Moto na bilulelá

LOKÓTÁ ya Liebele ezali bobele na eutelo moko mpo na liloba “zúwa.” Wana ezali koloba na ntina na bato ya masumu, liloba na yango ya Liebele likoki kobongolama “elulelá” to “bombanda.” (Genese 26:14; Mosakoli 4:4) Nzokande, lokótá ya Greke ezali na maloba mingi mpo na kolobela “zúwa.” Liloba zeʹlos, lokola liloba oyo likokani na yango na Liebele ekoki kosalelama mpo na zúwa ya malamu mpe zúwa ya mabe. Liloba mosusu ya Greke, phthoʹnos, lizali mpenza na ndimbola ya mabe. Kati na Traduction du monde nouveau, ebongolami bobele “elulelá.”

Lolenge nini liloba phthoʹnos esalelamaki kati na Greke ya kala? The Anchor Bible Dictionary elobi ete: “Na bokeseni na moto na lokoso, moto oyo azwami na phthonos alingaka bobele te ete ye mpe azala na biloko oyo ye azali koyokela motema mpasi mpo ete basusu bazali na yango; alingaka nde ete basusu bázala nkutu na yango te. Akeseni na moto na kowelana na lolenge boye ete mokano na ye, na bokeseni na moto ya kowelana, ezali te ya kolónga kasi ya kokanga basusu nzela mpo ete bálónga te.”

Mingimingi, moto na bilulelá ayebaka te ete ezaleli na ye moko nde ezali ntina monene ya mikakatano na ye. Diksionere yango elobi lisusu ete: “Moko na makambo ekesenisaka mpenza phthonos ezali bongo kozanga komiyeba. Moto na phthoneros, soki asɛngami ete amonisa ntina ya ezaleli na ye, akomilobela mpe akoloba ntango nyonso epai na basusu ete baoyo ye akanelaka nde bazalaka na libúngá mpe ete kozanga kolongobana ya makambo nde epusaka ye na kotɔ́nga. Soki batuni ye mpo nini akoki koloba motindo wana na ntina na moninga moko, akoloba ete azali kosala bongo mpo na matomba mpenza ya moninga na ye.”

Bakomi na Evanzile Matai mpe Malako basalelaki liloba ya Greke phthoʹnos mpo na kolobela eloko oyo epusaki baoyo babomaki Yesu. (Matai 27:18; Malako 15:10) Ee, elulelá nde epusaki bango. Bobele liyoki wana ya mabe epusaki bapɛngwi na koyina baoyo bazalaki liboso bandeko na bango. (1 Timoté 6:3-5) Ezali likambo ya kokamwa te na koyeba ete bato na bilulelá bapesameli nzela te ya kokɔta na Bokonzi ya Nzambe! Yehova Nzambe asili kozwa ekateli ete baoyo nyonso bazali kokóba ‘kotonda na zúwa babongi na kufa.’​—Baloma 1:29, 32; Bagalatia 5:21.

[Bililingi na lokasa 7]

Tiká te ete elulelá ebebisa bomoi na yo