Batatoli ya Yehova kati na mokili​—Thailande

“MBOKA ya bato na bonsomi.” Wana ezali ndimbola ya nkombo Thaïlande. Mateya makeseni ya mangomba mayambami na bato ya boboto, basáli ya molende koleka 57 000 000 oyo bafandi kati na yango. Atako lingomba ya Bouddhisme nde ezali na bopusi makasi, mangomba ya boklisto ya nkombo mpamba mazali mpe kati na mokili wana ya súdi-ɛ́sti ya Azia. Bato wana nyonso basengeli koyoka nsango malamu ya Bokonzi ya Nzambe.​—Matai 24:14.a

Bato bakimá mboka na bango bayoki nsango malamu

Kati na bakáa oyo epalangani likoló na bankeka ya Thaïlande penepene na ndelo ya Myanmar, solo ya Biblia esili kokóma epai na bato ya Karen koleka 10 000 oyo bakimá mboka na bango. Basangani ya libota moko ya Karen oyo bazali kofanda na etúká yango bazali Batatoli ya Yehova. Basili kopalanganisa nsango malamu kati na bato wana oyo bakimá mboka na bango. Lolenge nini mosala na bango mobandaki?

Esili koleka mibu mingi elenge mobali moko akataki boyokani elongo na Lingomba ya Anglican mpe akómaki Motatoli ya Yehova. Na bopusi ya pasteur ya lingomba na bango, bandeko na ye batɛmɛlaki ye makasi. Nzokande, ayikaki mpiko na motema petee nyonso, mpe mokemoke botɛmɛli ya libota na ye bosilaki. Bakambi ya Lingomba ya Anglican balandaki botyoli na bango kino ntango balongolaki bango na mikumba na bango mpo na etamboli ya mbindo, esili koleka sikawa mibu mibale. Lokola Lingomba lizalaki na mobateli moko te, libota mpe bandeko mosusu ya Motatoli wana babulunganaki mpe balembaki. Zomi na moko kati na bango batikaki lingomba mpe basɛngaki koyekola Biblia elongo na Batatoli.

Boyekoli yango ekólaki malamu mpenza, mpe bato mosusu oyo bakimá mboka na bango bazalaki kosangana na yango. Solo epalanganaki nokinoki, komemáká na kobatisama ya Batatoli ya sika 17 na mongála oyo ezali kokatisa káa ya bato bakimá mboka na bango. Oyo nde likambo ya esengo na komona mobangé-mwasi moko ya mibu 88 kobatisama elongo na bango!

Kasete video elamwisi mposa

Makoki mazali ya kolikya komona bokóli monene kati na bato bakimá mboka na bango. Na mobu 1993, na molulu ya Ekaniseli, bato 57 bayanganaki. Na boumeli ya boyei ya Mokɛngɛli ya zongazonga na Máí ya mobu wana, bato 67 bayanganaki na moko ya masukúlu na ye. Mpe bato soko 250 bayaki kotala kasete video ya la Société Watchtower oyo ezali na motó na likambo Les Témoins de Jéhovah: un nom, une organisation (Batatoli ya Yehova​—Ezali nkombo, ezali mpe Ebongiseli).

Mwasi ya pasteur moko ya Lingomba ya protestá oyo ebéngami Baptiste kati na káa wana ya bato bakimá mboka na bango ayaki koyoka lisukúlu moko oyo Batatoli ya Yehova babongisaki mpe akomaki mikapo ya Biblia oyo balobelaki. Ayebisaki na mobali na ye ete azalaki kosepela lisusu te na mateya bobele moko oyo azalaki koyoka mbala na mbala na ndakonzambe na bango. Mobali na ye aboyaki, na kolobáká ete soki mwasi na ye akolanda kokende na makita ya Batatoli ya Yehova, bato mosusu ya lingomba na bango bakolanda ye. Ntango akendaki lisusu na makita, mobali na ye alandaki ye na mbeli mpe atumbaki nkasa oyo akomaki makambo likoló na yango mpe mokanda na ye ya boyekoli ya Biblia. Atako bongo, mwasi wana akendaki lisusu ntango balakisaki kasete video. Na nsima mwasi wana ayebisaki na mobali na ye makambo oyo ye amonaki. Lokola abongolaki ezaleli na ye, mobali andimaki kokende kotala kasete video mpe ayokaki mawa mingi mpo ete atumbaki bankasa mpe mikanda ya boyekoli ya Biblia ya mwasi na ye.

Na yango, bato bazali koyoka nsango malamu na Thaïlande. Bazali bongo kozwa bonsomi ya elimo kati na “mboka ya bato na bonsomi.”​—Yoane 8:32.

[Maloba na nse ya lokasa]

[Etanda na lokasa 24]

MAKAMBO MATALI EKÓLO WANA Mbula ya mosala 1993

MOTUYA NYONSO YA BASAKOLI: 1 434

BOKOKANISI: Motatoli 1 mpo na 40 299

MOTUYA YA BAYANGANI NA EKANISELI: 3 342

MWAYENE YA BABONGISI-NZELA: 232

MWAYENE YA BOYEKOLI NA BIBLIA: 1 489

MOTUYA YA BABATISAMI: 92

MOTUYA YA MASANGÁ: 39

FILIALE: BANGKOK

[Elilingi na lokasa 25]

[Elilingi na lokasa 25]

Filiale ya liboso na 1947

[Elilingi na lokasa 25]

Libota ya Betele liboso ya Filiale ya sika na Bangkok, oyo efungwamaki na Febwáli 8, 1992