Bomoi ya malamu elakelami biso

OLINGI ete mikakatano ya bomoi mizala lisusu te? Olingi kofanda na mokili epai kuna bomoi ezali kitoko lokola na bililingi oyo emonisami na nkasa ya ezipeli ya zulunalo oyo? Talá bililingi yango malamu. Bato bazali na biloko mingi ya kolya. Bazali kosepela mpenza na bilei kitoko wana. Moto nyonso azali na esengo. Bato ya mposo ekeseni bafandi elongo na kimya nyonso. Ata banyama mpe bafandi na kimya! Moko te azali kobimisa bitumba. Moko te azali mobólá. Moko te azali na maladi. Zingazinga ya bifandelo na bango ezali kitoko, nzeté kitoko, mpe mai ya pɛtɔ. Oyo nde esika kitoko!

Mokolo mosusu mabelé oyo makokóma bongo? Ee, makokóma paladiso. (Luka 23:43) Nzambe, ye oyo azalisaki mabelé, akanaki ete bato bázala na bomoi ya malamu kati na paladiso awa na mabelé. Yo mpe okoki kozala kuna!

Olingi kozala na bomoi ya lolenge nini?

Na meko nini Paladiso oyo ekosalema na mabelé na mikolo mizali koya ekokesana na mokili oyo tofandi lelo? Sikawa, koleka miliare moko ya bato bazali kokufa nzala mokolo na mokolo. Kasi kati na Paladiso oyo Nzambe akani kosala mpo na mabelé, moto moko te akokelela mpo na bilei. Biblia epesi elaka oyo ete: “[Yehova] na bibele akobongisela mabota nyonso elambo na bilei na mafuta, mpe na vinyo oyo esili koumela.” (Yisaya 25:6) Nzala ekozala lisusu te, mpamba te Biblia elobi ete: “Masango ikotondana na mokili ata kino likoló na nkeka.”​—Nzembo 72:16.

Lelo oyo, bato mingi bazali kofanda kati na bandako ya malamu te, to bazali kobundana mpo na kozwa mosolo ya kofutela ndako. Basusu bazangi bandako mpe bazali kolala na balabála. Engebene Lisangá oyo ekotalelaka makambo ya kolɔngɔ́nɔ́ ya nzoto na mokili mobimba, bamilió 100 ya bana bazangi esika ya kolala. Kasi kati na Paladiso na mikolo mizali koya, moto na moto akozala na ndako na ye mpenza. Liloba ya Nzambe elobi ete: “Bakotonga ndako mpe bakofanda na yango; bakokona bilanga na miwiti mpe bakolya mbuma na yango.”​—Yisaya 65:21.

Bato mingi bazali kosala misala oyo bango moko basepelaka na yango te. Mingimingi, basalaka mosala makasi na boumeli ya ntango molai mokolo na mokolo, kasi bazwaka lifuti moke. Kati na mokili mobimba, moto 1 likoló na bato 5 azali kozwa lifuti oyo ezali na nsé ya badolare 500 mpo na mbula mobimba ya mosala. Nzokande, kati na Paladiso oyo ezali koya bato bakosepela na misala na bango mpe bakozwa matomba malamu na yango. Nzambe alaki ete: “Bakosepela kino ntango molai mpo na misala na mabɔkɔ na bango. Bakosala mosala na mpamba te.”​—Yisaya 65:22, 23.

Sikawa makɔnɔ mpe mpasi ipalangani bipai binso. Bato mingi bakufá miso. Basusu bakufá matoi. Basusu bakoki kotambola te. Kasi kati na Paladiso, bato bakozala na makɔnɔ mpe mpasi te. Yehova alobi ete: “Mofandi moko akoloba te ete, Ngai nazali na maladi.” (Yisaya 33:24) Mpo na baoyo bazali lelo bibɔsɔnɔ, elaka moko ya kolendisa elobi ete: “Bongo miso na bakufeli miso makofungolama, mpe matoi na bimimi makozipolama; bongo, motengumi akopumbwa lokola mboloko, mpe lolemo na ebubu ekoyemba na esengo.”​—Yisaya 35:5, 6.

Na mikolo oyo, bwale mpe mpasi ezali, mawa mpe liwa ezali. Kasi kati na Paladiso na mabelé, makambo oyo nyonso makozala lisusu te. Ee, ata liwa mpe ekozala lisusu te! Biblia elobi ete: “Nzambe ye mpenza akozala na bango elongo. Akolongola mpisoli nyonso na miso na bango, mpe kufa ekozala lisusu te, na mawa, na kolela, na mpasi, lisusu mpe te; mpo ete makambo na liboso masili koleka.”​—Emoniseli 21:3, 4.

Emonani polele ete, Paladiso oyo Yehova alakaki mpo na mabelé ekolimbola bongo bomoi ya malamu mpo na bato. Kasi lolenge nini tokoki kondimisama ete ekosalema? Ekosalema ntango nini, mpe lolenge nini? Nini osengeli kosala mpo ete yo mpe ozala kuna?