima wana batyaki mɔ́tɔ na elanga na bango, bakataki boyokani nyonso elongo na lingomba ya Katolike. Moto yango alobi sikawa ete: “Nasili kopesa litatoli epai na basangani mingi ya libota na ngai, mpamba te nalingi bayeba ete Jéhovah azali bobele Nzambe moko ya solo.”

“Kino nsuka na mokili”

Lisoló mosusu liuti na nsuka na mokili limonisi ete nsango malamu na Bokonzi ezali kosimba mitema na bato mpe ezali kosalisa bango ete babongola bizaleli na bango. Mwasi moko na mokili Australie, ye Témoin de Jéhovah, akutanaki na ntango ya komilengela mpo na kobota, na mwasi mosusu oyo azalaki na bizaleli mingi ya mabe mpe ye aboyaki kotika komela makaya na ntango azalaki na zemi. Atungisamaki makasi mpo na ezaleli wana. Kozanga kokana yango, ekomaki ete bango mibale babotaki ntango moko mpe bafandaki na chambre moko, likambo oyo lipesaki bango libaku ete basolola. Mwasi oyo azwaki mikakatano mingi na bomwana na ye, mpe libala na ye ekomaki pene ya kokufa. Nsima na kobima na lopitalo, mwasi Témoin de Jéhovah akendeki kotala ye na ndako mpe abandaki koyekola Biblia elongo na ye, na kosalelaka mokanda Ndenge nini okoki kozala na bomoi ya libota na esengo.

Mobali ya mwasi oyo azalaki kosambela Nzambe uta mwa ntango ete asalisa ye na koyeba lingomba ya solo, kobakisáká bongo epekiseli oyo: “Kasi ezala ba Témoins de Jéhovah te!” Nzokande, ntango amonaki ete mwasi na ye azali koyekola elongo na ba Témoins de Jéhovah, abandaki kotuna mituna mpe basengaki ye asangana na boyekoli yango. Ezali yango nde asalaki, mpe mokemoke abandaki koyangana na makita ya lisangá. Sikawa, bango nyonso mibale, mobali mpe mwasi basili kozwa batisimo mpe, emonani na bato nyonso ete boyokani na bango kati na libala esili kobonga.

Ezali na koyekola Biblia na lisalisi na mikanda ya lolenge wana nde ntalo monene ya basambeli na sika bakokaki koyanganisama. Na mikili epai kuna ba Témoins de Jéhovah bakutanaki na botomboki, na bitumba ya bana mboka to na bipekiseli biuti na Leta, motuya ya boyekoli ya Biblia na bandako ebakisamaki. Na Angola, epai kuna bitumba bingalaki na boumeli ya bambula mingi, ba Témoins de Jéhovah bamoni mpasi mingi mpo na minyoko mpe kolela. Ba rapports emonisi ete na ebandeli ya mbula, mosakoli moko na moko azalaki kotambwisa na mwayene boyekoli misato, kasi mikanda mizali mingi te. Bakɛngɛli ya zongozonga bazalaki kokende kotala mokolo na mokolo etuluku moko ya basakoli, kobongisaka bongo mosala ya kosakola na moi mpe kotambwisaka makita na mpokwa nyonso. Oyo nde esengo bazalaki na yango ntango bayokaki ete etumba esili mpe 42 tonnes ya mikanda oyo elimbolaka Biblia ekomaki longwa na Afrike ya Ngele! Bolingo ya bandeko wana ‘ekoyikana lisusu mingi koleka esika moko na bososoli nyonso’ mpo ete ‘bakomimekisa na makambo makeseni.’ (Bafilipi 1:9, 10) Yango esengeli kopusa baoyo bazali na mikanda mingi mikolimbolaka Biblia na kozwa matomba na oyo nyonso Jéhovah azali kopesa biso kati na boboto na ye!​—1 Timoté 4:15, 16.

Esengo na basambeli wana ya sembo na Jéhovah ezali kokundwela biso maloba oyo Yesu alobaki kati na Lisoló likoló na ngomba: “Esengo na baoyo bazali kobanza mposa na bango ya elimo, mpo ete bokonzi ya makoki ezali na bango. . . . Esengo na baoyo banyokwami mpo na boyengebene, mpo ete bokonzi ya makoló ezali na bango. . . . Bosepela mpe bozala na esengo, mpo ete mbano na bino ezali monene kati na makoló.” (Matai 5:3-12) Oyo nde bobuki mbuma mingi esili kobanda kobukama mpo na ebombelo kuna na Angola!

Na mikili misusu, bipekiseli oyo batyelaki ba Témoins de Jéhovah bisili kokutwama to bisili kolongolama. Na eleko na ye, Yesu alobaki ete: “Ee mbuma na elanga eteli mingi mpenza nde basali bazali mingi te.” (Matai 9:37) Yango emonani solo lelo! Mposa ya basali ezali mingi. Tozali na esengo ete kosangana na mosala ya kobuka mbuma ezali eteni ya losambo na biso. Ezali na esengo ya koleka te lelo na mabelé longola bobele oyo ya kokokisa mpo na Jéhovah mosala moko ya motema sembo mpe ya kobota mbuma.

Kasi nini ezali kopusa basambeli na Jéhovah na kozala na esengo mingi mpe molende mingi boye? Ezali yango nde tokotalela.