Mozalisi na biso Monene mpe misala na Ye

OYO nde monene mpe bonzenga! Boeta: (chutes) minene ya Iguagu mpe ya Niagara, mingala mozindo ya Arizona mpe ya Hawaii, mabeke kitoko ya Norvege mpe ya Nouvelle-Zelande​—biloko wana ya kozalisama bizali kitoko mpo na kotala! Kasi yango ekoki mpenza kozala bobele biloko bibimi pwasa na nzela na oyo ebengami ete Mama ya biloko nyonso (Mere Nature)? Te, ekoki kozala boye soko te! Ezali nde misala kitoko ya Mozalisi moko Monene, Tata ya likolo oyo atondi na bolingo; mokonzi Salomo akomaki na ntina na ye ete: “Asalaki biloko nyonso kitoko na ntango na yango. Atii mpe likanisi ya kobika seko kati na mitema na bango, ete bato bayeba te mosala oyo Nzambe [ya solo] asalaki longwa na ebandeli kino nsuka.“ (Mosakoli 3:11, MN) Ya solo, esengeli na bato ete baumela seko mpo na kokoka koyeba misala nyonso ya nkembo oyo Mozalisi na biso atondisi na molongo.

Tozali solo na Mozalisi moko Monene! Mpe tozali mpenza na esengo ete Nzambe oyo mozwi-na-nguya-nyonso “asili koloba na biso na nsuka na mikolo oyo, na nzela na Mwana oyo asili kotya ye mosangoli na biloko nyonso, mpe na nzela ye asalaki bibongiseli na biloko nyonso.” (Baebele 1:2, MN) Mwana yango, Yesu Klisto, asepelaki mingi na biloko kitoko ya bozalisi ya Tata na ye. Alobelaki yango mbala mingi mpo na kolakisa mikano ya Tata na ye mpe mpo na kolendisa bayoki na ye. (Matai 6:28-30; Yoane 4:35, 36) “Na kondima,” mingi basosoli ete biloko na kokamwisa ya bozalisi ˈbityami na molongo na nzela na liloba na Nzambe.ˈ (Baebele 11:3, MN) Bomoi na biso ya mokolo na mokolo esengeli komonisa kondima motindo wana.​—Yakobo 2:14, 26.

Ya solo mpenza, biloko bizalisami na Nzambe na biso bizali mpenza minene mpe na bonzenga. Bizali mpenza komonisa mayele na ye, nguya na ye, boyengebene na ye mpe bolingo na ye. Na ndakisa, atengisaki mabele mpe asalaki yango ete ebalukaka zingazinga na moi na boye ete bato, bikelamu na ye oyo asengelaki kosala na nsima, bakoka kosepela na mbongwana kitoko ya bileko. Nzambe alobaki ete: “Mikolo nyonso oyo mokili mokoumela, ntango ya kolona mpe ntango ya kobuka mbuma, eleko ya mpia mpe eleko ya molunge, eleko ya mbula mpe eleko ya elanga, mpe moi na butu yango ekozanga te.” (Genese 8:22, MN) Lisusu, Nzambe atondisi mabele na mabanga ya ntalo mpe biloko mosusu ya motuya mingi na nse na yango. Liboso mpenza, apesaki mai mingi, oyo esengelaki kozala eloko ya ntina mpo na kobatela bomoi nyonso awa na mabele.

Na ‘mikolo motoba ya kozalisama’ oyo milandanaki, oyo moko na moko ezalaki na boumeli ya bankoto na bambula mingi, “Bokasi ya Nzambe bokosalaka mosala” ekobaki kobongisa mabele ete ezala efandelo na moto. Pole oyo mpo na yango tozali komona, mopepe oyo tozali kopema, mabele oyo tofandi likolo na yango, banzete, kolandana ya butu mpe moi, mbisi, bandeke, banyama​—nyonso wana ekelamaki na molongo na Mozalisi na biso Monene mpo na esengo mpe bolamu ya bato. (Genese 1:2-25) Solo mpenza, tokoki koloba lokola mokomi na Nzembo oyo angangaki ete: “Ɛ: Jehovah! Misala na yo mizali mingi mpenza. Osali yango nyonso na mayele. Mabele matondi na biloko yo osalaki.”​—Nzembo 104:24, MN.

