Masoló ya Basakoli na Bokonzi

“Nzambe azali na koponapona te”

ELEKI sikawa bikeke 19, ntoma Petelo oyo apemamaki na elimo na Nzambe akomaki ete: “Njambe akokabolaka bato tɛ; kasi kati na mabota yɔnsɔ, oyo akobangaka ye mpe akosalaka boyɛngɛbɛnɛ ayambami na ye.” (Misala 10:34, 35) Kati na Batatoli ya Yehova okokuta bato oyo bauti na mposo mpe na mangomba nyonso. Balingi boyengebene, mpe bazali kobanga Nzambe. Yehova azali koyamba bango nyonso kati na lisangá ya mokili ya sika, lokola, asalaki yango, na ndakisa, mpo na mwasi moko na Tchad.

Mwasi wana andimisamaki te na lingomba na ye. Mibu mingi na liboso azwaki búku Votre jeunesse—⁠comment en tirer le meilleur parti, ebimisami na Batatoli ya Yehova, mpe asepelaki na batoli kitoko oyo ezalaki na búku wana. Boyekoli ya Biblia ebandaki, mpe azalaki ntango nyonso wana mpo na boyekoli. Nzokande, ntango balendisaki ye mpo na koyangana na makita na Ndako ya Bokonzi, andimaki te. Mpo na nini? Atako mobali na ye apekisaki ye koyekola te, nzokande aboyaki kopesa ye ndingisa ya koyangana na makita na Ndako ya Bokonzi.

Ntango mwasi yango amonisaki mposa ya kokende na liyangani ya zongazonga, Motatoli oyo azalaki kotambwisa boyekoli amonisaki manáka ya liyangani epai na mobali na ye, komonisáká polele batoli kitoko oyo ekopesama. Mobali andimaki ete mwasi na ye akende “bobele mbala moko.” Akendeki mpe asepelaki mingi na ebongiseli nyonso. Nsima na koyebisa mobali na ye makambo oyo ye ayekolaki, apekisaki ye lisusu te na koyangana na makita mosusu. Akamwaki mingi na komona ete lisangá lizalaki na bato bauti na bituluku bikeseni, baoyo bazalaki komonisa komibanzabanza ya solo moko mpo na mosusu. Na nsima akendeki na liyangani ya etúká mpe akamwaki mpenza ntango amonaki bana na ye kofanda na mabɔ́lɔ́ngɔ́ ya Batatoli oyo bautaki na mikili misusu, baoyo balyaki elongo na bana na ye lokola balingami kati na libota moko monene. Yango esalaki mbongwana monene epai na ye.

Kasi botemeli elandaki. Atako azalaka mpenza moto ya nsoninsoni, abandaki kopesa biyano na makita mpe ayikaki mpiko na bilobaloba ya bandeko ya mosuni mpe ya baninga ya mpembeni. Atako aumelaki mibu mingi elongo na mobali na ye, bafandaki bobele engebene masengami ya bonkɔ́kɔ. Lolenge nini akokaki komeka kolobela likambo ya kobalana engebene mibeko ya Leta? Nsima ya kobondela Yehova na motema mobimba, asololaki na mobali na ye, oyo alobaki ete akotalela likambo yango malamumalamu. Na nsuka asalaki yango, mpe babalanaki engebene mibeko ya Leta.

Semeki na ye ya mwasi oyo azalaki kofanda wana abimisaki mikakatano mingi, kasi mobali akɔ́telaki mwasi na ye. Na nsima tata ya mobali ayaki kotala bango. Apesaki mwana na ye etinda ya koboma libala elongo na mwasi na ye mpo ete akómi na lingomba mosusu. Tata wana ayebisaki mwana na ye ete akopesa ye mbongo ya libala mpo na “mwasi moko malamu mingi.” Eyano ya mwana ezalaki ete: “Te, nakosala yango te. Azali mwasi malamu. Soki ye moko alingi kokende, wana ndenge mosusu, kasi ngai nakoloba na ye te ete akende.” Mwasi yango azalaki na bonkondé mingi epai na bokilo na ye, oyo akómaki na nsoni mpo na etamboli na ye. Nzokande, ntango azongaki na mboka epai na ye, akomelaki mwana na ye mokanda, mpe na mbala wana, apesaki ye liponi ya nsuka. Alobaki ete soki mwana na ye aboyi kobengana mwasi na ye, akozala lisusu mwana na ye te. Mbala oyo lisusu akɔ́telaki mwasi na ye. Kanisá esengo ya mwasi ntango amonaki ete mobali akamataki ekateli ya polele motindo wana.

Sikawa bana na bango mibale ya mike ya mibali balingaka mingi kokende elongo na mama na bango na Ndako ya Bokonzi. Nkutu basengaki tata na bango kalaváti, mpo ete bamonaki bandeko nyonso mibali oyo basalaka masukúlu balataka yango. Lelo oyo mwasi wana azali ndeko mwasi oyo asili kozwa batisimo.

Azali moko kati na Batatoli 345 ya esengo oyo bazali na Tchad, baoyo bazali kosakola nsango malamu ya Bokonzi ya Yehova mpe bazali kosepela solo ete, “Nzambe azali na koponapona te.”