Ekelamu na kokamwa kati na biloko bizalisami na Nzambe

Lokola “mokolo“ ya motoba ya kozalisama mokomaki na nsuka na yango, Nzambe asalaki moto mpe mosungi na ye, mwasi. Oyo nde bikelamu bileki na kokamwisa epai na biloko bizalisami na mabele, koleka biloko nyonso bikomonanaka oyo bizalaki liboso! Nzembo 115:16 (MN) eyebisi biso ete: “Na ntina na makolo, yango ezali mpo na Jehovah, nde apesi mabele epai na bana na bato.” Na yango, Jehovah asalaki biso milimo mpo ete tokoka kosepela na nyonso oyo asalaki liboso mpe tozwa matomba na yango. Tosengeli mpenza kozala na botondi mpo na miso na biso​—oyo eleki mpenza apareye nyonso ya fɔtɔ ya malamu mingi—​na yango tokoki komona balangi kitoko ya biloko bizingi biso! Tozali na matoyi​—oyo mazali malamu koleka bisaleli nyonso bisalemi na bato mpo na koyoka—​oyo mazali kosalisa biso na kosepela na masolo, na koyoka miziki mpe nzembo kitoko ya bandeke. Tozali mpe na ebongiseli ya koloba, kati na yango ezali na lolemo oyo ekokisaka mikumba ndenge na ndenge. Lolemo, elongo na zolo na biso, ezali kopesa biso nsai ya komeka ebele na biloko ndenge na ndenge. Tozali mpenza kosepela kosimbama na lobaka ya moto oyo alingi biso! Ya solo, tokoki mpenza kotando Mozalisi na biso, lokola mokomi na Nzembo oyo alobaki ete: “Nakotando yo mpo ete nasalami na motindo na kokamwa mingi. Misala na yo mizali ya kokamwa mpe molimo na ngai moyebi yango malamu.”​—Nzembo 139:14.

Boboto ya Mozalisi na biso

Mokomi na Nzembo akomaki ete: “Ɛ bino mabota, botando Jehovah mpo ete azali malamu . . . ; epai na Mosali na biloko ya kokamwa mpe minene, mpo ete boboto na ye ekoumela seko.” (Nzembo 136:1-4, MN) Boboto wana epusi sikawa na kosala biloko kitoko koleka nyonso oyo touti kolobela. Ya solo, awa epemi ye na kozalisa biloko ya mosuni, azali kozalisa kati na elimo. Azali kosala yango mpo na koyanola na ntembe mabe oyo etyameli ye. Lolenge nini?

Babalani ya liboso batyamaki kati na paradis kitoko, Edene. Nzokande, anzelu moko mopengwi, Satana, amikomisaki nzambe mpe apusaki babalani ya liboso na kolanda ye kati na botomboki epai na Jehovah. Na sembo nyonso, Nzambe akatelaki bango etumbu ya liwa, mpe na yango, bana na bango, bato nyonso, babotamaki na ezalela ya masumu mpe basengelaki kokufa. (Nzembo 51:5) Biblia eyebisi na likambo ya Yobo ete Satana abɛtɛlaki Nzambe ntembe, kolobaka ete moto moko te akoki kotikala sembo epai na Ye kati na momekamo. Kasi Yobo amonisaki ete Satana azali mobuki monene ya lokuta, lokola yango esalemaki na basaleli mosusu na Nzambe na ntango ya kala mpe ya mikolo na biso. (Yobo 1:7-12; 2:2-5, 9, 10; 27:5) Lokola azalaki moto na kokoka, Yesu amonisaki ndakisa eleki malamu na ntina etali kotikala sembo.​—1 Petelo 2:21-23.

Yango wana, Yesu akokaki koloba ete, “Nkolo ya mokili oyo [Satana] azali na bokonzi likolo na ngai te.” (Yoane 14:30, MN) Nzokande, lelo lisusu, “mokili mobimba mozali na nse na nguya na ye oyo mabe.” (1 Yoane 5:19, MN) Wana abɛtaki ntembe na lotomo ya Jehovah mpo na koyangela, Satana apesamelaki mibu 6 000 mpo na komonisa soki akokaki koyangela bato na lolenge malamu. Oyo nde kokwea monene, lokola yango emonisami na lolenge oyo makambo ya mokili mazali se kobeba! Mosika te, Jehovah, Nzambe na biso ya bolingo, akolongola mokili oyo mosili kobeba, kolongisaka bongo boyangeli na ye ya sembo awa na mabele. Oyo nde esengo yango ekomemela bato oyo bazali na mposa ma-kasi ya boyangeli ya kimya mpe ya boyengebene!​—Nzembo 37:9-11; 83:17, 18.

Kasi, esuki wana te! Na nsima, boboto ya Nzambe ekomonana lisusu, lokola yango emonisami na maloba na Yesu oyo mazwami na Yoane 3:16 (MN), ete: “Nzambe alingaki mokili [bato] na motindo boye ete apesi Mwana na ye bobele moko ete moto na moto oyo akondimela ye, abomama te kasi azwa bomoi ya seko.” Elikya oyo ezongisami epai na bato mpo na kozala na bomoi ya seko awa na mabele, esangisi mpe kozalisama ya biloko ya sika. Yango nini? Lolenge nini yango ekomema bolamu na mokili oyo monyokwami na mpasi? Yango ekolobelama kati na lisolo na biso lilandi.